وتكەن اپتادا ساۋدا جانە ينتەگراتسيا مينيسترلىگىنىڭ «QazTrade Accelerator» ەكسپورتتىق اكسەلەراتسيا باعدارلاماسى اياسىندا «قىتايداعى نەگىزگى ساتۋ ارنالارى» اتتى ەكىنشى وقىتۋ ۆەبينارى ءوتتى. ۆەبينارعا قىتايلىق سەرىكتەستەرمەن جۇمىس ىستەۋ تاجىريبەسى بار حالىقارالىق ساراپشىلار قاتىستى.
«شىلدە ايىنىڭ سوڭىنان باستاپ ءبىز اكسەلەراتسيا باعدارلاماسىمەن بەلسەندى جۇمىس ىستەي باستادىق. ەكى اپتالىق جەكە كەزدەسۋلەر اياسىندا قىتاي نارىعىنا ەكسپورتتاۋشىلاردىڭ پروبلەمالارى, قاتىسۋشىلاردىڭ ارقايسىسىنىڭ باسەكەلىك ارتىقشىلىقتارى انىقتالدى. ەكسپورتتى جەدەلدەتۋدىڭ ەكىنشى كەزەڭى باستالدى, بۇل كاسىپورىنداردى قىتايلىق سەرىكتەستەرمەن كەلىسىمشارتتارعا قول قويۋعا دايىنداۋدى كوزدەيدى», دەدى «QazTrade» «ساۋدا ساياساتىن دامىتۋ ورتالىعىنىڭ» باس ديرەكتورى ارمان ابەنوۆ.
ەكىنشى وقىتۋ ۆەبينارىندا باعدارلاما قاتىسۋشىلارى قىتايداعى نەگىزگى ساتۋ ارنالارى بويىنشا پراكتيكالىق ۇسىنىستار الدى. سونداي-اق وسى ارنالارعا كىرۋ تۋرالى كەلىسسوزدەر جۇرگىزۋدىڭ قىر-سىرىن ءبىلدى. سونىمەن قاتار ەكسپورتتاۋشىلار جۇگىنە الاتىن قارجىلىق مەملەكەتتىك قولداۋ شارالارىنىڭ جيىنتىعىمەن تانىستى.
PwC China اعا مەنەدجەرى چەنني فەنگ قىتاي نارىعىندا تاۋارلاردى ىلگەرىلەتۋدىڭ نەگىزگى جولدارى تۋرالى اڭگىمەلەدى. اتاپ ايتقاندا, ول ەلەكتروندىق كوممەرتسيا نارىعىنا ءوز بەتىمەن شىعۋ تۋرالى شولۋ جاساپ, ىسكەرلىك سەرىكتەس نەمەسە ديستريبيۋتورلار مەن ءىرى كورمەلەردە سەرىكتەستەر تابۋ بويىنشا تاجىريبەلىك ۇسىنىستارمەن ءبولىستى. سونىمەن قاتار سپيكەر قىتايلىق سەرىكتەستەردىڭ نەگىزگى ماسەلەلەرىنە – ءونىمنىڭ قۇنى مەن ۇلگىلەردى الۋ مۇمكىندىگىنە نازار اۋداردى.
Eurasia Development Ltd. كومپانياسىنىڭ باس ديرەكتورى اندرەي پروحوروۆيچ قىتاي نارىعىنا شىعۋ تۋرالى ۇسىنىستار بەرىپ, ساتۋ ارنالارىن تاڭداۋداعى نەگىزگى قاتەلىكتەرگە توقتالدى. سپيكەر قىتايدىڭ ءبىرتۇتاس نارىق ەمەس ەكەندىگىنە نازار اۋداردى جانە قاتىسۋشىلارعا قىتايدىڭ ءار ايماعىن وزىندىك ەرەكشەلىكتەرى بار بولەك نارىق رەتىندە قاراستىرۋعا كەڭەس بەردى.
چەنني فەنگ پەن اندرەي پروحوروۆيچ اتاپ وتكەندەي, بۇگىندە قىتاي الەمدەگى ەلەكتروندىق ساۋدا الاڭدارىنىڭ سانى بويىنشا كوشباسشى بولىپ سانالادى. ينتەرنەت-ساتىلىم قىتايداعى تۇتىنۋ تاۋارلارىنىڭ بولشەك ساتىلىمىنىڭ جالپى كولەمىنىڭ شامامەن 30%-ىن قۇرايدى. وسىعان بايلانىستى ساراپشىلار ەكسپورتتاۋشىلارعا قىتاي نارىعىندا ونلاين ساتۋ قۇرالدارىن زەرتتەۋگە ەرەكشە نازار اۋدارۋدى ۇسىندى.
KazakhExport ەكسپورتتىق ساقتاندىرۋ كومپانياسى ساقتاندىرۋ دەپارتامەنتىنىڭ ديرەكتورى قۋانىش مۇقاجانوۆ ءوز پرەزەنتاتسياسىندا شيكىزاتتىق ەمەس تاۋارلاردى وندىرۋشىلەردى جانە ەكسپورتتىق تسيكلدىڭ بارلىق كەزەڭىندە سىرتقى نارىقتا قىزمەت كورسەتۋشىلەردى قولداۋدىڭ قارجىلىق قۇرالدارى تۋرالى ايتتى. KazakhExport قىتايداعى سەرىكتەستەرمەن جۇمىس ىستەۋ ءۇشىن ءارتۇرلى قۇرالداردى پايدالانادى (اۆانستىق تولەمدەر, كەلىسىمشارت بويىنشا تولەمدەر, ەكسپورتقا دەيىنگى قارجىلاندىرۋ, ەكسپورتتاۋشىلاردىڭ نەسيەلەرىن ساقتاندىرۋ). بۇل قۇرالدار سىرتقى نارىققا شىعۋ كەزىندە قازاقستاندىق ەكسپورتتاۋشىلاردى جەڭىلدەتىلگەن قارجىلاندىرۋعا كومەكتەسەدى.
بيىل كۇردەلى ەپيدەميالىق جاعدايعا بايلانىستى قازاقستاننىڭ حالىقارالىق كورمەلەرگە قاتىسپاي, ونلاين فورماتقا كوشۋىنە تۋرا كەلدى. قازاقستاننىڭ ساۋدا جانە ينتەگراتسيا مينيسترلىگى شانحايداعى (5-10 قاراشا) ءىىى يمپورتتىق تاۋارلار مەن قىزمەتتەردىڭ قىتايلىق حالىقارالىق كورمەسىنە ونلاين فورماتتا قاتىسۋعا شەشىم قابىلدادى. ۆيرتۋالدى كورمە اياسىندا قازاقستاندىق ازىق-ت ۇلىك وندىرۋشىلەرىنىڭ ونىمدەرى شانحايعا قازاقستاننىڭ سىرتقى ساۋدا پالاتاسىنىڭ قولداۋىمەن جىبەرىلەدى. قاتىسۋشى كومپانيالاردىڭ وكىلدەرى وزدەرىنىڭ ەكسپوناتتارىن ونلاين فورماتتا تانىستىرادى.
