ەكونوميكا • 24 قىركۇيەك، 2020

كاسىپكەرلىكتىڭ زارداپ شەككەن سالالارى قالپىنا كەلە مە؟

71 رەت كورسەتىلدى

«اتامەكەن» قر ۇلتتىق كاسىپكەرلەر پالاتاسىنىڭ تورالقا توراعاسى تيمۋر ق ۇلىباەۆتىڭ وڭىرلىك كەڭەستەردىڭ جاڭا مۇشەلەرىمەن كەزدەسۋلەرىندە كوپتەگەن ماسەلەلەر كوتەرىلدى، دەپ حابارلايدى Egemen.kz.

وعان قازاقستاننىڭ تۇپكىر-تۇپكىرىنەن 463 كاسىپكەر قاتىستى. ماسەلەلەر اۋقىمى كەڭ بولدى، وسى رەتتە كەلەسى تاقىرىپتار: پاندەميادان كەيىن بيزنەستى قولداۋ جانە قالپىنا كەلتىرۋ شارالارى، اوك سالاسى، جەر قويناۋىن پايدالانۋشىلار جانە «سامۇرىق-قازىنا» اق ساتىپ الۋلارىنا قاتىستى ماسەلەلەر، جەرگىلىكتى قامتۋدى دامىتۋ، ۋتيليزاتسيالىق الىم ماسەلەلەرى، سالىق سالۋ جانە مەنشىكتى نارىقتى قورعاۋ بويىنشا ماسەلەلەر جيىرەك كوتەرىلدى.

«وڭىرلەرمەن كەزدەسۋلەر وتكىزۋ جيىلىگى كاسىپكەرلەر – سىزدەرمەن «كەرى بايلانىس» ورناتۋدىڭ ماڭىزدىلىعىن كورسەتتى. وڭىرلىك بيزنەسپەن اعىمداعى جىلدا العاشقى كەزدەسۋ ناتيجەسى بويىنشا ماسەلەلەر جيىنى پرەمەر-مينيستر دەڭگەيىندە قارالدى. سونىڭ ناتيجەسىندە 84 تۇيتكىلدى ماسەلە ىشىندە 41 ماسەلە شەشىمىن تاپتى، قالعانى مەملەكەتتىك ورگاندار، ۇلتتىق كومپانيالار جانە جەرگىلىكتى اتقارۋشى ورگانداردىڭ بىرلەسۋىمەن شەشىلۋ دەڭگەيىندە. بيزنەس وكىلدەرىمەن ونلاين-كەزدەسۋلەر فورماتى تۇراقتى وتكىزىلەتىن بولادى»، – دەدى تيمۋر ق ۇلىباەۆ.

قازاقستاننىڭ ءتۇرلى وڭىرىنەن كاسىپكەرلەر  بيزنەستى قالپىنا كەلتىرۋگە كەدەرگى كەلتىرەتىن ماسەلەلەردى ايتتى.

ماڭعىستاۋ وبلىسى وڭىرلىك كەڭەسىنىڭ توراعاسى ەدىل جاڭبىرشين ءسوز الىپ، وبلىستا 2019 جىلى 52 577 شاعىن جانە ورتا كاسىپكەرلىك سۋبەكتىسى بار. كارانتين كەزىندە 300-دەي كاسىپورىن قىسقارىپ، 3 مىڭداي ادام جۇمىسسىز قالعانىن تىلگە تيەك ەتتى. سونان سوڭ وڭىردە قۇرىلىستىڭ قارقىن الىپ، دەموگرافيانىڭ ءوسۋى، جاڭا بيزنەس نىساندارىنىڭ اشىلۋىنان اۋىز سۋ تاپشىلىعى تۋىنداعانىن ايتتى.

«ماڭعىستاۋ وبلىسىندا نەگىزگى پروبلەما- اۋىز سۋ. وبلىستا تاۋلىگىنە 131 مىڭ تەكشە مەتر اۋىز سۋ تۇتىنادى. تاۋلىگىنە تاعى 40 مىڭ تەكشە مەتر جەتپەيدى. ءبىزدىڭ ۇسىنىسىمىز- ماڭعىستاۋ وبلىسىن 2024 جىلعا دەيىن اۋىز سۋمەن قامتۋعا ارنالعان كەشەندى مەملەكەتتىك دامۋ باعدارلاماسى جاساقتالۋى كەرەك. ول ءۇشىن وڭىردەگى اۋىز سۋ قورىن زەرتتەۋ قاجەت. بىزدە ءىرى ءۇش سۋ كەن ورنى بار. ولار-توڭىرەكشىڭ، اقسۋ-بوزاششى جانە قۇيىلىس. وسىلاردا سۋ قورىن مولايتۋ جۇمىستارىن قولعا الۋ، «ماەك-قازاتومپروم» كاسىپورنىنىڭ، «كاسپي» سۋ تۇششىتۋ زاۋىتىنىڭ ءىسىن جولعا قويۋ، كەندىرلى مەن بەينەۋ اۋدانىندا سۋ تۇششىتۋ زاۋىتتارىن سالۋ قاجەت»،- دەدى ەدىل تەرەكباي ۇلى.  

