ايماقتار • 22 قىركۇيەك، 2020

اقتوبەدەگى مەكتەپ وقۋشىلارىنىڭ توبەلەسىنە قاتىستى قىلمىستىق ءىس قوزعالدى

58 رەت كورسەتىلدى

اقتوبە وبلىسىنىڭ ءبىلىم باسقارماسى كەڭقياق جانە شۇبارشي، ساركول اۋىلىنداعى وقۋشى قىزدار اراسىنداعى داۋعا قاتىستى تۇسىنىكتەمە بەردى، دەپ حابارلايدى Egemen.kz.

قىزدار اراسىنداعى جانجال الەۋمەتتىك جەلىدەگى ورتاق چاتتا بولعان ۇرىستان تۋعان. وندا ولار ءبىر-بىرىنە ءتۇرلى بالاعات سوزدەر ايتىپ، ونىڭ ارتى توبەلەسكە ۇلاسقان. 20 قىركۇيەك كۇنى كەڭقياق، شۇبارشي، ساركول اۋىلىنىڭ 8، 9، 10 سىنىپ وقۋشىلارى، بارلىعى 10 قىز توبەلەسكەن. ولار توبەلەستى ارنايى ۆيدەوعا ءتۇسىرىپ، الەۋمەتتىك جەلىدەگى پاراقشاعا وزدەرى جۇكتەگەن.

"جابىرلەنۋشى قىز دەنە جاراقاتىن الماعان. وقيعادان سوڭ لەزدە تەمىر اۋداندىق ءبىلىم ءبولىمى، پوليتسيا بولىمىنەن ارنايى مونيتورينگ توبى قۇرىلىپ، زەردەلەۋ جۇمىسى جۇرگىزىلدى"، - دەدى وبلىستىق ءبىلىم باسقارماسى باسشىسىنىڭ ورىنباسارى نۇرگۇل بەرتىلەۋوۆا.

بۇل توبەلەستەن سوڭ قىلمىستىق ءىس قوزعالدى. وقۋشىلارمەن قاتار اتا-انالار دا جاۋاپقا تارتىلۋى مۇمكىن.

"اتالعان فاكتى نەگىزىندە قىلمىستىق كودەكستىڭ 293-بابى 2-بولىگى، ياعني، بۇزاقىلىق دەرەگى بويىنشا ءىس تىركەلىپ، سوتقا دەيىنگى تەرگەۋ جۇرگىزىلىپ جاتىر. بۇل فاكتىنى تەمىر اۋداندىق پوليتسيا ءبولىمىنىڭ كامەلەتكە تولماعاندار ءىسى جونىندەگى ينسپەكتورلارى انىقتادى"، - دەپ حابارلادى وبلىستىق پد ءباسپاسوز قىزمەتى.

قازىر توبەلەسكەن قىزداردىڭ اتا-اناسى ورتاق مامىلەگە كەلگەن. وسى وقيعادان سوڭ ءۇش مەكتەپ ديرەكتورى، تاربيە ءىسى جونىندەگى ورىنباسارلار مەن سىنىپ جەتەكشىلەرىنە تارتىپتىك جازا قولدانىلدى.

"اتا-انالاردى بالالارىن، اسىرەسە جاسوسپىرىمدەردى تاربيەلەۋ ماسەلەسىنە جاۋاپكەرشىلىكپەن قاراۋعا شاقىرامىز. ولار جاساعان قۇقىق بۇزۋشىلىقتارى ءۇشىن جاۋاپقا تارتىلاتىنىن ءبىلۋى ءتيىس. سونداي-اق كامەلەتكە تولماعاندار ءىسى جونىندەگى ينسپەكتورلار اۋداننىڭ وقۋ ورىندارىندا پروفيلاكتيكالىق اڭگىمە جۇرگىزدى"، - دەدى اقتوبە وبلىسى پد باستىعى اتىعاي ارىستانوۆ.

سوڭعى جاڭالىقتار

ۇقساس جاڭالىقتار