قوعام • 22 قىركۇيەك، 2020

ەلىمىزدە ۇلتتىق تۇتىنۋشىلار قاۋىمداستىعى قۇرىلادى

229 رەت كورسەتىلدى

تۇتىنۋشىلاردىڭ بارلىق قوعامدىق ۇيىمدارىن بىرىكتىرەتىن، وڭىرلەردە كەڭ تارالعان وكىلدىكتەرى بار ۇلتتىق تۇتىنۋشىلار قاۋىمداستىعىن قۇرۋ مۇمكىندىگىن قاراستىرىپ جاتىرمىز. بۇل تۋرالى بۇگىن ۇكىمەت وتىرىسىندا ساۋدا جانە ينتەگراتسيا ءمينيسترى ب.سۇلتانوۆ مالىمدەدى، دەپ حابارلايدى Egemen.kz

جالپى، بۇل تۇتىنۋشىلاردىڭ مادەنيەتىن جانە تۇتىناتىن تاۋارلار مەن قىزمەتتەردىڭ ساپاسىن جاقسارتۋعا مۇمكىندىك بەرەدى. بۇدان باسقا، زاڭدا تۇتىنۋشىلاردىڭ قۇقىقتارىن قورعاۋ جونىندەگى ۆەدومستۆوارالىق كەڭەس قۇرۋ كوزدەلگەن. ونىڭ وتىرىستارىندا مەملەكەتتىك ورگانداردىڭ جۇمىس ناتيجەلەرى تالقىلانىپ، كەمشىلىكتەر انىقتالىپ، ءتيىستى شەشىمدەر قابىلدانادى. وسى كەڭەستىڭ قۇرامى مەن ەرەجەسى ۇكىمەتتىڭ قاراۋىندا.

سونداي-اق مينيسترلىك تۇتىنۋشىلاردىڭ قۇقىقتارىن قورعاۋ سالاسىنداعى اتقارىلعان جۇمىستار تۋرالى ساراپتامالىق باياندامانى جىل سايىن ۇكىمەتكە ۇسىناتىن بولادى. قۇرىلىپ جاتقان بىرىڭعاي اقپاراتتىق جۇيە ارقىلى جينالاتىن مالىمەتتەر اتالعان پروبلەمالاردى جەدەل جانە ساپالى تۇردە شەشەتىن جۇمىستىڭ نەگىزىن قۇرايتىن بولادى. بۇل جۇيە تۇتىنۋشىلاردى، بيزنەستى، مەملەكەتتىك ورگانداردى ءبىرتۇتاس ەكوجۇيەگە بايلانىستىرادى جانە سالالار بولىنىسىندە، داۋدىڭ ءمانى مەن قاراۋ سۋبەكتىلەرى بويىنشا شاعىمداردى قۇرىلىمداستىرىپ، قاداعالاۋعا مۇمكىندىك بەرەدى.

مامانداندىرىلعان ۇكىمەتتىك ەمەس ۇيىمدار دا جۇيەنىڭ تولىققاندى قاتىسۋشىلارى مەن بەنەفيتسيارلارىنا اينالادى.  اقپاراتتىق جۇيەنى قاناتقاقتى تەستىلەۋ نۇر-سۇلتان قالاسىندا كاسىپكەرلىك سۋبەكتىلەرىنىڭ ەرىكتى تۇردە قاتىسۋىمەن اعىمداعى جىلدىڭ قازان ايىنا جوسپارلانعان. 

ء"بىز قازاقستانداعى تۇتىنۋشىلاردىڭ قۇقىقتارىن قورعاۋ جۇيەسىن تۇبەگەيلى جاڭا دەڭگەيگە كوتەرەتىن بىرقاتار جاڭا باستامالاردى ۇسىنامىز. بىرىنشىدەن، تۇتىنۋشىلاردىڭ بارلىق قوعامدىق ۇيىمدارىن بىرىكتىرەتىن، وڭىرلەردە كەڭ تارالعان وكىلدىكتەرى بار ۇلتتىق تۇتىنۋشىلار قاۋىمداستىعىن قۇرۋ مۇمكىندىگىن قاراستىرۋ"، دەدى ساۋدا جانە ينتەگراتسيا ءمينيسترى.

ەكىنشىدەن، ۇكىمەتتىك ەمەس ۇيىمداردىڭ نەگىزىندە ومبۋدسمەن ينستيتۋتىن قۇرۋ.