ال، الماتىلىق كاسىپكەرلەر بيزنەستىڭ جەكەلەگەن تۇرلەرى ءالى جۇمىس باستاماعانىن، ولار تج جانە كارانتين كەزەڭىندە ەكونوميكانىڭ زارداپ شەككەن سالالارى (مەكتەپتەگى اسحانالار، بوۋلينگ، بيليارد، كاراوكە، كومپيۋتەر كلۋبتارى جانە باسقالار) قاتارىندا ەمەستىگىن ايتتى.

«بانكەت وتكىزۋ قىزمەتىن اۋقىمدى دامىتۋ ماسەلەسى بويىنشا قوعام پىكىرى ەكىگە بولىنگەنىن بىلەمىز. الايدا وسى سالادا جۇمىس ىستەيتىن كاسىپكەرلەر قارجىلىق قيىندىققا تاپ بولدى. ۇجىمدار، نەسيەلەر بويىنشا مىندەتتەمەلەر بار. مىنە التى اي بولدى ءوز باعىتىڭ بويىنشا جۇمىس ىستەۋگە بولمايدى، ال قىزمەت ءتۇرىن وزگەرتۋ ءۇشىن قوسىمشا نەسيەنى ەندى بەرمەيدى. م ۇلىككە ارەست قويعانىن، ساتۋعا شىعارعانىن كۇتۋ عانا قالدى. كاسىپكەرلەردىڭ وسى ساناتىنا كورسەتىلگەن داعدارىسقا قارسى شارالار  ازدىق ەتەدى»، – دەپ اتاپ ءوتتى «قوعامدىق تاماقتانۋ كاسىپورىندارىنىڭ قاۋىمداستىعى» زتب جەتەكشىسى ليانا تۇرسىنوۆا.

«اتامەكەن» ۇلتتىق كاسىپكەرلەر پالاتاسىنىڭ وكىلدەرى كارانتين كەزىندە اناعۇرلىم زارداپ شەككەن سالالارداعى كاسىپكەرلەردى قولداۋ ماقساتىندا قولعا الىناتىن قوسىمشا شارالار جوسپارىن ازىرلەۋ مەن تولىقتىرۋعا قاتىسىپ جاتىر. بۇل جوسپارعا شاعىن جانە ورتا بيزنەس سۋبەكتىلەرى ءۇشىن سالىق پەن الەۋمەتتىك تولەمدەردى بيىل جىل سوڭىنا دەيىن كەيىن شەگەرۋ، شاعىن جانە ورتا كاسىپكەرلەردىڭ تولەم مەرزىمى كەيىنگە شەگەرىلگەن نەسيەسىنە وسى ۋاقىت ارالىعىندا ءوسىمپۇل سالماۋ، شاعىن جانە ورتا بيزنەس سۋبەكتىلەرىن 2020 جىلدىڭ سوڭىنا دەيىن مەملەكەتتىك جانە كۆازيمەملەكەتتىك نىسانداردى جالعا الۋ اقىسىنان بوساتۋ ەنگەن.

كارانتين كەزىندە قىزمەتى شەكتەلگەن كاسىپورىنداردىڭ كوممۋنالدىق قىزمەت اقىسىن تولەۋ ماسەلەسى ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيانىڭ كەزەكتى وتىرىسىندا تالقىعا سالىنباق. سونداي-اق، «اتامەكەن» ۇكپ ساراپشىلارى قر پرەزيدەنتى ق.توقاەۆ 2020 جىلعى 1 قىركۇيەكتەگى جولداۋىندا جاريا ەتكەن پايىزدىق مولشەرلەمەنى سۋبسيديالاۋ شارتتارىن ازىرلەۋ جونىندەگى جۇمىس توبىنىڭ قۇرامىندا بار.

«4 مامىر كۇنى وڭىرلەردەگى بيزنەس وكىلدەرىمەن وتكەن كەزدەسۋ بارىسىندا كوتەرىلگەن 84 ماسەلەنىڭ 41-ءى شەشىمىن تاۋىپ، قالعاندارىن جەرگىلىكتى اتقارۋشى بيلىك، مەمورگاندار جانە ۇلتتىق كومپانيالارمەن بىرلەسە وتىرىپ، قاراستىرىپ جاتىرمىز. بۇگىنگى كۇنى بيزنەس وكىلدەرى ايتىپ وتكەن وزەكتى ماسەلەلەر دە ءدال وسىلاي شەشىمىن تابادى. سىزدەردىڭ ۇسىنىستارىڭىزدىڭ بىرقاتارى كارانتيننەن نەعۇرلىم زارداپ شەككەن سالالارداعى كاسىپكەرلەردى قوسىمشا قولداۋ جوسپارىنا ەنگىزىلەدى، ءبىر بولىگىن الداعى ۋاقىتتا جان-جاقتى تالداي وتىرىپ، جوسپارعا كىرگىزەمىز»، – دەپ اتاپ ءوتتى «اتامەكەن» ۇكپ تورالقا توراعاسى تيمۋر ق ۇلىباەۆ.

سوڭعى جاڭالىقتار

ۇقساس جاڭالىقتار