ايماقتار • 27 قىركۇيەك، 2020

قازاقستانداعى قوس اقتاۋدىڭ باسشىلارى كەزدەستى

328 رەت كورسەتىلدى

ەلىمىزدە اتتاس ەكى اقتاۋ بار. ءبىرى - ەلىمىزدىڭ وڭتۇستىك باتىسىندا كاسپي جاعالاۋىندا ورنالاسسا، ەكىنشىسى - سارىارقانىڭ توسىندە جايعاسقان، دەپ حابارلايدى Egemen.kz.

باتىستاعى اقتاۋ - ماڭعىستاۋ وبلىسىنىڭ ورتالىعى، ەكىنشى اقتاۋ - قاراعاندى وبلىسىنداعى شاعىن كەنت. شاعىن كەنتتىڭ باسشىسى باستاعان قوناقتار وبلىس ورتالىعى – اقتاۋ قالاسىنا كەلدى. بۇل تۋرالى ماڭعىستاۋ وبلىسى قوعامدىق كوممۋنيكاتسيا ورتالىعى حابارلادى.

قالا قوناقتارى ماڭعىستاۋدىڭ كەرەمەتتەرىن تاماشالاپ، ابىز جازۋشى ءا.كەكىلباەۆ مۋزەيىنە باردى جانە سارىارقا كىتاپحاناسىنىڭ جيناعى«سارىارقا اقىندارىنىڭ ولەڭدەرى» اتتى 100 تومدىق پەن «ەلباسىنا تۇعىر بولعان سارىارقا» كىتابىن سىيعا تارتتى.

-بۇگىن ەرەكشە كۇن. قالا اكىمى نۇرداۋلەت يگىلىك ۇلىنىڭ شاقىرتۋىمەن ماڭعىستاۋدىڭ ورتالىعىنا كەلدىك. دەلەگاتسيا قۇرامىندا مەتاللۋرگ، تۇڭعىش پرەزيدەنت، ەلباسى نۇرسۇلتان نازارباەۆپەن بىرگە وقىپ، تەمىرتاۋداعى كومبيناتتا جۇمىس ىستەگەن زامانداستارى كۋانىش وماشەۆ پەن توقتارحان يسقاقوۆ بار. بۇل يگى باستاما كوپشىلىككە ۇلگى بولادى دەگەن سەنىمدەمىن. ويتكەنى، ەلىمىزدە قالالار بايلانىسىنىڭ دامۋى بىرنەشە سالانىڭ تامىرىنا قان جۇگىرتەدى. ءبىر جاعىنان جاستارعا ۇلگى بولادى دەگەن سەنىمدەمىن. قاراعاندى وبلىسىنداعى اقتاۋ كەنتىندە كەزىندە 40 مىڭعا جۋىق حالىق تۇردى. قازىر تۇرعىندار سانى 7 مىڭعا جۋىقتايدى، - اقتاۋ كەنتىنىڭ اكىمى التىنبەك ەسمۇرزاەۆ.

شارا اياسىندا قوس اقتاۋدىڭ اكىمدەرى ءوزارا ىنتىماقتاستىقتى دامىتۋ ماقساتىندا مەموراندۋمعا قول قويدى.

-بۇگىن ەكى ءوڭىردىڭ اراسىندا ساۋدا جانە ەكونوميكالىق قاتىناستاردى ورناتۋ ماقساتىندا ءبىلىم، مادەنيەت، دەنساۋلىق سالاسىندا ورتاق جوبالاردى ىسكە اسىرۋ ماقساتىندا مەموراندۋمعا قول قويدىق. الداعى ۋاقىتتا تىعىز ارىپتەستىك قارىم-قاتىناستا بولامىز دەگەن ۇمىتتەمىن، دەدى اقتاۋ قالاسىنىڭ اكىمى نۇرداۋلەت قيلىباي.

 


ماڭعىستاۋ وبلىسى

سوڭعى جاڭالىقتار

ۇقساس جاڭالىقتار