پارلامەنت • 24 قىركۇيەك، 2020

سەناتورلار حالىقارالىق كەلىسىمدەردى راتيفيكاتسيالاۋ تۋرالى زاڭدار قابىلدادى

8 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى، دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.

بۇگىن دەپۋتاتتار "2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى قىرعىز رەسپۋبليكاسىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى، ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىردا قول قويىلعان حاتتاماعا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى" زاڭدى قابىلدادى.

زاڭعا سايكەس، 2021 جىلعى 15 تامىزعا دەيىن قىرعىزستان ەۋرازيالىق ەكونوميكالىق وداقتىڭ تالاپتارىنا سايكەس ەاەو كەدەندىك شەكاراسىنداعى وتكىزۋ پۋنكتەرىن جاڭعىرتۋعا ءتيىس. ۆەتەريناريالىق، سانيتاريالىق، فيتوسانيتاريالىق، رادياتسيالىق باقىلاۋ جۇرگىزۋگە ارنالعان جابدىقتى جانە كەدەندىك باقىلاۋ جۇرگىزۋگە ارنالعان تاسىمالداناتىن جابدىقتى، ونىڭ ىشىندە تەكسەرىپ قاراۋعا ارنالعان رەنتگەن تەحنيكاسىن ورناتۋى قاجەت.

"قىرعىزستاننىڭ كەدەن بەكەتتەرىندە زاماناۋي جابدىقتار ورناتىلۋدا، ونىڭ كومەگىمەن لاۋازىمدى تۇلعانىڭ قاتىسۋىنسىز سكانەرلەۋ ارقىلى تاۋارلاردى باقىلاۋ جۇزەگە اسىرىلاتىن بولادى. بارلىعى اۆتوماتتاندىرىلعان: اقپارات سكانەرلەنىپ، ورتالىق كەدەن ورگانىنا بەرىلەتىن بولادى، وندا قاجەتتى مونيتورينگ جۇرگىزىلەدى. وتكىزۋ پۋنكتەرىندە تاۋاردى سايكەس ەمەس اتاۋمەن دەكلاراتسيالاۋ جاعدايلارىن انىقتاۋعا كومەكتەسەتىن تاۋەكەلدەردى باسقارۋ جۇيەسىن قولدانۋ جوسپارلانۋدا"، دەدى دەپۋتات سەرگەي كارپليۋك.

سونداي-اق سەنات دەپۋتاتتارى "قازاقستان رەسپۋبليكاسى مەن بىرىككەن اراب امىرلىكتەرى اراسىنداعى سوتتالعان ادامداردى بەرۋ تۋرالى شارتتى راتيفيكاتسيالاۋ تۋرالى" زاڭ قابىلدادى. شارت باس بوستاندىعىنان ايىرۋ تۇرىندەگى جازانى ءوز وتانىندا ودان ءارى وتەۋ ءۇشىن سوتتالعان ادامداردى ەكى مەملەكەت اراسىندا اۋىستىرۋ مۇمكىندىگىنە بايلانىستى ماسەلەلەردى رەتتەيدى.

"قازىر بىرىككەن اراب امىرلىكتەرىندە، وكىنىشكە وراي، ءبىزدىڭ 6 ازاماتىمىز، ونىڭ ىشىندە 5 ەر ادام جانە ءبىر ايەل ادام قاماۋدا وتىر. تيىسىنشە، وسى زاڭعا ەل پرەزيدەنتى قول قويعان كەزدە قازاقستان رەسپۋبليكاسىنىڭ باس پروكۋراتۋراسى ۋاكىلەتتى ورگان رەتىندە ولاردى وتانىنا قايتارۋ شارالارىن قابىلدايتىن بولادى"، دەدى دەپۋتات ساۋلە ايتپاەۆا.

سونىمەن قاتار، سەناتتىڭ جالپى وتىرىسىندا دەپۋتاتتار بىرقاتار ساۋالدار جولدادى. سەناتور ولگا پەرەپەچينانىڭ ۇندەۋى 4 دەڭگەيدەگى بيۋدجەتتى جانە جەرگىلىكتى ءوزىن-ءوزى باسقارۋدىڭ قارجىلىق تاۋەلسىزدىگىن ەنگىزۋگە قاتىستى بولدى. ناريمان تورەعاليەۆ ينتەرنەتتە بالالاردى قورلاۋدان قورعاۋ قاجەتتىلىگى تۋرالى مالىمدەدى. ءالىمجان قۇرتاەۆ ۇوس تۇتقىندارىن وڭالتۋ تۋرالى ۇسىنىسىن جەتكىزدى. دەپۋتات اندرەي لۋكين وتاندىق تاۋارلاردى اككرەديتتەۋگە جانە سەرتيفيكاتتاۋعا بايلانىستى ماسەلەلەردى قوزعادى. ال سەناتور دانا نۇرجىگىتوۆا بالالاردىڭ قۇقىقتارىن قورعاۋ بويىنشا شارالار قابىلداۋ قاجەتتىگى تۋرالى ساۋال جولدادى. ەلىمىزدىڭ باتىسىنداعى رەسپۋبليكالىق جولداردىڭ قۇرىلىسىنا بايلانىستى پروبلەمالار دەپۋتات عۇمار دۇيسەمباەۆتىڭ ساۋالىندا ايتىلدى.

سوڭعى جاڭالىقتار

ۇقساس جاڭالىقتار