وقيعا • 25 قىركۇيەك، 2020

ەلوردادا پاندەمياعا قاتىستى حالىقارالىق ونلاين-كونفەرەنتسيا ءوتتى

44 رەت كورسەتىلدى

بيىلعى جىلدىڭ 24 قىركۇيەگىندە نۇر-سۇلتان قالاسىندا كونفەسسياارالىق جانە وركەنيەتارالىق ديالوگتى دامىتۋ جونىندەگى نۇرسۇلتان نازارباەۆ ورتالىعىنىڭ باستاماسىمەن "پاندەميا جاعدايىنداعى  كونفەسسياارالىق جانە وركەنيەتارالىق ديالوگ" تاقىرىبىندا حالىقارالىق ونلاين-كونفەرەنتسيا ءوتتى، دەپ حابارلايدى Egemen.kz

حالىقارالىق ونلاين-كونفەرەنتسياعا قازاقستان رەسپۋبليكاسىنىڭ اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ;

يسلام الەمى ليگاسىنىڭ وكىلى، حالىقارالىق كومەك، قولداۋ جانە دامۋ ۇيىمىنىڭ باس حاتشىسىنىڭ كەڭەسشىسى ابدۋل ازيز بەن احمات سارحان;

حالىقارالىق مادەني ديپلوماتيا ينستيتۋتىنىڭ ء(باا) باسقارما توراعاسى مۇحاممەد ءال-مۋايني;

قاسيەتتى پرەستولدىڭ دىنارالىق ديالوگ جونىندەگى پاپا كەڭەسىنىڭ يسلاممەن بايلانىس ءبولىمىنىڭ مەڭگەرۋشىسى (ۆاتيكان) حالەد اكاشە;

يسلام تاريحى، ونەرى جانە مادەنيەتى عىلىمي ورتالىعىنىڭ باس ديرەكتورى (تۇركيا) حاليت ەرەن;

يسلاماباد حالىقارالىق يسلام ۋنيۆەرسيتەتى يسلامدى زەرتتەۋ ينستيتۋتىنىڭ باس ديرەكتورى (پاكىستان) مۇحامماد زيا ۋل-حاك;

Image India ينستيتۋتىنىڭ نەگىزىن قالاۋشى جانە پرەزيدەنتى ء(ۇندىستان) روبيندەر ساچدەۆ;

عىلىمي زەرتتەۋلەر جانە تاجىريبە الماسۋ ورتالىعىنىڭ عىلىمي قىزمەتكەرى، Riyadh News گازەتىنىڭ شولۋشىسى، (KSA، ەر-رياد) الي ال-حۋشايبان;

يسلام ىنتىماقتاستىق ۇيىمىنىڭ ەۋروپا وداعى جانىنداعى ميسسياسىنىڭ تۇراقتى باقىلاۋشىسى، ەلشى (بەلگيا) دجاحان يسمات;

كاۆكاز مۇسىلماندارى باسقارماسى ءبولىمىنىڭ مەڭگەرۋشىسى ء(ازىربايجان) باباەۆ گيۋندۋز;

ەۋرازياداعى BBC World News كوممەرتسيالىق كەڭسەسىنىڭ جەتەكشىسى ( ۇلىبريتانيا) سەرگەي ستانوۆكين، سونىمەن قاتار، باسقا دا حالىقارالىق ساراپشىلار مەن ءدىني بىرلەستىك وكىلدەرى، عىلىمي ساراپشىلار قاۋىمداستىعى وكىلى قاتىستى.

كونفەرەنتسيا بارىسىندا قاتىسۋشىلار جالپى ادامي قۇندىلىقتاردى نىعايتۋعا، پاندەميا جاعدايىندا بىتىمگەرشىلىك، تولەرانتتىلىق، بەيبىتشىلىك پەن كەلىسىم يدەيالارىن ىلگەرىلەتۋگە باعىتتالعان كونفەسسياارالىق ديالوگتى دامىتۋدىڭ وزەكتى ماسەلەلەرىن تالقىلادى.

كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىنىڭ باسقارما توراعاسى كونفەرەنتسيا العىسوزىن الەمدەگى ءاربىر ادامنىڭ ءومىر سالتىنا اسەر ەتكەن پاندەميا فاكتورلارى مەن قوعام كەلبەتىنىڭ وزگەرىستەرىنەن باستادى.

