تاريح • 24 قىركۇيەك، 2020

جازىقسىز جازالانعانداردى اقتايتىنى قۋانتادى

18 رەت كورسەتىلدى

مەنىڭ اتام «الاشورداعا» مۇشە بولعان جان ەدى. ومبىدا «الاشوردا» قايراتكەرلەرى اشقان مۇعالىمدەر دايارلايتىن مەكتەپتە وقىپتى. بەينەتقور اۋدانىنداعى بەسىنشى اۋىلدا مۇعالىم بولعان ەكەن. كەيىن الاشوردالىقتاردىڭ ءبارى قۋعىندالعاندا بىرەۋدىڭ كورسەتۋىمەن اتام دا ۇستالىپ، ايداۋعا كەتكەن. اجەمنىڭ ايتۋىنا قاراعاندا، 10 جىلعا ايدالعان، بىراق سودان اتام ورالماعان.

ال ءوزىمنىڭ اكەم قاينەكەي ءابىل­ما­ناپ­ ۇلى ەكىنشى دۇنيەجۇزىلىك سوعىسقا قاتىسىپ، جارالانىپ كەلگەن. سوعىس كەزىندە پارتياعا وتكەن. اۋىلعا كە­لىپ، قارا جۇمىسقا جاراماعان­دىق­تان مۇعالىم بولىپ، كوكشەتاۋ پەد­ۋچيليششەسىن سىرتتاي بىتىرگەن. اۋدان­دىق پارتيا كوميتەتىنە جۇمىسقا شاقىرعاندا انكەتاسىنا قاراپ جۇ­مىسقا الماعان. ءتىپتى اكەڭنىڭ «حالىق جاۋى» بولعانىن جاسىردىڭ دەپ پارتيادان دا شىعارعان. وسى ارەكەت اكەم­نىڭ جانىنا قاتتى باتتى. ول كوم­پارتيانىڭ يدەالدارىنا بارىنشا سەنگەن، ادال كوممۋنيست ەدى. ۇنەمى ۋھىلەپ، كۇيزەلىپ جۇرەتىن. مۇعالىمدىك جۇمىستان شىعارعانىمەن، ايتەۋىر قۋىنىپ ءجۇرىپ قايتادان كىرگەن ەدى. حرۋششەۆتىڭ جىلىمىق جىلدارىندا ول ماسكەۋگە دەيىن حات جازىپ، ءوزىنىڭ پارتيالىلىعىن قالپىنا كەلتىرۋگە تالاپتانعان. بىراق تەك جالتارما جاۋاپتار كەلىپ، ونى قايتادان قالپىنا كەلتىرمەگەن. 

اقىرى سوعىستا العان ءتان جاراسىنا جان جاراسى قوسىلىپ، ول 1969 جىلى 49 جاسىندا ومىردەن ءوتتى. ارتىندا شىرىلداپ بەس بالاسى مەن جارى قالدى.

ءسويتىپ، مەنىڭ اتام «حالىق جاۋى» دەگەن اتپەن ومىردەن ءوتتى. ونى اقتاۋعا اكەم دە ۇمتىلعان جوق. ويتكەنى ول مۇشەسى بولعان «الاشوردانىڭ» ءوزى دە اقتالماعان ەدى. ۇزاق جىلدار ءبىزدىڭ ىشىمىزدە اتامنىڭ جازىقسىز قۋدا­لانعانى، اكەمنىڭ قاسىرەت شەككەنى ويى­مىزدان كەتپەدى. ولار ومىردەن وت­سە دە، جارقىن ەسىمدەرىنىڭ جازىقسىز جاپا شەككەندىگى ءبىر مەزگىل ەسىمىزدەن شىقپايتىن. قازىرگى قازاقتىڭ زيالى ازاماتتارىنىڭ الاشوردالىقتاردى جانە باسقا دا ساياسي تۇرعىدا جاپا شەككەندەردى اقتاۋ جولىندا جاساپ جاتقان ىستەرىنە قۋانىپ وتىرامىز. تمد-نىڭ باسقا ەلدەرىندە مۇنداي شارالار باياعىدا جاسالعان ەدى. بىزدە، قانداي سەبەپ ەكەنى بەلگىسىز، وسى ءىس ۇنە­مى كەيىنگە قالدىرىلىپ كەلگەن بولاتىن. 

ەندى پرەزيدەنت قاسىم-جومارت توقاەۆتىڭ بارلىق ساياسي قۋعىنعا ۇشى­راعانداردى رەسمي تۇردە اقتاۋ تۋرالى شەشىمى ءبىزدىڭ وتباسىمىز بەن تۋىستارىمىزدى قۋانتىپ وتىر. ءبىر كەزدە وزىمىزگە  «الاشوردالىقتار» دەپ ويىندى-شىن كەكەتەتىندەرگە شەكەمىزدەن قارايتىن بولامىز. ايتا كەتەتىن جايت، مەنىڭ دە كومسومولعا وتەردەگى ماسەلەم ەكى كۇن قارالعان ەدى. ايتسە دە، ءبىزدىڭ مەكتەپتىڭ ديرەكتورى ادامگەرشىلىگى زور ازامات بولاتىن، سول كىسىنىڭ كۇش سالۋىمەن عانا مەن تەڭ-قۇربىلارىممەن بىردەي جاستار ۇيىمىنىڭ قاتارىنا وتكەن بولاتىنمىن.

مەن پرەزيدەنتىمىز قاسىم-جو­مارت توقاەۆتىڭ مىنا باستاماسىن قول­دايمىن جانە وعان ءوزىمنىڭ راح­مەتىمدى ايتقىم كەلەدى. وسى ماسەلەنى قوزعاپ، مەملەكەت باسشىسىنىڭ الدىنا شىعارعان ازاماتتارعا دا مىڭ العىس ايتامىن.

 

جاراس ءابدىماناپوۆ،

زەينەتكەر

 

سولتۇستىك قازاقستان وبلىسى،

ءۋاليحانوۆ اۋدانى

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار