ايماقتار • 24 قىركۇيەك، 2020

دۇرىس ساقتاي الماعاننىڭ قارۋى الىندى

7 رەت كورسەتىلدى

سولتۇستىك قازاقستان وبلىسىندا "قارۋ" جەدەل-پروفيلاكتيكالىق ءىس-شاراسى وتۋدە، ونىڭ اياسىندا قارۋ يەلەرىنىڭ مىلتىقتى قاۋىپسىز ساقتاۋ تالاپتارى تەكسەرىلدى، دەپ حابارلايدى Egemen.kz.

اقجار اۋدانىنداعى كيەۆ اۋىلىنىڭ تۇرعىنى قارۋىن مال قوراسىندا ساقتاپ كەلگەن. بۇعان دەيىن دە ول ساقتاۋ ەرەجەلەرىن بۇزعان. سەيفتە مىلتىعىمەن بىرگە باسقا دا بوگدە زاتتاردى ساقتاعان. وسى اكىمشىلىك قۇقىق بۇزۋشىلىق فاكتىسى بويىنشا اقبتك 484-بابىمەن حاتتاما تولتىرىلىپ، قارۋ ۋاقىتشا ساقتاۋعا الىنعان. بىراق قارۋ ساقتاۋداعى قاتاڭ تالاپتاردى ول ءبارىبىر ورىنداماعان. سوندىقتان وسى جولى تۇرعىننىڭ مىلتىعى ءۇش جىلعا الىندى. ءبىر جىل ىشىندە ەكى قۇقىق بۇزۋشىلىققا جول بەرگەنى ءۇشىن ول قارۋدى ساقتاۋ جانە الىپ ءجۇرۋ قۇقىعىنان ايىرىلدى.

سونداي-اق پوليتسەيلەر اقجار اۋدانىندا قارۋىن اۆتوكولىكتىڭ جۇك سالعىشىنا سالىپ جۇرگەن كورشى اۋداننىڭ تۇرعىنىن دا اكىمشىلىك جاۋاپكەرشىلىككە تارتتى. ول تالشىق اۋىلىنا كەلىپ، اڭشى مىلتىعىن كولىگىنە تاستاپ كەتكەندە اۋىلدىڭ ماس تۇرعىنى تۇندە كولىكتى ايداپ كەتكەن. الىسقا ۇزاي الماي، جول-كولىك وقيعاسىن جاساپ، شەتەلدىك كولىكتى ايدالاعا تاستاپ، ءوزى كەتىپ وتىرعان. قارۋ جۇكسالعىشتا جاتقان، قاراۋسىز قالدىرۋدىڭ سالدارى قانداي جاعدايعا اكەلۋى مۇمكىن ەكەندىگىن ەلەستەتۋدىڭ ءوزى قيىن.

جالپى، ەكى كۇننىڭ ىشىندە قارۋدى ساقتاۋ ەرەجەلەرىن بۇزۋعا بايلانىستى اقبتك 484-بابى بويىنشا 10 اكىمشىلىك قۇقىق بۇزۋشىلىق انىقتالدى، سونىڭ ىشىندە وبلىستىڭ 8 تۇرعىنى قايتا تىركەۋ مەرزىمدەرىن بۇزعان. "قارۋ يەلەرى قاۋىپسىزدىكتى ساقتاۋعا جاۋاپكەرشىلىكپەن قاراپ، قارۋدى تيىسىنشە ساقتاۋدى بايىپتى قابىلداۋلارى كەرەك. دۇرىس بولماسا، ياعني دۇرىس ساقتالماسا ءار ءتۇرلى جاعدايلارعا، ونىڭ ىشىندە اپاتقا دا اكەلۋى مۇمكىن. سوندىقتان ۋچاسكەلىك پوليتسيا ينسپەكتورلارى قارۋدى ساقتاۋ ەرەجەلەرى مەن زاڭدا بەلگىلەنگەن باسقا دا تالاپتاردىڭ ساقتالۋىن قاتاڭ باقىلايدى"، - دەيدى سولتۇستىك قازاقستان وبلىسى پد باستىعىنىڭ ءبىرىنشى ورىنباسارى، پوليتسيا پولكوۆنيگى قانات ايتباەۆ.

سوڭعى جاڭالىقتار

ۇقساس جاڭالىقتار