"بۇگىنگى كۇنى پاندەميا سالدارىنان الەمدە ءولىم-ءجىتىم كوبەيگەنى وتىرىك ەمەس، مەديتسينالىق مەكەمەلەر مەن الەۋمەتتىك نىسانداردىڭ جۇمىسى ۇلعايدى، حالىقارالىق ءىس-شارالاردىڭ بارلىعى دەرلىك كەيىنگە شەگەرىلدى. الايدا، قازىرگى جاعدايلارعا قاراماستان، ءبىز مەملەكەت باسشىسى ق.توقاەۆتىڭ بەلسەندى قولداۋىمەن، نەگىزگى ميسسيامىزدى جالعاستىرۋدامىز. مەملەكەت باسشىسى قاسىم-جومارت توقاەۆتىڭ بۇۇ-نىڭ 75 جىلدىعىنا ارنالعان جوعارى دەڭگەيدەگى ءىس-شارادا سويلەگەن سوزىندە كونفەسسياارالىق جانە وركەنيەتارالىق ديالوگتى دامىتۋدىڭ ەرەكشە ماڭىزىن اتاپ ءوتتى.  سونىمەن قاتار 14 مامىرداعى جالپىعا بىردەي دۇعا ەتۋ كۇنى – ءبارىمىز ءۇشىن وتە ماڭىزدى بولدى. سەبەبى بۇل پاندەميا ءداۋىرىن، گۋمانيتارلىق ماسەلەلەر مەن ەكونوميكالىق قاۋىپتى ءبىز تەك بىرلىك، ۇلتارالىق تاتۋلىق، جاسامپازدىق قاسيەتتەرى ارقىلى عانا ەڭسەرۋگە بولاتىنىنا تاعى ءبىر مارتە كوز جەتكىزدىك. بۇگىنگى كۇنى تەڭدىك، ءوزارا سىيلاستىق جانە ءبىر-ءبىرىنىڭ مۇددەلەرىن سىيلاۋ، ىنتىماقتاستىق، توزىمدىلىك پەن تۇسىنىستىك قاعيداتتارىنا نەگىزدەلگەن قاۋىپسىزدىك پەن دامۋدىڭ جاڭا پاراديگماسىن دامىتۋ بويىنشا كەڭ ديالوگ قۇرۋ اسا ماڭىزدى"، دەدى التاي ابيبۋللاەۆ.

اقپارات جانە قوعامدىق دامۋ ۆيتسە-ءمينيسترى مارات ءازىلحانوۆ ءوز سوزىندە ءدىني بىرلەستىكتەر مەن ازاماتتىق قوعام ءبىرتۇتاس بولۋى كەرەك ەكەنىن، الەمدى جاۋلاعان دەرت كەزىندە، قاۋىپ-قاتەر مەن قورقىنىشتى تەك بىرلىك، تولەرانتتىلىق،  اۋىزبىرشىلىك قاسيەتتەر ارقىلى جەڭۋگە بولاتىنىن العا تارتتى.

يسلام الەمى ليگاسىنىڭ وكىلى، حالىقارالىق كومەك، قولداۋ جانە دامۋ ۇيىمىنىڭ باس حاتشىسىنىڭ كەڭەسشىسى ابدۋل ازيز بەن احمات سارحان ءوز سوزىندە الەمدەگى كونفەسسياارالىق ديالوگتى ودان ءارى نىعايتۋدىڭ بىرنەشە ماڭىزىن اتاپ ءوتتى.

"پاندەميا جاعدايىنداعى قيىن كەزەڭ حالىقارالىق كەلىسسوز بەن وركەنيەتتى ديالوگتى نىعايتۋ جانە دىندەر اراسىندا بايلانىس ورناتۋ ءۇشىن كۇش پەن ىنتىماقتاستىقتى قاجەت ەتەتىنى بەلگىلى. ويتكەنى بۇل دىندەر مەن جوعارى ادامي قۇندىلىقتاردى ماداقتاپ، قالىپتى ديسكۋرستى قالىپتاستىرۋدىڭ ءتيىمدى قۇرالدارىنىڭ ءبىرى"، دەدى ول بايانداماسىندا.

سونداي-اق ءوز كەزەگىندە حالىقارالىق مادەني ديپلوماتيا ينستيتۋتىنىڭ ء(باا) باسقارما توراعاسى مۇحاممەد ءال-مۋايني: ء"بىز مادەني قۇندىلىعى كەڭ ۇعىمدا قالىپتاسقان قازاقستانعا ۇقساس ەلدە تۇرامىز. قازاقستان رەسپۋبليكاسىنىڭ تۇڭعىش پرەزيدەنتىنىڭ ەسىمى بەرىلگەن كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىنىڭ قۇرىلۋى - دىنارالىق كەلىسىمنىڭ دالەلى"، دەپ ويىن قورىتىندىلادى.

قازاقستان مۇسىلماندارى ءدىني باسقارماسى (قمدب) توراعاسىنىڭ ورىنباسارى نايب-يمام ەرشات وڭعاروۆ ونلاين-كونفەرەنتسيادا سويلەگەن سوزىندە: "بۇگىندە كوروناۆيرۋستىڭ سالدارى بۇكىل الەم قاۋىمداستىعىن الاڭداتادى. وسىنداي ەكونوميكالىق داعدارىس پەن الەۋمەتتىك شيەلەنىستىڭ قيىن كەزەڭىندە تۇراقتىلىق پەن ىنتىماقتاستىقتى ساقتاۋ – ماڭىزدى مىندەتتەردىڭ ءبىرى"، دەدى.

قورىتىندىلاي كەلە، الەم قاۋىمداستىعى ءۇشىن وسىنداي كۇردەلى كەزەڭدە كونفەسسياارالىق بىرلىكتى ساقتاۋدىڭ ماڭىزدى بولىگى – دىندەر ديالوگىن ودان ءارى ءتيىمدى دامىتۋ، قوعام مەن مەملەكەتتىڭ كۇش-جىگەرىن بىرىكتىرۋ بولىپ تابىلادى.

حالىقارالىق ساراپشىلار الەمدەگى تولەرانتتىلىق، كەلىسىم، بىتىمگەرشىلىك، دىنارالىق كەلىسىم مەن تۇراقتىلىق يدەيالارىن ىلگەرىلەتۋدە كونفەسسياارالىق جانە وركەنيەتارالىق ديالوگتى دامىتۋ جونىندەگى نۇرسۇلتان نازارباەۆ ورتالىعىنىڭ جوعارى ءرولىن اتاپ ءوتتى.

سوڭعى جاڭالىقتار

ۇقساس جاڭالىقتار