تەمەن – ءتىلىنىڭ ازداعان مۇكىستىگىنە قاراماستان, بىلايعى جۇرتپەن شۇيىركەلەسە اڭگىمەلەسىپ كەتەتىن اقجارقىن جىگىت اعاسى. جاسىنان ەڭبەكپەن شيراپ وسكەن ازامات. كەزىندە قوي دا باققان. كەڭەستىك شارۋاشىلىقتار تاراعان تۇستا دا تەككە قاراپ وتىرماي, جەكە كاسىپكەرلەرگە جالدانىپ, ولاردىڭ مالىن باقتى, ەگىنىن قورىدى.
سوڭعى جىلدارى اۋىلدا جۇمىسسىزدىقتىڭ بەلەڭ الۋى وعان وڭاي تيمەدى. جاسىراتىنى جوق, وتباسى مەن بالالارىن اسىراپ باعۋ ءۇشىن بىرەۋلەردىڭ وتىنىن جارىپ, مونشاسىن جاعىپ, مالىن باعىپ بەرۋ سەكىلدى جۇمىستاردى اتقارۋىنا دا تۋرا كەلدى. تەمەننىڭ قالاداعى قايناعان بازارلاردىڭ بىرىنە بارىپ, اربا سۇيرەۋىنە دە بولار ەدى. الايدا اۋىلدا دا مۇنداي ءىس اتكوپىر. ول وسىلاي وتباسى مەن بالالارى ءۇشىن قانداي ىستەن بولسىن تارتىنباي-اق, ادال ەڭبەگىمەن ازدى-كوپتى ناپاقا ايىرىپ ءجۇر.
جۇبايى ايجامال ەكەۋى ءبىر ۇل, ەكى قىز تاربيەلەپ, ءوسىرىپ, قاتارعا قوستى. ۇلكەن ۇلى تەحنيكۋمدا وقيدى. بۇل وتباسى وسىعان دەيىن اۋىلداعى بوس تۇرعان ۇيلەردىڭ بىرىنەن ەكىنشىسىنە كوشىپ-قونۋمەن ءجۇرىپتى. ەندى ءوزىنىڭ شاڭىراعى بار.
– بارلىق قيىندىق ارتتا قالدى. ەندى ءوز باسپانام بار, بۇل ءۇشىن اۋىلداستارىما ايتار العىسىم شەكسىز, – دەيدى تەمەن.
جەكە تۇرعىن ءۇيدى ىرگەتاسىنان باستاپ قالاپ, قابىرعاسىن دا وزدەرى قۇيعان كىرپىشتەن ءورىپ, شاتىرىن جاۋىپ, داپ-دايىن كۇيىندە پايدالانۋعا بەرگەن اۋىلداعى قۇرىلىسشى ازاماتتار ەكەن.
– «اسار» قايىرىمدىلىق اكتسياسى اۋىلدىق جەرلەردە دە قاناتىن كەڭگە جايا باستادى. بۇل باستامانى دا ويىقتىقتار بىردەن ءىلىپ الىپ كەتتى. ەلدەن جينالعان قاراجات ەسەبىنەن تەمەن ابدەنباي ۇلىنىڭ وتباسى ءۇشىن سالىنعان ءۇيدىڭ جالپى اۋماعى – 9x9 مەتر, ءتورت بولمەلى. اۋلاسى كەڭ, قورشالعان شارباعى دا بار, – دەيدى ويىق اۋىلدىق وكرۋگىنىڭ اكىمى مەدەت ۇرىستەنوۆ.
«باسپانا – باقىت شامى» عوي قاشاندا. ال ءسانى مەن ساۋلەتى كەلىسكەن ءۇي اۋىلداستارىنىڭ ابدەنباەۆتار اۋلەتىنە شىن نيەتتەرىمەن ۇسىنعان تاماشا تارتۋى دا سەكىلدى.
بايماحانبەت احمەت,
جۋرناليست
جامبىل وبلىسى,
تالاس اۋدانى
