رەسەي فەدەراتسياسىنىڭ پرەزيدەنتى ۆلاديمير پۋتين لدرپ سەركەسى ۆلاديمير جيرينوۆسكيمەن جاڭا وگارەۆوداعى كەزدەسۋى كەزىندە ودان ەلدىڭ مۇددەسىنە ساي كەلەتىن ارەكەتتەر جاساماۋدى, ۇلتارالىق قارىم-قاتىناس جاعدايىنا بايلانىستى وي قوزعاعاندا تىلىنە يە بولۋدى ءوتىندى. بۇل تۋرالى «ترۋد» گازەتى جازدى.
«مەنىڭ سىزگە ۇلكەن ءوتىنىشىم بار. ءسىزدىڭ ەلەكتوراتىڭىز تۇراقتى. سوندىقتان, ونى جەكەلەگەن ەلەكتورات اراسىندا نىعايتا ءتۇسۋ ماقساتىمەن ەلدىڭ تۇپكىلىكتى مۇددەسىنە نۇقسان كەلەتىن ارەكەتتەرگە بارۋدىڭ قاجەتى جوق دەپ ويلايمىن», - پرەزيدەنت ساياساتكەرگە.
پۋتين سول سياقتى ميگرانتتاردىڭ «ءبىزدىڭ زاڭدارىمىزدى, ادەت-عۇرىپتارىمىزدى, وزدەرى كەلگەن ايماقتار مادەنيەتىن ءسوزسىز قۇرمەتتەۋىنە» قول جەتكىزۋدى وتە ماڭىزدى نارسە دەپ سانايتىنىن ءبىلدىردى. ول ميگراتسيالىق ساياساتتى كۇشەيتۋدىڭ قاجەت ەمەس ەكەنىن اشىپ ايتتى. پرەزيدەنت ميگرانتتارعا بايلانىستى قالىپتاسقان احۋالدىڭ قازىر تەك رەسەيدىڭ عانا باستان كەشىپ وتىرعان پروبلەماسى ەمەس ەكەنىنە باسا نازار اۋداردى. ءوز كەزەگىندە جيرينوۆسكي بۇل ماسەلەدە جۇمىس بەرۋشىلەردىڭ جاۋاپكەرشىلىگىن كۇشەيتۋ كەرەك ەكەنىن العا تارتتى.
ەسكە سالا كەتەيىك, 24 قازان كۇنى تەلەارنادا جۇرگىزىلگەن تەلەجۋرناليست ۆلاديمير سولوۆەۆتىڭ «پوەدينوك» («جەكپە-جەك») حابارى كەزىندە ۆلاديمير جيرينوۆسكي وتباسىندا ءۇشىنشى بالانىڭ تۋىلۋىنا ايىپپۇل تولەتىلۋى ارقىلى سولتۇستىك كاۆكاز رەسپۋبليكالارىندا تۋدى شەكتەۋ جونىندە ۇسىنىس بىلدىرگەن ەدى. بۇدان باسقا, ول «كاۆكازدى تىكەنەك سىممەن شەكتەۋ» جولىمەن كاۆكازدىقتاردىڭ ەركىن قوزعالىسىنا تىيىم سالۋدى دا ۇسىنعان بولاتىن.
لدرپ كوسەمىنىڭ بۇل مالىمدەمەسى سولتۇستىك كاۆكاز رەسپۋبليكالارى حالىقتارىنىڭ قاتتى اشۋ-ىزاسىن تۋعىزدى. سونىڭ ىشىندە شەشەندەر ەرەكشە اشىندى. سونىڭ ءبىر بەلگىسى رەتىندە سول كۇنى-اق لدرپ-نىڭ رەسپۋبليكاداعى ۇيىمى ءوزىن ءوزى تاراتۋ جونىندە شەشىم قابىلدادى.
مۇرات ايتقوجا.
