باس-اياعى 23 كۇنگە سوزىلعان ۆەلوشاباندوزدار اراسىنداعى ەڭ بەلدى جارىستىڭ قورىتىندىسى بويىنشا, جالپى ەسەپتە 22 جاستاعى سلوۆەنيالىق تادەي پوگاچار (UAE Team Emirates) توپ جاردى. سونىمەن قاتار سلوۆەنيالىق جاس تالانت تاۋلى كەزەڭنىڭ ۇزدىگى جانە «تۋر دە فرانس» جارىسىنىڭ ەڭ جاس ۆەلوشاباندوزى اتاعىن قوسا جەڭىپ الدى. وسىنداي جەتىستىگىنىڭ ارقاسىندا ول «تۋر دە فرانستىڭ» ءبىراز رەكوردىنا تۇزەتۋ ەنگىزدى.
ماسەلەن, تادەي پوگاچار «تۋر دە فرانستا» توپ جارعان سلوۆەنيادان شىققان تۇڭعىش ۆەلوسپورتشى اتاندى. سونىمەن قاتار ول تۋرنير تاريحىندا جەڭىمپاز اتانعان ەڭ جاس ۆەلوشاباندوز (21 جاس, 11 اي جانە 29 كۇن) بولدى.
بۇدان بولەك پوگاچار «تۋر دە فرانستىڭ» كەيىنگى 86 جىلداعى تاۋلى كەزەڭنىڭ ۇزدىگى اتانعان ەڭ جاس سپورتشى اتاعىن يەلەندى. جانە دە ۆەلوجارىس تاريحىندا العاش قاتىسقان جىلى جەڭىس تۇعىرىنا كوتەرىلگەن 12-ءشى سپورتشى.
21 جاستاعى سلوۆەنيالىق ۆەلوشاباندوز 9 كەزەڭ بويى جالپى ەسەپتە ۇزدىك ۇشتىكتەن تۇسكەن جوق. ال 20-كەزەڭگە دەيىن ەكىنشى ورىندا كەلگەن پوگاچار سوڭعى كەزەڭدە سارى جەيدەنىڭ يەگەرى اتاندى. پوگاچار – «تۋر دە فرانس» تاريحىندا جەكەلەي جارىس كەزەڭىنەن كەيىن سارى جەيدە كيگەن بەسىنشى ۆەلوشاباندوز.
ۆەلوسپورتشىلاردىڭ بەيرەسمي الەم چەمپيوناتى سانالاتىن «تۋر دە فرانس» جارىسىنا قازاقستاندىق «استانا» ۆەلوكومانداسى دا قاتىسىپ, ءتاۋىر ناتيجە كورسەتتى دەپ سەنىممەن ايتا الامىز. سەبەبى ەل چەمپيونى الەكسەي لۋتسەنكو مەن كوماندا كاپيتانى ميگەل انحەل لوپەس تيىسىنشە 6-شى جانە 17-كەزەڭدەردە توپ جاردى. ال جارىس قورىتىندىسى بويىنشا كولۋمبيالىق ۆەلوشاباندوز جالپى ەسەپتە التىنشى ورىننان كورىندى. سايكەسىنشە, «استانا» وكىلدەرى اراسىنداعى ەڭ ۇزدىك ناتيجە دە لوپەسكە تيەسىلى. جالپىكوماندالىق ەسەپتە ءبىزدىڭ كوماندا 22 ۇجىمنىڭ اراسىندا جەتىنشى ورىندى يەلەندى.
– «تۋر دە فرانس» جارىسىنا تۇڭعىش رەت قاتىسسام دا مەن ءۇشىن جوعارى دەڭگەيدە ءوتتى. وسىنداي ءىرى جارىستا باق سىناپ, پاريجگە دەيىن جەتكەنىمنىڭ ءوزى ۇلكەن جەڭىس. ماعان بۇل جارىس وتە ۇنادى, جوعارى دەڭگەيدە ونەر كورسەتىپ, ءار كەزەڭ سايىن ەڭ مىقتى قارسىلاستاردىڭ قاسىندا بولدىم. سونىمەن قاتار تاۋلى كەزەڭنىڭ جەڭىمپازى اتاندىم. سوڭعى جارىس جولىنا دەيىن ۇزدىكتەر قاتارىندا كەلىپ, جۇلدەگە قول سوزىم ساتتە ماعان ۋاقىت جەتپەي قالدى. الايدا مەن وزىمە قۇندى تاجىريبە جينادىم جانە كەلەسى جىلى بۇدان دا كۇشتى بولىپ ورالاتىنىما سەنىمدىمىن. وسى ءۇش اپتا ىشىندە بارلىق كوماندا وكىلدەرىنە, شاباندوزدارعا, قىزمەتكەرلەرگە, مەنەدجمەنتكە العىس ايتقىم كەلەدى!», دەدى ميگەل انحەل لوپەس.
ال قازاقستاندىق ۆەلوكوماندانىڭ باس مەنەدجەرى, ەلىمىزدىڭ داڭقتى ۆەلوشاباندوزى الەكساندر ۆينوكۋروۆ «استانا» كوماندا رەتىندە جاقسى ناتيجە كورسەتىپ, «تۋر دە فرانستى» تابىستى وتكىزدى دەپ سانايدى. «قازاقستان چەمپيونى الەكسەي لۋتسەنكو مەن ءبىزدىڭ كوشباسشىمىز ميگەل انحەل لوپەس وتە تارتىستى بولعان ەكى كەزەڭدە جەڭىسكە جەتتى. ءبىز جاقسى كوماندالىق جۇمىس ۇلگىسىن كورسەتىپ, ءۇش اپتا بويى ءبىر ماقسات ءۇشىن كوماندا بولىپ كوپ جۇمىس ىستەدىك. ءبىز بىرگە جەڭىپ, بىرگە جەڭىلدىك, بىراق بۇل ءبىزدىڭ سپورتتىڭ ءبىر بولىگى ەكەنىن ۇمىتپاۋىمىز قاجەت. دەسە دە كوماندا كورسەتكەن ناتيجەگە كوڭىلىمىز ابدەن تولادى. جالپى ەسەپتە التىنشى ورىندى ولجالادىق, ەكى تاۋلى كەزەڭدە ۇزدىك اتاندىق جانە ميگەل انحەل لوپەس پەن حارولد تەحادانىڭ ءساتتى دەبيۋتىنىڭ كۋاگەرى بولدىق. ماۋسىم ءالى جالعاسادى جانە ءبىزدى الدا جاڭا جارىستار مەن جاڭا بەلەستەر كۇتىپ تۇر», دەدى جارىستى قورىتىندىلاعان الەكساندر ۆينوكۋروۆ.
