اكتسيا بەيبىتشىلىك پەن كەلىسىمدى ساقتاۋ جولىنداعى اسا ماڭىزدى ماسەلەلەردى تالقىلاۋعا ارنالدى.
كىرىسپە سوزىندە ج.تۇيمەباەۆ: «بۇگىنگى تاڭدا بارلىق ەلدەر پاندەمياعا جانە ەكونوميكالىق ءوسىمنىڭ باياۋلاۋىنا بايلانىستى كۇردەلى كەزەڭدەردى باستان وتكەرۋدە. مۇنىڭ ءبارى الەۋمەتتىك ماسەلەلەردىڭ شيەلەنىسۋىنە, ال كەيبىر جاعدايلاردا كسەنوفوبيانىڭ, ەتنوكونفەسسيالىق جانجال كورىنىستەرىنىڭ ۇلعايۋىنا ىقپال ەتەتىنى بارشامىزعا ءمالىم.
مادەنيەتتەر مەن قۇندىلىقتاردىڭ الشاقتاۋىنىڭ كورىنىسى, ميگرانتوفوبيا مەن ناسىلشىلدىكتىڭ ءوسۋى, ءوزارا بەيىمدەلۋ پروتسەسىنىڭ قيىندىقتارى بۇرىن ءساتتى جۇرگىزىلگەن ەتنومودەلدەردىڭ ءححى عاسىردا كەيدە جۇمىس ىستەمەي وتىرعانىن كورسەتتى. كەرىسىنشە, الەم بۇرىنعىداي, قازىرگى احۋال تالاپتارىنا ساي كەلەتىن, بىرلىكتىڭ جاڭاشا فورمۋلالارىن جاساۋ پروتسەسىندە بولىپ وتىر. سوندىقتان بىرلىكتى قامتاماسىز ەتۋ مىندەتى كوپ قۇرامدى بارلىق مەملەكەتتەردىڭ نەگىزگى كۇن تارتىبىندە قالا بەرەدى», – دەدى.
قحا توراعاسىنىڭ ورىنباسارى ءوز سوزىندە قازاقستان ىنتىماقتاستىققا ۇيىتقى بولعان مەملەكەت ەكەندىگىن اتاپ ءوتتى: «الەمنىڭ 60-تان استام ەلى مەن اۋماعى ءبىزدىڭ ەتنوستارىمىزدىڭ تاريحي وتانى بولىپ تابىلادى. زاڭ الدىنداعى تەڭدىك, قوعامدىق كەلىسىم, «ارالۋاندىقتاعى بىرلىك» قاعيداتتارى ءبىزدىڭ باعا جەتپەس بايلىعىمىز جانە ستراتەگيالىق رەسۋرسىمىزعا ۇلاستى.
1995 جىلى تۇڭعىش پرەزيدەنت ن.ءا.نازارباەۆتىڭ باستاماسىمەن قۇرىلعان قازاقستان حالقى اسسامبلەياسى ەتنوسارالىق ءوزارا ءىس-قيمىلدىڭ نەگىزگى ينستيتۋتىنا اينالدى. 25 جىل بۇرىن ول 40-قا جۋىق ەتنومادەني بىرلەستىكتەردى بىرىكتىرسە, بۇگىنگى تاڭدا مۇنداي قۇرىلىمدار سانى مىڭنان اسادى. بۇكىل ەل اۋماعىندا تاتۋلىق پەن كەلىسىمنىڭ ازاماتتىق ورتالىقتارىنا اينالعان قىرىقتان استام دوستىق ءۇيى بار.
ءبىزدىڭ ينتەگراتسيالىق مودەل, ەڭ الدىمەن, ورتاق قۇندىلىقتار, ەتنوستاردىڭ تىلدەرى, مادەنيەتى, داستۇرلەرى ءبىزدىڭ جالپى مادەني بايلىعىمىزدى قۇرايتىن ەلدىڭ جالپى مادەني كەڭىستىگى نەگىزىندە قۇرىلادى.
الەمدى بىرگە قالىپتاستىرا وتىرىپ, ءبىز ارىپتەستەردى پوليەتنوستى قوعامداردا تاتۋلىق پەن بىرلىكتى نىعايتۋدىڭ ءتيىمدى فورمۋلاسىن ىزدەۋ ءۇشىن كۇش-جىگەردى بىرىكتىرۋگە شاقىرامىز», دەدى جانسەيىت تۇيمەباەۆ.
كونفەرەنتسيا جۇمىسىنا سونداي-اق كورنەكتى قوعام جانە عىلىم قايراتكەرلەرى, يۋنەسكو, بۇۇ حالىقارالىق ۇيىمدارىنىڭ جانە رەسەيدەگى ديپلوماتيالىق ميسسيالاردىڭ وكىلدەرى قاتىستى.
