بۇل شارا ەلىمىزدىڭ ونەركاسىپتىك كاسىپورىندارىنا يندۋستريا 4.0 نەگىزگى تەحنولوگيالارى مەن تاقىرىپتارى بويىنشا ءبىلىم ترانسفەرىن جۇزەگە اسىرۋعا مۇمكىندىك بەرەدى.
– بۇگىنگى تاڭدا يندۋستريا 4.0 – قۇبىلمالى جاعدايلارعا بەيىمدەلۋدىڭ پارمەندى ءتاسىلى جانە باسەكەلەستىك كۇرەستە امان قالۋ قۇرالى. يندۋستريا جانە ينفراقۇرىلىمدىق دامۋ مينيسترلىگى كاسىپورىنداردىڭ تسيفرلىق جاڭعىرۋعا قاتىستى باستامالارىن بەلسەندى قولدايدى. بىلتىر «QazIndustry» ورتالىعىمەن بىرلەسىپ 102 وڭىرلىك ونەركاسىپتىك كاسىپورىنعا وندىرىستە يندۋستريا 4.0 ەلەمەنتتەرىن ەنگىزۋ ستراتەگياسىنىڭ ادىستەمەسىن جاسادى. وسى ساياساتتى جالعاستىرا وتىرىپ, ءبىز بيىل فراۋنگوفەر اتىنداعى ونەركاسىپتىك ينجەنەريا جانە اۆتوماتتاندىرۋ ينستيتۋتىنىڭ نەمىس سەرىكتەستەرىمەن بىرگە ۆەبينارلار سەرياسىن وتكىزۋدەمىز, – دەپ اتاپ ءوتتى مينيسترلىكتىڭ يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ توراعاسى مارات قاراباەۆ.
«QazIndustry» يندۋستريا جانە ەكسپورت ورتالىعى» اق يندۋستريا 4.0 ورتالىعىنىڭ ديرەكتورى تاڭگۇل ابدىرازاقوۆانىڭ ايتۋىنشا, تسيفرلاندىرۋ تاقىرىبى بويىنشا اۋقىمدى وقىتۋعا كاسىپورىندار عانا ەمەس, دامۋ ينستيتۋتتارىنىڭ, IT-كومپانيالارىنىڭ, مەملەكەتتىك ورگانداردىڭ, ءتۇرلى جوو مەن عزي وكىلدەرى دە قاتىسۋدا.
– وقىتۋ باعدارلاماسى 4 مودۋلدەن تۇرادى, ونىڭ ىشىندە تسيفرلى ءوندىرىستى جانە كيبەرفيزيكالىق جۇيەلەردى باقىلاۋ, دەرەكتەر نەگىزىندە ءوندىرىستى وڭتايلاندىرۋ, سمارت-قىزمەت كورسەتۋ قامتىلدى. ءاربىر مودۋل ينتەراكتيۆتى سەمينارلار فورماتىندا وتەدى, وندا ساراپشىلار ەكونوميكانىڭ ءتۇرلى سەكتورلارىنداعى تابىستى كەيستەر تۋرالى اڭگى-
مەلەيدى. مىسالى, بۇگىن قاتىسۋشىلار پروتسەستەردى تسيفرلاندىرۋ, قىزمەتكەرلەردىڭ بىلىكتىلىگىن ارتتىرۋ, كايدزەن جانە Lean تەحنولوگيالارىن ەنگىزۋ بويىنشا پراكتيكالىق كەيستەرمەن جانە مودەلدەرمەن تانىستى, – دەدى ول.
سەميناردا فراۋنگوفەر IPA اتىنداعى ماشينا جاساۋ جانە اۆتوماتتاندىرۋ ينستيتۋتىنىڭ عىلىمي قىزمەتكەرى جانە جوبا جەتەكشىسى بۋمين حاتيبوگلۋ تسيفرلاندىرۋ ءومىردىڭ بارلىق اسپەكتىلەرىن قالاي وزگەرتەتىنىن ايتىپ بەردى.
– تەحنولوگيالار مەن ءبىلىم بازاسىنىڭ كومەگىمەن ءار پروتسەستى مودەلدەۋگە جانە ونىڭ ناتيجەسىن الدىن-الا بولجاۋعا بولادى. مىسالى, يندۋستريا 4.0-ءدىڭ الەۋەتى زور, كاسىپورىندار ءوز تيىمدىلىگىن دامۋ دەڭگەيىنە بايلانىستى 30-50%-عا دەيىن ارتتىرا الادى. اتاپ ايتقاندا, پايدالانۋ شىعىندارىن 30%-عا, ساپا شىعىندارىن – 20%-عا دەيىن, اقاۋلاردى جويۋ شىعىندارىن – 70%-عا, ءوندىرىس پەن لوگيستيكا شىعىندارىن 20%-عا دەيىن تومەندەتۋگە بولادى, – دەپ اتاپ ءوتتى ول.
يندۋستريا 4.0 بويىنشا ۆەبينارلار 5 قاراشاعا دەيىن جالعاسادى, وعان قاتىسۋشىلار وزدەرىن الاڭداتقان ساۋالداردىڭ جاۋابىن ىزدەيدى, ونلاين رەجىمدە نەمىس ساراپشىلارىمەن وزەكتى ماسەلەلەردى تالقىلايدى.
ايتا كەتەيىك, «QazIndustry» يندۋستريا جانە ەكسپورت ورتالىعى» اق 2017 جىلدان باستاپ ونەركاسىپتىك كاسىپورىنداردى تسيفرلاندىرۋ جۇمىسىن جۇرگىزۋدە. فراۋنگوفەر IPA كومەگىمەن كاسىپورىندار بازاسىندا قاناتقاقتى مودەلدىك تسيفرلى فابريكالار قۇرىلدى. وسىلايشا 7 كاسىپورىن 13 ملرد تەڭگەدەن استام ينۆەستيتسياعا 51 جوبانى ىسكە اسىرادى. ينۆەستيتسيانىڭ 600 ملن تەڭگەسى مەملەكەتتىك قولداۋ قاراجاتىن قۇرايدى. ەنگىزىلگەن جوبالاردىڭ ناتيجەسىندە كاسىپورىندار ەڭبەك ونىمدىلىگىن 25%-عا, رەسۋرس تيىمدىلىگىن 18%-عا ارتتىرۋعا, جابدىقتىڭ قىزمەت ەتۋ مەرزىمىن 5%-عا ۇزارتۋعا, وندىرىستىك شىعىنداردى 20%-عا, ەڭبەك شىعىندارىن 30%-عا جانە ەنەرگيا شىعىندارىن 35%-عا ازايتۋعا قول جەتكىزدى.
