پرەزيدەنت • 23 قىركۇيەك، 2020

پرەزيدەنت بۇۇ باس اسسامبلەياسىنىڭ 75-سەسسياسىنا قاتىسادى

41 رەت كورسەتىلدى

قاسىم-جومارت توقاەۆ دۇنيەجۇزىلىك ۇيىمنىڭ مەرەيتويلىق ءىس-شاراسى اياسىندا بۇۇ باس اسسامبلەياسى 75-سەسسياسىنىڭ جالپى ساياسي دەباتتارىندا ءسوز سويلەيدى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Facebook پاراقشاسىندا جازدى، دەپ حابارلايدى Egemen.kz.

"مەملەكەت باسشىسى 23 قىركۇيەكتە نۇر-سۇلتان ۋاقىتى بويىنشا شامامەن ساعات 19:45-تەن كەيىن بەينەكونفەرەنتسيا فورماتىندا ءسوز سويلەيدى دەپ جوسپارلانعان. پرەزيدەنت قازىرگى الەمدەگى تۇيتكىلدى ماسەلەلەر مەن سىن-قاتەرلەردى، سونىڭ ىشىندە، كوروناۆيرۋس پاندەمياسىمەن كۇرەسكە، جاھاندىق ەكونوميكانىڭ ءوسىمىن قالپىنا كەلتىرۋگە، يادرولىق قارۋدان باس تارتۋعا جانە تاراتپاۋعا، كليماتتىڭ وزگەرۋىنە قاتىستى پروبلەمالاردى شەشۋگە ارنالماق"، دەپ جازدى ب.ءۋالي.
 
سونىمەن قاتار قاسىم-جومارت توقاەۆ حالىقارالىق ىنتىماقتاستىقتى نىعايتۋ جانە ءوزارا سەنىم بىلدىرۋدەگى بۇۇ-نىڭ ءرولىن كۇشەيتۋگە نازار اۋدارادى.
 
بۇدان بولەك مەملەكەت باسشىسى 2030 جىلعا دەيىنگى ورنىقتى دامۋدىڭ كۇن ءتارتىبىن جۇزەگە اسىرۋ، "جاسىل ەكونوميكانى" دامىتۋ جانە ورتالىق ازياداعى وڭىرلىك ءىس-قيمىلداردى جانداندىرۋ ماسەلەلەرىنە ءمان بەرەدى.
 
مەملەكەت باسشىسى ەلدىڭ ىشكى ساياساتىنا قاتىستى ماسەلەلەردى دە قامتيدى، سونىڭ ىشىندە، "حالىق ۇنىنە قۇلاق اساتىن مەملەكەت" تۇجىرىمداماسىنىڭ ىسكە اسىرىلۋىنا دا توقتالماق.
 
سونداي-اق قازاقستان پرەزيدەنتى بىرقاتار حالىقارالىق باستاما كوتەرەدى. سولاردىڭ ءبىرى – بۇكىل الەمدەگى ۆولونتەرلەردىڭ ەڭبەگىن مويىنداۋعا، قۇرمەتتەۋگە باعىتتالعان.
سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار