قوعامداعى سوڭعى وقيعالار دۇنيە جۇزىندەگى ۆولونتەرلىك قوزعالىسقا جاڭا سەرپىن بەرگەندەي. وعان اتقارىلعان تولاعاي ەڭبەك دالەل بولا الادى. مەملەكەت باسشىلارىنان باستاپ بارلىق ساراپشىلار ارامىزداعى مەيىرىمدى جانداردىڭ پاندەميا كەزىندە اتقارعان جۇمىسى مەن كۇرەسكە قوسقان ۇلەسىن جوعارى باعالاپ, العىسىن جاۋدىردى. راسىمەن, قوعام قىسپاقتا قالعاندا ازاماتتىق ۇستانىمى نىق, مورالدىق قۇندىلىقتارى جوعارى ازاماتتاردىڭ رياسىز ارەكەتى سۇيسىندىرەدى.
جاقىندا قازاقستان پرەزيدەنتى قاسىم-جومارت توقاەۆ حالىقارالىق بەلدى مىنبەرلەردىڭ بىرىنەن ۆولونتەرلەردىڭ ەرەن ەڭبەگىن بۇۇ شەڭبەرىندە ەسكەرۋدى, اتاپ ايتقاندا ۆولونتەرلەردى جۇمىلدىرۋدىڭ حالىقارالىق جىلىن جاريالاۋدى ۇسىندى. جالپى, مۇنداي باستامانىڭ لوگيكالىق سيپاتى بار ەكەنىن اڭعارۋ قيىن ەمەس. ويتكەنى بۇۇ «ۆولونتەرلەر جىلىن» وسىعان دەيىن دە اتاپ وتكەن ەدى. ال ءدال كەلەسى 2021 جىلدىڭ وسى ماقساتقا ارنالۋى نەگە قيسىنعا كەلەتىنىن قاراپ كورەلىك.
ۇيىم العاش رەت 2001 جىلدى «حالىقارالىق ۆولونتەرلەر جىلى» دەپ جاريالاپ, قوزعالىستىڭ قوعامداعى ورنىن بەكىتۋگە جانە ودان ءارى دامىتۋعا سەپتىگىن تيگىزگەن-ءدى. بۇل باستاما بۇكىل الەمدە ءوز ۋاقىتىن باسقالارعا قىزمەت ەتۋگە ارناعان ميلليونداعان جاننىڭ جەتىستىگىن اتاپ وتۋگە, وزگەلەردى ۆولونتەر بولۋعا شاقىرۋعا, مارتەبەسىن بەكىتۋگە, ءوزارا قارىم-قاتىناسىن ورناتۋعا جانە ىنتالاندىرۋعا باعىتتالعان.
ءبىر جىلدىق جۇمىستىڭ ناتيجەسىندە ۇيىمداستىرۋشىلار ۆولونتەرلىك قوزعالىستى جاھاندىق دەڭگەيدە جاڭعىرتۋ مۇمكىن بولعانىن اتاپ ايتتى. «وزگەلەرگە كومەكتەسەمىن دەگەن رياسىز تىلەكتى جۇيەلەي بىلسەك, بەيبىت الەم قۇرامىز. بىرىككەن ۇلتتار ۇيىمى مۇراتتارى وسى ۆولونتەرلىكتىڭ نەگىزىندە قالانعان» دەلىنگەن ۇيىمنىڭ مالىمدەمەسىندە. بۇل حالىقارالىق بەدەلدى ۇيىمنىڭ قۇندىلىقتارى قاراپايىم ادامي قاسيەتتەردەن قۇرىلاتىنىن بايقاتادى. ال كەز كەلگەن قوعامدى ىزگى نيەت العا جەتەلەيتىنى ءسوزسىز. وسى ۇستانىمدى تۋ ەتكەن مەملەكەتتىڭ دە تاسى ورگە دومالاماق.
2001 جىلى 120-دان استام ۇلتتىق كوميتەت الەمنىڭ 200 قالاسىندا ۆولونتەرلىكتى ىلگەرىلەتەتىن اۋقىمدى جوبالاردى جۇزەگە اسىردى. بۇل قوزعالىستى ادام تىرشىلىگىنىڭ ءبىر بولىگى رەتىندە قالىپتاستىرۋعا ءدال وسى جىل ۇلكەن سەرپىن بەردى. بۇۇ قايىرىمدى ءىستى قوعامداعى كەدەيلىكتى, الەۋمەتتىك تەڭسىزدىكتى جويۋعا باعىتتالعان كەز كەلگەن ستراتەگيانىڭ اجىراماس بولىگى دەپ باعالايدى. بۇل رەتتە ەلىمىزدە بيىلعى جىلدىڭ «ۆولونتەر جىلى» دەپ جاريالانىپ, وسى باعىتتاعى جۇمىستاردىڭ ارتۋى ۇلكەن مانگە يە.
سونداي-اق 2001 جىلدىڭ قازان ايىندا فرانتسيا, گەرمانيا, يسپانيا جانە ۇلىبريتانيادا ەرىكتىلەردى قولداۋ ءۇشىن زاڭناما قابىلدانعان. ال ارگەنتينا, كولۋمبيا, ەكۆادور, ماداگاسكار, موزامبيك, نەپال, سەنەگال جانە تانزانيادا جاڭا زاڭ جوبالارى ۇسىنىلعان. ۆولونتەرلىكتىڭ ەكونوميكالىق ۇلەسىن زەردەلەۋگە ارنالعان «ۆولونتەرلىك ولشەمى: پراكتيكالىق قۇرالدار جيناعى» زەرتتەۋ نۇسقاۋلىعى ازىرلەنگەن. بۇل قۇجات بوتسۆانا, قىتاي, لاوس, قازاقستان جانە موڭعوليادا قولدانۋعا بەيىمدەلىپ جاسالعان ەكەن. كامبودجا, ماداگاسكار, ناميبيا, شري-لانكا جانە تانزانيادا ەرىكتىلىك بويىنشا زەرتتەۋلەر جۇرگىزىلە باستاعان. بايقاعانىمىزداي, 2001 جىل ۆولونتەرلىك قوزعالىستى زاڭنامالىق تۇرعىدان نەگىزدەپ, قوعامداعى بەدەلىن ارتتىرۋعا كوپ كومەكتەسكەن.
تۋرا ون جىلدان كەيىن ۆولونتەرلەر ءۇشىن تاعى ەرەكشە كەزەڭ باستالدى. ەۋروپالىق كوميسسيا 2011 جىلدى ايماقتاعى «ۆولونتەرلەر جىلى» دەپ جاريالاپ, ەۋروپا ەلدەرىندەگى قوزعالىستى قايتا جاڭعىرتتى. سونىمەن قاتار بۇۇ «حالىقارالىق ۆولونتەرلەر جىلى +10» دەگەن جالاۋمەن ون جىل بۇرىنعى باستامانى قايتا قولعا الدى. بۇل جولى 2001 جىلعى قابىلدانعان جوبالار پىسىقتالىپ, الداعى جوسپارلار انىقتالدى. وسىلايشا كەلەسى 2021 جىل بۇۇ باستاماسى ءۇشىن تاعى ءبىر مەرەيتويلىق مەجە بولىپ تۇر.
مەملەكەت باسشىسىنىڭ كەلەسى جىلدى «حالىقارالىق ۆولونتەرلەر جىلى» دەپ جاريالاۋ تۋرالى ۇسىنىسى قاي جاقتان قاراساق تا ويعا قونىمدى. ال قازاقستان بۇل ماسەلەدە دامىعان ەلدەرمەن تەرەزەسىن تەڭەستىرىپ, حالىقارالىق قاۋىمداستىقتىڭ بەلسەندى مۇشەسىنە اينالىپ كەلەدى.
