ءبىلىم • 25 قىركۇيەك، 2020

قازۇۋ "تسيۋريح ۋنيۆەرسيتەتىمەن" ىنتىماقتاستىق ورناتادى

14 رەت كورسەتىلدى

قازاقستاننىڭ شۆەيتسارياداعى ەلشىسى الىبەك باقاەۆ جانە شۆەيتساريانىڭ جەتەكشى جوعارى وقۋ ورنىنىڭ ءبىرى "تسيۋريح ۋنيۆەرسيتەتىنىڭ" پرەزيدەنتى پروفەسسور ميحاەل شەپمانن ەكى جوعارى وقۋ ورنىنىڭ اراسىنداعى ىنتىماقتاستىق تۋرالى مەموراندۋمعا قول قويۋ ارقىلى ءال-فارابي اتىنداعى قازۇۋ مەن "تسيۋريح ۋنيۆەرسيتەتىنىڭ" اراسىندا تىكەلەي ىنتىماقتاستىق ورناتۋ تۋرالى ۋاعدالاستى، دەپ حابارلايدى Egemen.kz.

بۇل شارا عىلىم سالاسىندا ىنتىماقتاسۋ مۇمكىندىگىنە، ستۋدەنتتەرمەن جانە پروفەسسورلىق-وقىتۋشىلىق قۇراممەن الماسۋعا، سونداي-اق بىرلەسكەن ءىس-شارالار دا جۇزەگە اسىرۋعا جول اشادى.

سونىمەن قاتار، "تسيۋريح ۋنيۆەرسيتەتىمەن" بىرلەسىپ ەكى جوعارى وقۋ ورنىنىڭ رەكتورلارىنىڭ قاتىسۋىمەن ۇلى ويشىلى ءابۋ-ناسىر ءال-ءفارابيدىڭ 1150 جىلدىق مەرەيتويى شەڭبەرىندە ۇلى فيلوسوفتىڭ ەۋروپا عىلىمى مەن مادەنيەتىنە قوسقان ۇلەسىنە ارنالعان حالىقارالىق ءدارىس وتكىزۋ تۋرالى ۋاعدالاستىققا قول جەتكىزىلدى.

ەلشى تاياۋدا بولون پروتسەسى حاتشىلىعىنىڭ شەشىمىمەن قازاقستاننىڭ جوعارى وقۋ ورىندارى ديپلومدارىنىڭ ەۋروپادا رەسمي تۇردە مويىندالاتىنىن اتاپ ءوتتى. "بۇل ەكى جەتەكشى ۋنيۆەرسيتەتتەردىڭ اراسىندا ارىپتەستىكتى جولعا قويۋ ءۇشىن جاقسى باستاما"، دەدى ول. ءوز كەزەگىندە ميحاەل شەپمانن "تسيۋريح ۋنيۆەرسيتەتىنىڭ" قازاقستاننىڭ جەتەكشى وقۋ ورنىمەن ىنتىماقتاستىعىنىڭ جولعا قويىلۋىن قولدايتىنىن ءبىلدىردى.

ايتا كەتەيىك، "تسيۋريح ۋنيۆەرسيتەتى" ەڭ تانىمال QS World University Ranking حالىقارالىق رەيتينگىندە 69 ورىندى يەلەنەدى جانە الەمنىڭ ۇزدىك 100 ۋنيۆەرسيتەتىنىڭ توبىنا كىرەدى. ءال-فارابي اتىنداعى قازۇۋ جاقىندا وسى رەيتينگتە 165 پوزيتسياعا يە بولىپ، ۇزدىك ۋنيۆەرسيتەتتەردىڭ 200-دىگىنە كىردى.

بۇل كەزدەسۋ ءىرى قازاقستاندىق جانە شۆەيتساريالىق ۋنيۆەرسيتەتتەر اراسىنداعى ىنتىماقتاستىقتى كەڭەيتۋگە جاقسى نەگىز سالدى.

سوڭعى جاڭالىقتار

ۇقساس جاڭالىقتار