سالىنۋى, كۇردەلى جوندەۋدەن ءوتۋى ءتيىس مەكتەپتەردىڭ بارىنە مەملەكەت تاراپىنان قارجى بولىنگەنىمەن, جاۋاپسىز مەردىگەرلەردىڭ كەسىرىنەن جاعداي وڭباي تۇر. بۇدان بولەك, بىرقاتار اۋدان باسشىلارىنىڭ دا سول قۇرىلىس كومپانيالارىنان جۇمىستى دەر كەزىندە تالاپ ەتپەۋى وسىنداي كۇردەلى جاعدايعا اكەلۋدە. جۋىردا عانا وبلىس اكىمى بەردىبەك ساپارباەۆ مەركى اۋدانىنىڭ اكىمى مەيىرحان ومىربەكوۆكە, ت.رىسقۇلوۆ اۋدانىنىڭ اكىمى ەربولات سادىرقۇلوۆقا, جۋالى اۋدانىنىڭ اكىمى نارباي ەرگەبەكوۆكە جانە وبلىستىق ءبىلىم باسقارماسىنىڭ باسشىسى گۇلنار حودجابەرگەنوۆاعا جۇمىستىڭ ناشار ءجۇرىپ جاتقانىن ايتقان بولاتىن. وسى ءۇشىن اتالعان باسشىلاردىڭ ءبىرازىنا سوگىس تە جاريالانىپ, ەسكەرتۋ دە بەرىلدى.
سونداي-اق اكىمدىك تاراپىنان كەيبىر جاۋاپسىز مەردىگەرلەردى كەلەسى جىلى تەندەرگە قاتىسۋ قۇقىعىنان ايىرۋ تۋرالى دا ايتىلعان بولاتىن. سونداي شەشىم قابىلدانسا دا, تاراز قالاسىنان باستاپ بىرقاتار اۋداندا مەكتەپ قۇرىلىسىنا قاتىستى جۇمىس ءالى باياۋ جۇرگىزىلۋدە.
ماسەلەن, مەركى اۋدانىنداعى 4 مەكتەپتە جوندەۋ جۇمىستارى ءالى كۇنگە دەيىن جالعاسۋدا. بۇگىندە مەردىگەر «كاسۋب-تاراز» جشس اقەرمەن اۋىلىنداعى ا.حاسەنوۆ اتىنداعى №11 مەكتەپكە كۇردەلى جوندەۋ جۇمىستارىن جۇرگىزۋدە. مۇندا نەگىزى 439 وقۋشى ءبىلىم الادى. الايدا جوندەۋ جۇمىستارىنا بايلانىستى كەزەكشى سىنىپتارداعى 43 وقۋشى اۋىلداعى مادەنيەت ۇيىندە وقۋعا ءماجبۇر بولىپ وتىر. اتالعان كومپانيا جۇمىستى بيىلعى جىلعى 25 قىركۇيەككە دەيىن اياقتاۋ كەرەك بولعان. بىراق جۇمىس بىتپەگەندىكتەن, بالالار وسى كۇنگە دەيىن ىڭعايسىز جاعدايدا ءبىلىم الۋدا. مەركى اۋدانى اكىمىنىڭ ورىنباسارى اسحات مەدەتبەكوۆتىڭ ايتۋىنشا, مەردىگەر «كاسۋب-تاراز» سەرىكتەستىگىنەن ءاربىر كەشىككەن كۇنى ءۇشىن تۇراقسىزدىق ايىپپ ۇلى وندىرىلەدى ەكەن. سونداي-اق ول قۇرىلىس قارقىنىن جەدەلدەتۋ ماقساتىندا دا ءتيىستى جۇمىس اتقارىلىپ جاتقانىن جەتكىزدى. دەگەنمەن, اتالعان كومپانيا قانشا جەردەن ايىپپۇل تولەسە دە, قازىرگىدەي كۇزدىڭ قارا سۋىعىندا بالالاردىڭ مادەنيەت ۇيىندە وقۋى قۇپتارلىق جاعداي