ۇشىنشىدەن، نورماتيۆتىك-قۇقىقتىق اكتىلەردى ازىرلەۋ كەزىندە تۇتىنۋشىلاردىڭ مۇددەلەرىنە قاتىستى رەتتەۋشىلىك اسەردى تالداۋ جانە ۋاكىلەتتى ورگانمەن كەلىسۋ مىندەتتىلىگىن ەنگىزۋ.

تورتىنشىدەن، تۇتىنۋشىلار قۇقىقتارىن قورعاۋ سالاسىنداعى قوعامدىق بىرلەستىكتەردى مينيسترلىكتەر مەن اكىمدىكتەر جانىنداعى كونسۋلتاتيۆتىك-كەڭەسشى ورگانداردىڭ قۇرامىنا قوسۋ. 

بەسىنشىدەن، مەملەكەتتىك جانە جەرگىلىكتى اتقارۋشى ورگانداردىڭ، سونداي-اق كۆازيمەملەكەتتىك ۇيىمداردىڭ قىزمەتتەرىن باعالاۋ كورسەتكىشتەرىنە (KPI) تۇتىنۋشىلار تاراپىنان قاناعاتتانۋ مەن ولاردىڭ جۇمىستارىنا سەنىم دەڭگەيىن ەنگىزۋ.

التىنشىدان، تۇتىنۋشىلاردىڭ مۇددەلەرى مەن قۇقىقتارىن تولىعىمەن ەسكەرە وتىرىپ، مەملەكەتتىك جانە جەكە ۇيىمدار ءۇشىن ەرىكتى ىسكەرلىك ەرەجەلەر مەن ۇلگىلىك كەلىسىمشارتتارعا نورمالاردى قابىلداۋ.

جەتىنشىدەن، تۇتىنۋشىلار مەن كاسىپكەرلەر ءۇشىن تۇتىنۋشىلار قۇقىعىن قورعاۋ قۇرالدارى تۋرالى تەگىن ونلاين دارىستەر كۋرستارىن وتكىزۋ.

ءوز كەزەگىندە جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتى باسشىسىنىڭ ورىنباسارى اسلان تۇكيەۆ جوعارعى سوتتىڭ سوڭعى زاڭنامالىق وزگەرىستەردى ازىرلەۋگە قاتىسقانىن حابارلادى.  

ء"بىز تۇتىنۋشىعا سوتقا جۇگىنبەي-اق كەلتىرىلگەن مورالدىق زياننىڭ وتەماقىسىن تولەۋ مۇمكىندىگىن وڭ باعالايمىز، جالپى العاندا، سوت جۇيەسى تۇتىنۋشىلىق داۋدى رەتتەۋدىڭ جاڭا تارتىبىنە سايكەس جۇمىس ىستەۋگە دايىن"، دەدى ا. تۇكيەۆ. 

اعىمداعى جىلدىڭ سەگىز ايىنىڭ ىشىندە سوتتارعا تۇتىنۋشىلاردىڭ قۇقىقتارىن قورعاۋ تۋرالى 677 تالاپارىز كەلىپ ءتۇستى. ونىڭ 385-ءى قارالىپ، 306-سى تالاپكەردىڭ پايداسىنا قاناعاتتاندىرىلدى. ونىڭ ىشىندە 94 ءوتىنىش بويىنشا بىتىمگەرشىلىك كەلىسىمدەر جاسالدى.

"بۇل جاقسى كورسەتكىشتەر، بىراق ولقىلىقتار دا بولدى. پوزيتسيامىزدى ۇيلەستىرۋ ءۇشىن ءبىز وسى اپتادا جوعارعى سوت باسشىلىعىنىڭ، مينيسترلىكتىڭ جانە مۇددەلى تاراپتاردىڭ قاتىسۋىمەن كەزدەسۋدى جوسپارلادىق. بۇدان باسقا، جوعارعى سوت جۇيەلى بۇزۋشىلىقتار بويىنشا تۇتىنۋشىنىڭ بەلگىسىز شەڭبەرىنىڭ قۇقىقتارىن قورعاۋ پراكتيكاسىن قولدايدى. جوعارعى سوتتا ۇجىمدىق سوت ءىسى دەپ اتالاتىن تاجىريبە جەتكىلىكتى زاڭنامالىق رەتتەۋ بولماسا دا، دامىتىلىپ، وعان قولداۋ جاسالاتىن بولادى"، دەدى ا.تۇكيەۆ. 

سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار