ايماقتار • 24 قىركۇيەك، 2020

قوستانايدا "پوليلوگ - 2020" بايقاۋى ءوتتى

15 رەت كورسەتىلدى

انتيكور قىزمەتى مەن جاستار ساياساتى باسقارماسىنىڭ باستاماسىمەن بيىل ەكىنشى رەت ۇيىمداستىرىلىپ وتىرعان شەشەندەر بايقاۋىنا وبلىستاعى جوو-نىڭ ستۋدەنتتەرى قاتىستى، دەپ حابارلايدى Egemen.kz.

"قازىرگى جاستار شەشەندىك ونەردى جەتە يگەرۋ ارقىلى الەمدە بولىپ جاتقان ماڭىزدى وقيعالار مەن  وزەكتى ماسەلەلەرگە ەركىن بويلاپ، تىڭدارمانعا بۇل تۋراسىندا ءوز وي-پىكىرىن نانىمدى ءارى ءدال جەتكىزە ءبىلۋى كەرەك"، - دەيدى ۇيىمداستىرۋشىلار.     

وبلىستىق انتيكوررۋپتسيا قىزمەتى باسشىسىنىڭ ءبىرىنشى ورىنباسارى دانيار سماعۇلوۆتىڭ سوزىنشە، بىلتىر اتالمىش بايقاۋ ەلىمىزدىڭ بۇكىل وڭىرلەرىندە بولىپ وتكەن.

"مۇنداي بايقاۋلار امەريكا مەن ەۋروپا ەلدەرىندە دە ءجيى ءوتىپ تۇرادى. بيىل، مىنە، قوستاناي وبلىسىندا ءبىلىم الىپ جۇرگەن دارىندى ستۋدەنتتەردىڭ قاتىسۋىمەن ەكىنشى رەت تۋرنير وتكىزىپ وتىرمىز. جالپى، ءبىز "پوليلوگتى" جىل سايىن جاستاردىڭ باسىن قوسىپ، تالابىن ۇشتايتىن ءداستۇرلى شاراعا اينالدىرۋدى كوزدەپ وتىرمىز"، - دەدى "Sanaly urpaq 2050" قوعامدىق قورىنىڭ باسشىسى سەرىك ماناسباەۆ.

بيىلعى بايقاۋدا  قاتىسۋشىلار قازاق جانە ورىس ءتىلدى ليگالارعا ءبولىنىپ باق سىنادى.

تۋرنير قورىتىندىسى بويىنشا جەكە ەسەپتە التىن كۋبوكتى رۋسلان  كاپاروۆ ۇتىپ السا، ۆاديم كيرسانوۆ – كۇمىس، نيكيتا بەرنوۆسكي قولا كۋبوكقا يە بولدى.

جالپىكوماندالىق ەسەپتە ءبىرىنشى ورىندى ا.بايتۇرسىن ۇلى اتىنداعى قوستاناي ايماقتىق ۋنيۆەرسيتەتىنىڭ قۇراماسى جەڭىپ الدى. ز. الدامجار اتىنداعى قوستاناي الەۋمەتتىك-تەحنيكالىق ۋنيۆەرسيتەتىنىڭ ستۋدەنتتەرى ەكىنشى ورىنعا يە بولسا، رۋدنىي يندۋستريالدىق ۋنيۆەرسيتەتىنىڭ شەشەندەرى ءۇشىنشى ورىندى قاناعات تۇتتى.

سوڭعى جاڭالىقتار

ۇقساس جاڭالىقتار