قوعام • 24 قىركۇيەك، 2020

اجار عينايات قاراعاندى وبلىسىنداعى بىرقاتار مەديتسينالىق مەكەمەنى ارالاپ شىقتى

17 رەت كورسەتىلدى

دەنساۋلىق ساقتاۋ ۆيتسە-ءمينيسترى اجار عينايات قاراعاندى وبلىسىنداعى بىرقاتار مەديتسينالىق نىساندى ارالاپ، كوروناۆيرۋستىڭ ەكىنشى تولقىنىنا دايىندىق بارىسىن تەكسەردى، دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.

ەڭ اۋەلى قاراعاندىداعى  №3 ەمحانانىڭ جۇمىسىمەن تانىستى. قاجەتتى قۇرىلعىلاردى، تونومەترلەر مەن تەپلوۆيزورلاردى تەكسەردى. اجار عينايات بالالار دارىگەرى بولىپ  جۇمىس ىستەگەنى ءمالىم. سوندىقتان، وسى مەكەمەدەگى بالالاردى تاماقتاندىرۋ جونىندە ءوتىپ جاتقان شەبەرلىك ساباعىنا قىزىعۋشىلىق ءبىلدىرىپ، ماماندارمەن تىلدەستى. سونىمەن قاتار ۆيتسە-مينيسترگە جاڭا تۋعان نارەستەلەردىڭ ەستۋ قابىلەتىن تەكسەرەتىن اپپاراتتى جانە بالالاردى دامىتۋ بولمەسىن تانىستىردى.

وسىدان سوڭ اجار عينايات وبلىستىق جۇقپالى اۋرۋلار اۋرۋحاناسىنداعى ينفەكتسيالىق-پروۆيزورلىق  گوسپيتالدە بولدى. ۆيتسە-مينيستر مەكەمەدەگى ەمدەۋ بولىمشەلەرىن ارالاپ كوردى. سونداي-اق ح.ج.ماقاجانوۆ اتىنداعى ينفەكتسيالىق گوسپيتالدىڭ جۇمىسىن قاداعالادى. بۇل مەكەمە پاندەميا كەزىندە قۇرىلعان.

اجار عينايات وسىدان كەيىن سيتۋاتسيالىق ورتالىقتا بولدى. مۇندا كوروناۆيرۋستىق ينفەكتسياعا مونيتورينگ جاسايتىن قۇرىلعىلار كورسەتىلدى.

سونىمەن بىرگە جەدەل شتابتىڭ جۇمىسى باياندالدى. مۇندا دا جەدەل جاردەم حابارلامالارىنا جانە تۇماۋ ماۋسىمىنا مونيتورينگ جۇرگىزىلەدى جانە ناۋقاستاردى اۋرۋحاناعا جەتكىزۋ بارىسى پىسىقتالادى. جۇمىس قورىتىندىسى بويىنشا ۆيتسە-مينيستر وبلىستىق دەنساۋلىق ساقتاۋ باسقارماسىندا جيىن وتكىزدى.

"دارىگەردىڭ قوعامداعى ءرولى جوعارى باعالانا باستادى. مەدقىزمەتكەلەردىڭ بەدەلى ارتتى. پرەزيدەنتتىڭ ءوزى ايرىقشا نازار اۋدارۋدا. جوعارى جالاقى تاعايىنداپ، وردەن بەرىپ جاتىر. قاراعاندى وبلىسى ىندەتتىڭ ەكىنشى تولقىنىنا دايىن ەكەنىن بايقادىق. ەمحانالار مەن اۋرۋحانالار حالىققا ساپالى قىزمەت كورسەتۋگە تاس-ءتۇيىن ءازىر،- دەدى ۆيتسە-مينيستر.

سوڭعى جاڭالىقتار

ۇقساس جاڭالىقتار