ساياسات • 24 قىركۇيەك، 2020

قازاقستان ازياداعى ءوزارا ءىس-قيمىل جانە سەنىم شارالارى كەڭەسىن باسقارادى

17 رەت كورسەتىلدى

قازاقستان رەسپۋبليكاسى سىرتقى ىستەر ءمينيسترى مۇحتار تىلەۋبەردىنىڭ توراعالىعىمەن ازياداعى ءوزارا ءىس-قيمىل جانە سەنىم شارالارى كەڭەسىنە (اوسشك) مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ بەينەكونفەرەنتسيا فورماتىندا وتىرىسى ءوتتى، دەپ حابارلايدى Egemen.kz.

كەزدەسۋدىڭ باستى ماقساتى اوسشك-تەگى توراعالىقتىڭ تاجىكستان رەسپۋبليكاسىنان قازاقستان رەسپۋبليكاسىنا تابىستالۋى بولدى.

م.تىلەۋبەردى قازاقستاننىڭ اوسشك-تە 2020-2022 جىلداردا توراعالىق ەتۋ بارىسىندا كوزقاراسى مەن باسىمدىقتارىن ۇسىندى. قر ءسىم باسشىسى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ 1992 جىلى بۇۇ باس اسسامبلەياسىنىڭ 47 سەسسياسىندا العاش رەت جاريالاعان اوسشك-ءتى قۇرۋ تۋرالى يدەياسى ازياداعى سەنىمدىلىك پەن قاۋىپسىزدىكتى نىعايتۋ سالاسىنداعى ىنتىماقتاستىقتىڭ جاڭا فورماتىن قالىپتاستىرۋعا ىقپال ەتكەنىن اتاپ ءوتتى.

قازاقستان رەسپۋبليكاسى توراعالىعىنىڭ باستى باسىمدىعىنىڭ ءبىرى رەتىندە كەڭەستى ودان ءارى ينستيتۋتتاندىرۋ، بۇل ءوز كەزەگىندە وعان مۇشە-مەملەكەتتەر اراسىنداعى ىنتىماقتاستىقتى كەڭەيتۋگە، سونداي-اق فورۋمنىڭ حالىقارالىق ارەناداعى مارتەبەسىن كوتەرۋگە مۇمكىندىك بەرەدى.

بۇعان قوسا، 2019 جىلى ماۋسىمدا دۋشانبەدە وتكەن سامميت بارىسىندا اوسشك دانالار كەڭەسىن، اوسشك قورىن قۇرۋ مەن اوسشك-ءتىڭ تالداۋ ورتالىقتارىنىڭ فورۋمىن تۇراقتى جۇمىس ىستەيتىن ديالوگ الاڭى رەتىندە قايتا قالىپتاستىرۋ جونىندەگى قازاقستان پرەزيدەنتى قاسىم-جومارت توقاەۆتىڭ باستامالارىن ىلگەرىلەتۋ جوسپارلانۋدا.

مينيستر قازاقستاندىق توراعالىق بارىسىندا اوسشك-ءتىڭ سەنىم شارالارى كاتالوگىن ءىس جۇزىندە جۇزەگە اسىرۋ بويىنشا، سونداي-اق باسقا دا ايماقتىق ۇيىمدارمەن جانە فورۋمدار مەن سىرتقى بايلانىستاردى كەڭەيتۋ بويىنشا جۇمىستاردىڭ نىعايتىلاتىنىن اتاپ ءوتتى.

مينيسترلىك كەزدەسۋ بارىسىندا سىرتقى ساياسي ۆەدومستۆولاردىڭ باسشىلارى قازاقستاننىڭ اۋسترياداعى ەلشىسى قايرات سارىبايدىڭ كانديداتۋراسىن اوسشك حاتشىلىعىنىڭ اتقارۋشى ديرەكتورى لاۋازىمىنا ءبىراۋىزدان ماقۇلدادى.

سونىمەن بىرگە، قاتىسۋشى ەلدەردىڭ باسشىلارى حالىقارالىق جانە ايماقتىق كۇن تارتىبىندەگى بىرقاتار وزەكتى ماسەلەلەر بويىنشا، ونىڭ ىشىندە اوسشك-گە مۇشە مەملەكەتتەردىڭ كوروناۆيرۋستىق پاندەميا جاعدايىنداعى ىنتىماقتاستىق پەن كەلەشەگى بويىنشا سىندارلى پىكىر الماسۋلار جۇرگىزدى.

جيىنعا قاتىسۋشىلار كەڭەس شەڭبەرىندەگى ىنتىماقتاستىقتى كۇشەيتۋدىڭ ماڭىزدىلىعىن جانە قازاقستاننىڭ فورۋمداعى توراعالىعى بارىسىندا ازياداعى بەيبىتشىلىكتى، قاۋىپسىزدىك پەن وركەندەۋ بويىنشا ىنتىماقتاستىقتى جانداندىرۋعا دايىن ەكەندىكتەرىن اتاپ ءوتتى.

اوسشك-ءتىڭ باستى ماقساتتارى ازيادا بەيبىتشىلىك پەن قاۋىپسىزدىكتى قامتاماسىز ەتۋ ءۇشىن ءتيىمدى جانە قولايلى قۇرىلىمدى قۇرۋعا باعىتتالعان.

قازىرگى تاڭدا اوسشك-كە 27 مەملەكەت مۇشە، 8 مەملەكەت  پەن 5 حالىقارالىق ۇيىم كەڭەستىڭ جۇمىسىندا باقىلاۋشى رەتىندە قاتىسادى. اوسشك حاتشىلىعى نۇر-سۇلتان قالاسىندا ورنالاسقان.

سوڭعى جاڭالىقتار

ۇقساس جاڭالىقتار