قوعام • 22 قىركۇيەك، 2020

الماتىدا 17 جاستاعى قىزدىڭ اسقازانىنان 1 كەلى شاش شىقتى

171 رەت كورسەتىلدى

الماتىدا №4 قالالىق اۋرۋحانا دارىگەرلەرى 17 جاستاعى بويجەتكەننىڭ اسقازانىنان 1 كەلى شاش الىپ شىقتى، دەپ حابارلايدى Egemen.kz.

اۋرۋحانا حيرۋرگى ابىلاي بايماحانوۆتىڭ ايتۋىنشا، بويجەتكەن اسقازانىنىڭ ەپيگاستري ايماعى اۋىرىپ اۋرۋحاناعا تۇسكەن. وعان فيبروگاسترودۋودەنوسكوپيا (فگدس)، كومپيۋتەرلىك توموگرافيا جاسالعان. ناتيجەسىندە ونىڭ اسقازانىندا شاشتىڭ جۇمارلانعان تۇينەگى (تريحوبەزوار) بارى انىقتالعان. بەزوار ادامدار اراسىندا  وتە  كەزدەسەدى، ول كوبىندە كۇيسەيتىن جانۋارلاردا بولادى. ناۋقاس ءوزىنىڭ اسقازانىندا شاش بارىن مۇلدە بىلمەگەن. 

"بۇگىن پاتسيەنتكە جوسپارلى وتا جاسالدى. لاپاروتوميا، گاستروتوميا، وتاسى كەزىندە اسقازان ءپىشىنىن قايتالاپ تۇرعان تريحوبەزوار انىقتالدى. بۇل تۇينەك اسقازاننىڭ 70 پايىز اۋدانىن الىپ تۇرعان. بويجەتكەننىڭ ءوزى شاش جەگەنىن مويىنداماي تۇر. الايدا بۇل بىرنەشە جىلدار بويى قالىپتاسقان تۇينەك. ونىڭ سالماعى 1 كەلىگە جەتىپ قالعان سوڭ اسقازاننىڭ ءپىشىنى سوزىلعان"، - دەدى اۋرۋحانا حيرۋرگى ابىلاي بايماحانوۆ.

ونىڭ ايتۋىنشا، تاجىريبەدە تريحوبەزوار وتە سيرەك كەزدەسەدى. ودان كەلەتىن قاۋىپ وتە جوعارى. كونكرەمەنت اسقازان-ىشەك جولىمەن قوزعالۋ كەزىندە اسقازاننىڭ بىتەلۋىنە نەمەسە اسقازاننىڭ تەسىلۋىنە الىپ كەلۋى مۇمكىن بولدى. ابىروي بولعاندا ناۋقاس مەديتسينالىق كومەككە ۋاقىتىندا جۇگىنگەن.

سونداي-اق حيرۋرگ-دارىگەر، اسسيستەنت داۋرەن جۋماتاەۆ تىرناق تىستەۋ نەمەسە شاش شايناپ جۇتۋ پسيحولوگيالىق ادەت ەكەنىن ايتادى.

"بالالاردىڭ ادەتتەرىنە ەرتە جاستان نازار اۋدارۋ كەرەك. سونداي - اق، شاش اعزاعا تاماقپەن بىرگە كەتىپ، جىلدار بويى ماسساعا جينالۋى مۇمكىن"، - دەدى داۋرەن جۋماتاەۆ.

ايتا كەتەيىك، مۇنداي جاعداي كوپ جاعدايدا 30 جاسقا دەيىنگى قىز بالالاردا كەزدەسەدى. اۋرۋدىڭ باستالۋى ادەتتە سيمپتومسىز بولادى. جۇمارلانعان تۇينەك ءوسىپ كەلە جاتقاندا، ءىش اۋىرىپ، اۋىرلىق سەزىمى پايدا بولادى، جۇرەك اينۋ، قۇسۋ، تابەتتىڭ تومەندەۋى، تەمىر تاپشىلىعىنىڭ انەمياسى داميدى. 

سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار