سۋرەتتى تۇسىرگەن ەرلان ومار, «ەQ»
پرەزيدەنت جولداۋىندا ء«بىز ازاماتتارىمىزدىڭ لايىقتى ءومىر سۇرۋىنە جاعداي جاساۋعا, ولاردىڭ قۇقىقتارىن قورعاۋعا, زاڭ ۇستەمدىگىن قامتاماسىز ەتۋگە, جەمقورلىققا قارسى كۇرەستى كۇشەيتۋگە مىندەتتىمىز» دەلىنگەن. سول ارقىلى ەلىمىزدى دامىتۋدىڭ باستى تەگەرشىكتەرى, مەملەكەتتىگىمىز بەن ەلدىگىمىزدى ساقتاۋدىڭ اسىل مۇراتتارى اتاپ كورسەتىلىپ, مەملەكەتتىك باسقارۋدىڭ جاڭا ۇلگىسى ۇسىنىلدى.
ياعني ەندىگى جەردە مەملەكەتتىك جوسپارلاۋ جۇيەسى ادام رەسۋرستارى مەيلىنشە تولىققاندى تۇردە جۇمىلدىرىلۋىن قامتاماسىز ەتۋ كەرەك. نەگىزگى ماقسات جۇمىستىڭ بارىسى ەمەس, ناتيجەسىنە باعدارلاناتىن بولادى. بۇل تۇرعىدا مەملەكەتتىك قىزمەت جۇيەسىن رەتكە كەلتىرىپ, قايتا قۇرۋدىڭ دا مەزگىلى ابدەن ءپىسىپ-جەتىلگەن ەدى. مەملەكەت باسشىسى دا: «پاندەميا كەزىندە مەملەكەتتىك قىزمەتشىلەردىڭ باسىم بولىگىنىڭ قاشىقتان جۇمىس ىستەۋ رەجىمىنە كوشۋى مەملەكەتتىك اپپاراتتى ىقشامداۋ كەرەكتىگىن جانە بۇعان تولىق مۇمكىندىك بار ەكەنىن كورسەتتى» دەپ, ىقشامداۋ جوسىعىن جەدەلدەتۋدى تاپسىردى.
بۇل ماسەلە بىلتىرعى جولداۋدا دا ايتىلعان-دى. ۋاقىت كەشەۋىلدەۋدى كۇتپەيدى. الداعى ۋاقىتتا مەملەكەتتىك اپپارات پەن كۆازي-مەملەكەتتىك سەكتور قىزمەتكەرلەرىن مەرزىمىنەن بۇرىن بيىل 10 پايىزعا, كەلەسى جىلى 15 پايىزعا قىسقارتۋ جۇزەگە اسىرىلماق. ال ۇنەمدەلگەن قاراجات ەسەبىنەن باسقا قىزمەتكەرلەردىڭ ايلىق جالاقىسى كوبەيتىلەتىن بولادى.
ايتا كەتەيىك, بۇل ورايدا ەڭبەكاقىسى از مەملەكەتتىك قىزمەتتىڭ قوعام ءۇشىن پايداسىنان زيانى كوپتىگى دە ەسكەرىلگەن. جولداۋدا وسىعان بايلانىستى «بۇل ماسەلەگە جەتە نازار اۋدارماۋ كەرى كەتۋگە, بىلىكتىلىك پەن باستاماشىلدىقتان ايىرىلۋعا, سونداي-اق, ەڭ سوراقىسى, جەمقورلىققا اكەلىپ سوقتىراتىنى» دا ەگجەي-تەگجەيلى ءتۇسىندىرىلىپتى. وسىعان بايلانىستى كەلەسى جىلدىڭ ەكىنشى جارتىجىلدىعىنان باستاپ اتالعان سالادا بالدىق-فاكتورلىق جۇيە ەنگىزىلۋى كۇتىلىپ وتىر. بۇل جۇيە اركىمنىڭ ەڭبەگىنە قاراي اقى تولەنىلۋىن قامتاماسىز ەتەدى. وندا وزىنە تاپسىرىلعان جۇمىستى ءمىنسىز اتقارعان, تارتىپتىك جازاعا ىلىكپەگەن مەملەكەتتىك قىزمەتشىنىڭ جىل سوڭىندا ءتيىستى تالاپقا سايكەس ەداۋىر كولەمدە ۇستەمەاقى الۋى دا قاراستىرىلعان.
شىنىندا دا, مەملەكەتتىك قىزمەت ءمىنسىز بولۋعا, ادال اتقارىلۋعا ءتيىس. اسىرەسە, مەملەكەتتىك قىزمەتكەرلەردىڭ سىبايلاس جەمقورلىقتىڭ قانداي كورىنىسىنە بولسىن ىمىراسىزدىق تانىتۋى بارىنەن دە ماڭىزدى. وسىعان بايلانىستى زاڭ تالاپتارى دا قاتايتىلىپ وتىر. قاراماعىنداعى قىزمەتكەرلەرىنىڭ جەمقورلىققا بارۋى وبلىستىق اۋماقتىق قۇرىلىمدار باسشىلارىنىڭ, مينيسترلەردىڭ ءوز ەركىمەن قىزمەتتەرىنەن بوساۋىنا ءماجبۇر ەتەدى. بۇل ماسەلە مەكەمە قىزمەتكەرلەرى اراسىندا ەگجەي-تەگجەيلى ءتۇسىندىرىلدى.
جولداۋداعى «ەكولوگيا جانە بيولوگيالىق اركەلكىلىكتى قورعاۋ» دەپ اتالاتىن باعىتتىڭ تىكەلەي ءبىزدىڭ سالاعا قاتىسى بار. وسىعان وراي ۇكىمەتكە بيولوگيالىق اركەلكىلىكتى ساقتاۋ جانە ءتيىمدى پايدالانۋ جونىندەگى ۇزاقمەرزىمدى جوسپاردى بەكىتۋ ۇسىنىلىپ وتىر. سوعان سايكەس الداعى بەس جىل ىشىندە ورمان القابىنا – 2 ملرد, ەلدى مەكەندەرگە 15 ملن اعاش وتىرعىزىلاتىن بولادى.
سونداي-اق «جانۋارلاردى قورعاۋ تۋرالى» زاڭ جوباسى ازىرلەنبەك. جان-جانۋارلارعا كوزقاراس كەز كەلگەن مەملەكەتتىڭ وركەنيەتتىلىگىنىڭ دە ولشەمى ەكەنى انىق. بۇل جايت ءبىزدى دە قۋانتىپ وتىر.
قىسقاسى, مەملەكەت باسشىسىنىڭ بيىلعى جولداۋىندا ايتىلعان ماسەلەلەر بارلىعىمىزدىڭ دا كوڭىلىمىزدەن شىقتى. الداعى ۋاقىتتا جولداۋدان تۋىندايتىن مىندەتتەردىڭ مۇلتىكسىز ورىندالۋىنا ينسپەكتسيانىڭ ەڭبەك ۇجىمىنىڭ دا اۋىزبىرشىلىكپەن كۇش جۇمىلدىرىپ, ءوز ۇلەستەرىن قوساتىنىنا ابدەن سەنىمدىمىن.
بايماحان قوشقارباەۆ,
جامبىل وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى
