الەم • 26 قىركۇيەك، 2020

ۇشاق اپاتى: ۋكراينادا ۇلتتىق ازا تۇتۋ كۇنى جاريالاندى

51 رەت كورسەتىلدى

ۋكراينا پرەزيدەنتى ۆلاديمير زەلەنسكي كەشە حاركوۆ وبلىسىندا اپاتقا ۇشىراعان اۋە اپاتىنا بايلانىستى وسىنداي شەشىم شىعارعان، دەپ حابارلايدى Egemen.kz.

پرەزيدەنتتىڭ ءوزى اپات ورىن العان حاركوۆ وبلىسىنا باردى.

"كەشە وتە قايعىلى جاعداي ورىن الىپ، 25 ازاماتىمىز وقيعا ورنىندا، بىرەۋى دەنەسىنىڭ كوپ بولىگىن كۇيىك شالۋ سالدارىنان قازا تاپتى. ءبىز ەلىمىزدىڭ جاس كۋرسانتتارى مەن تاجىريبەلى اسكەريلەرىنەن كوز جازىپ قالدىق. ولاردى الدا ۇزاق ءومىر مەن كوپتەگەن جەڭىس كۇتىپ تۇر ەدى. مۇنىڭ قانشالىقتى اۋىر ءارى ورنى تولمايتىن قازا ەكەنىن سوزبەن ايتىپ جەتكىزۋ مۇمكىن ەمەس. قازا بولعانداردىڭ ارتىندا قالعان تۋىستارى مەن جاقىندارىن جۇباتارعا ءسوز تابۋ قيىن"، دەپ جازدى زەلەنسكي ءوزىنىڭ تelegram-كانالىندا.

ول قازا بولعان ازاماتتاردىڭ ارتىندا قالعان جاقىندارىنا وتەماقى تاعايىنداۋ قاجەتتىگىن اتاپ ءوتتى. 

"ۋكراينا ءوزىنىڭ ەر جۇرەك ۇلدارىن ەشقاشان ۇمىتپايدى. اۋە اپاتىنىڭ سەبەبىن جەدەل انىقتاۋدى تالاپ ەتەمىن. جانە زەرتتەۋ جۇمىستارىن وبەكتيۆتى اتقارىلۋى كەرەك"، دەدى ول. 

 

ۋكراينالىق باق پرەمەر-مينيستر دەنيس شمىگال ۇشاقتىڭ اپاتقا ۇشىراۋىنا بايلانىستى مينيسترلەر كابينەتىنىڭ شۇعىل وتىرىسىن دايىنداپ جاتقانىن حابارلادى.

بۇعان دەيىن قازاقستان پرەزيدەنتى قاسىم-جومارت توقاەۆ ۋكراينا پرەزيدەنتى جەدەلحات جولداپ، كوڭىل ايتتى.

ايتا كەتەيىك، ۇشاقتا يۆان كوجەدۋب اتىنداعى حاركوۆ ۇلتتىق اۋە كۇشتەرى ۋنيۆەرسيتەتىنىڭ اسكەري ۇشقىشتارى مەن كۋرسانتتارى بولعان. جالپى ۇشاق بورتىندا 27 ادام بولعان كورىنەدى: 20 كۋرسانت جانە ەكيپاجدىڭ 7 مۇشەسى. وكىنىشكە قاراي، ونىڭ 25 قازا بولعان.

سوڭعى جاڭالىقتار

ۇقساس جاڭالىقتار