الەم • 25 قىركۇيەك، 2020

COVID-19: كۇزدەگى كۇرەس قيىن بولماق

71 رەت كورسەتىلدى

ءۇندىستان ىندەتتىڭ تارالۋ كور­سەت­كى­شى بويىنشا الەمدە ەكىنشى ورىنعا شىقتى. پاندەميا باستالعالى 5 732 518 ۇندىستاندىق COVID-19 جۇق­تى­رىپ، 91 149 ادام اجال قۇشقان.

ءۇندىستان دەنساۋلىق ساقتاۋ مينيسترلىگىنىڭ ءباسپاسوز قىزمەتى ءبىر تاۋلىكتە 86 508 ادام ۆيرۋس جۇقتىرىپ، 1129 ازاماتتىڭ كوز جۇمعانىن حابارلادى. قازىر 966 382 ادام اۋرۋمەن ارپالىسىپ جاتىر.

 

جاپونيا ەڭبەك مينيسترلىگى COVID-19 ىندەتىنىڭ كەسىرىنەن 60 مىڭ­نان اسا جاپوندىق جۇمىسسىز قال­عا­نىن مالىمدەدى.

2020 جىلى قاڭتاردىڭ سوڭىنان قازىرگە دەيىن 60 439 ادام جۇمىسسىزدار قاتارىن تولىقتىرعان. مينيسترلىك بۇل كورسەتكىشتىڭ ودان دا جوعارى بولۋى مۇمكىن ەكەنىن جوققا شىعارماپتى.

جۇمىسسىزدىقتىڭ بەلەڭ الۋى­نا قارسى ءىس-شارالار قاراستىرىپ جاتقان ەلدىڭ ەڭبەك مينيسترلىگى پاندەميا كەسىرىنەن ءوندىرىسىن توقتاتقان كاسىپورىندارعا مەملەكەتتەن سۋبسيديا الۋ ءۇشىن ءوتىنىش بەرۋگە بولاتىنىن ايتتى.

 * * *

COVID-19 ىندەتى پاركينسون اۋرۋى­نا شالدىعۋدى ارتتىرۋى مۇمكىن. اۋسترا­ليالىق عالىمدار وسىنداي بول­جام جاساپ وتىر.

ماماندار بۇل ۆيرۋستىڭ ادام ميىن زاقىمدايتىن پاتوگەندىك قالىبى بار دەپ ەسەپتەيدى. زەرتتەۋ اۆتور­لا­رى­نىڭ ءبىرى كەۆين بارنحەم كوروناۆيرۋس ينفەكتسياسىنىڭ ميعا اسەرىنىڭ نەيرودەگەنەراتسياعا اكەلەتىنى پاندەميا­دان كەيىن ناقتى بەلگىلى بولاتىنىن، الاي­دا پاركينسون اۋرۋى كوبەيەتىنى انىق ەكەنىن العا تارتقان.

 * * *

كانادا پرەمەر-ءمينيسترى دجاستين تريۋدو كوروناۆيرۋس ينفەكتسياسىنىڭ ەكىنشى تولقىنى كەلگەنىن مالىمدەدى.

«ەلدىڭ ءتورت پروۆينتسياسىندا ەكىنشى تولقىن ءورشىپ تۇر» دەگەن ول قايتا سوققان داۋىلدان قاتتى قاۋىپتەنىپ وتىر. سوندىقتان پرەمەر-مينيستر ۆيرۋستى كۇشەيتپەۋ كانادالىقتاردىڭ وزىنە بايلانىستى ەكەنىن ايتىپ، ماۋسىمدىق تۇماۋعا قارسى ەكپە الىپ، ۇدايى الەۋ­مەت­تىك قاشىقتىقتى ساقتاپ، ماسكا تاعىپ جۇرۋگە شاقىردى.

 * * *

چيليدە ءبىر كۇندە 1372 ادام ىندەت جۇق­تىرىپ، ەلدە اۋىرعاندار سانى 449 903 بولدى.

ەلدىڭ دەنساۋلىق ساقتاۋ مينيسترلىگى 907 ادام اۋرۋحانالاردىڭ جانساقتاۋ بولىمىندە دارىگەرلەردىڭ كۇنى-ءتۇنى قاداعالاۋىندا ەكەنىن حابارلاعان. ال 680 پاتسيەنت جاساندى تىنىس الۋ اپپاراتىنا قوسىلسا، 121 ناۋقاستىڭ ءحالى وتە اۋىر. وسىعان دەيىن ىندەتتەن 12 345 چيلي ازاماتىنىڭ ءومىرى قيىلسا، كەشە تاعى 24 پاتسيەنتتىڭ تىنىسى توقتاعان.

* * *

COVID-19 ىندەتىنە قارسى جاڭا ۆاكتسينا سىناعىنا قاتىسۋعا 2 مىڭ ۇلىبريتانيالىق ەرىكتى كەلىسىمىن بەرگەن.

Financial Times باسىلىمى حابار­لا­عان­­داي، ۆاكتسينانى تاجىريبەدەن وتكىزۋ بارىسىندا ەرىكتىلەر اعزاسىنا ادەيى ۆيرۋس جىبەرىلىپ، ۆاكتسينانىڭ اسەرى تەك­سە­رىلەدى. سونداي-اق ءبىر ايدان سوڭ تاعى دا ۆاكتسينا ەگىلەدى دەگەن شەشىم بار. تاجىريبە 2021 جىلدىڭ باسىندا لوندون كورولدىك كوللەدجى مەن hVIVO زەرتتەۋ توبىنىڭ قاتىسۋىمەن جۇرگىزىلەدى دەپ ۇيعارىلعان. الايدا بۇل ۇلىبريتانيا بيلىگى مەن ەتيكا جونىندەگى تاۋەلسىز كو­مي­تەت­تىڭ رۇقساتىن العاندا عانا مۇم­كىن بولادى.

 * * *

سلوۆەنيا ۇكىمەتى دە ۆيرۋستىڭ قار­قىن­دى تارالۋىن ەسكەرىپ، ەكىنشى تول­قىن باستالعانىن حابارلادى.

23 قىركۇيەكتە سلوۆەنيادا 2616 ادامنان الىنعان تەستتەن جاڭادان 136 اۋرۋ جۇقتىرۋ فاكتىسى تىركەلدى. ال بۇدان بۇرىن 2335 تەستتەن 88 عانا ۆيرۋس انىقتالعان-دى. ۇكىمەتتىڭ ءباسپاسوز حاتشىسى بويانا بەوۆيچ جازداعىداي ەمەس، ادامداردىڭ جابىق عيماراتتاردىڭ ىشىندە كوبىرەك بولۋى اۋرۋ تارالۋىن جيىلەتكەنىن ايتقان.

 * * *

El Periodico گازەتى كاتالونيادا 6 ادامنان ارتىق جينالۋعا بولمايتىنىن جازدى.

وسىعان دەيىن كاتالونيادا 10 ادامعا دەيىن توپتاسۋعا رۇقسات بەرىلسە، ەندى ول 4 ادامعا قىسقارعان. سونداي-اق باشا-سەردانيا اۋدانى تۇرعىندارىنا اسا ءبىر مۇقتاجدىق تۋماسا، ۇيلەرىنەن شىقپاۋعا كەڭەس بەرىلگەن. بۇدان بۇرىن ەل استاناسى ءمادريدتىڭ تۇرمىسى تومەن، نەگىزىنەن ميگرانتتار تۇراتىن 6 اۋدانىندا كارانتين جاريالاندى.

 

 

سوڭعى جاڭالىقتار

ۇقساس جاڭالىقتار