ەمەس. گرانيتوگور اۋىلىندا دا 120 وقۋشىعا ارنالعان جاڭا مەكتەپ سالىنۋدا. ءبىلىم نىسانىنىڭ قۇرىلىسىن «تەمىر-ستروي سەرۆيس ي كو» كومپانياسى جۇرگىزۋدە. جاڭا عيمارات اعىمداعى جىلدىڭ سوڭىندا پايدالانۋعا بەرىلەدى دەپ جوسپارلانعان. ال وتكەن عاسىردىڭ ەلۋىنشى جىلدارى سالىنعان ەسكى عيماراتتا بۇگىندە بارلىعى 228 وقۋشى ءداستۇرلى فورماتتا ءبىلىم الۋدا. سونىمەن قاتار ويتال اۋىلىنداعى №48 مەكتەپتە جوندەۋ جۇمىستارى اياقتالۋعا جاقىن ەكەن. قازىرگى كەزدە قۇرىلىسشىلار سپورت جانە اكت زالدارىنىڭ قۇرىلىس جۇمىستارىمەن اينالىسۋدا. وقۋ عيماراتىندا كەزەكشى سىنىپتاردا 100-دەن استام وقۋشى ءبىلىم الۋدا. اتالعان ءبىلىم نىسانىن «قازمۇنايگاز» جشس بيىلعى تامىز ايىنىڭ سوڭىندا تاپسىرۋى كەرەك بولعان. ال شىلدە ايىندا وسى اۋىلداعى №12 مەكتەپ دايىن بولۋى ءتيىس ەدى. بىراق «دوس جانە ك سەرۆيس» مەردىگەرلىك كومپانياسى نىساندى ەندى عانا پايدالانۋعا بەرۋدى جوسپارلاپ وتىر. سونداي-اق جامبىل اۋىلدىق وكرۋگىنىڭ قۇرامىنداعى جەمىس-جيدەك ەلدى مەكەنىندە №44 ورتا مەكتەپتە 1 105 وقۋشى وقيدى. بىراق بۇگىندە كەزەكشى سىنىپتارداعى 100-دەن استام وقۋشى دا بالاباقشادا ءبىلىم الۋعا ءماجبۇر. سەبەبى اتالعان مەكتەپتەگى جوندەۋ جۇمىستارىن جۇرگىزىپ جاتقان مەردىگەر «ەرك-استانا» كومپانياسى ءبىلىم نىسانىن قازان ايىنىڭ باسىندا عانا اياقتاۋعا ۋادە بەرىپتى.
مۇنداي ماسەلە اۋدانداردا عانا ەمەس, وبلىس ورتالىعىندا دا بار. وڭىردە جۇمىس جۇرگىزىپ جاتقان مەردىگەرلەردىڭ دەنى وندىرىستىك كەستەدەن كەشىگىپ كەلەدى. تەحنيكالارى مەن جۇمىسشىلارىنىڭ سانى دا جەتكىلىكسىز. سول سياقتى قۇرىلىسقا قاجەتتى ماتەريالداردىڭ ۋاقىتىندا جەتكىزىلمەۋى دە ماسەلەنى قيىنداتا تۇسۋدە. وسى ۋاقىتقا دەيىن وبلىس اكىمدىگىنىڭ تاراپىنان قالا جانە اۋدان باسشىلارىنا, سونىمەن قاتار مەردىگەر كومپانيالارعا تاپسىرما بەرىلگەنىمەن ءالى ناتيجە بولماي وتىر. ماسەلەن كەيبىر جاڭا مەكتەپتەردىڭ قۇرىلىسى, باسقا دا ءبىلىم وشاقتارىندا جۇرگىزىلىپ جاتقان كۇردەلى جانە اعىمداعى جوندەۋ مەن سانيتارلىق توراپتاردىڭ جۇمىسى كەلىسىمشارت بويىنشا قىركۇيەك ايىنىڭ العاشقى كۇنىنە دەيىن اياقتالۋى ءتيىس بولعان. بىراق قازان ايى كەلسە دە ناتيجەلى كورسەتكىش بولماي تۇر. جالپى, قازىرگى تاڭدا وبلىس بويىنشا جاڭادان سالىنىپ جاتقان 9 مەكتەپتىڭ قۇرىلىسى بىتپەگەن. ءتىپتى كەيبىر جۇمىستىڭ 50 پايىزى دا اياقتالماعان. ودان بولەك تاعى 9 مەكتەپتىڭ سانيتارلىق تورابى ءالى دايىن ەمەس. ال 13 مەكتەپتىڭ كۇردەلى جوندەۋ جۇمىستارىنىڭ ازىرگە بىتەتىن ءتۇرى جوق. وبلىستىق ءبىلىم باسقارماسىنىڭ باسشىسى گۇلنار حودجابەرگەنوۆانىڭ ايتۋىنشا, تاراز قالاسىنداعى №1 مەكتەپ-گيمنازيانىڭ 300 ورىندىق قوسىمشا عيماراتىنىڭ قۇرىلىسى بيىلعى شىلدە ايىنىڭ سوڭىندا اياقتالۋى ءتيىس بولعان. بىراق قاۋقارسىز قۇرىلىستىڭ سالدارىنان قازىر مۇنداعى جۇمىستىڭ جارتىسى عانا ورىندالعان. سونداي-اق تاراز قالاسىنداعى ساڭىراۋ جانە ناشار ەستيتىن بالالارعا ارنالعان «مەيىرىم» مەكتەپ-ينتەرناتىنا تيەسىلى 80 ورىندىق قوسىمشا عيماراتتىڭ قۇرىلىسى دا وندىرىستىك كەستەدەن قالىپ كەلەدى. مۇنىڭ ءبارى دە وقۋشىلاردىڭ ساپالى ءبىلىم الۋىنا كەدەرگى كەلتىرىپ وتىر.
وڭىردە مەكتەپ قۇرىلىستارىن جۇرگىزىپ جاتقان مەردىگەر كومپانيالاردىڭ وكىلدەرى جۇمىستىڭ كەشەۋىلدەپ جاتۋىنىڭ سەبەبىن ادام كۇشىنىڭ جەتىسپەۋىمەن بايلانىستىرۋدا. بىراق وبلىس باسشىلىعى تاراپىنان ماسەلەنىڭ اتالعان مەردىگەرلەردىڭ ءبىر مەزگىلدە ءبىر ەمەس, بىرنەشە نىساندى وزدەرىنىڭ شاماسىنا, تەحنيكاسىنىڭ سانىنا قاراماي الىپ الۋىنان تۋىنداعانى ايتىلۋدا. سونىڭ سالدارىنان قۇرىلىس نىساندارىنىڭ جۇمىسى ۋاقىتىنان كەشىگۋدە. سونىمەن قاتار قۇرىلىس جۇمىسىن كورسەتىلگەن مەرزىمدە اياقتاماعان مەردىگەرلەرگە اكىمدەردىڭ شارا قولدانبايتىنى دا وسىنداي جاعدايعا جەتكىزگەن. سونداي-اق تەحنيكالىق قاداعالاۋشىلاردىڭ دا ءوز جۇمىسىنا سالعىرت قارايتىنى ايتىلىپ كەلەدى. وڭىردەگى مەكتەپ قۇرىلىسىنىڭ كەشىگۋى ءبىر ەمەس, بىرنەشە ماسەلەگە بايلانىستى بولىپ تۇر. بۇگىندە بالالار ءبىرىنشى توقساندى قاشىقتان وقىپ ءجۇر. ەگەر وقۋشىلار ءداستۇرلى وقىتۋعا كوشەتىن بولسا, وندا ءبارىن مادەنيەت ۇيىنە دە, بالاباقشاعا دا سىيعىزۋ مۇمكىن ەمەس. كۇردەلى ماسەلە سوندا تۋىندايدى.
جامبىل وبلىسى
