بۇگىن, 5 قاراشا كۇنى ۇكىمەت ۇيىندە پرەمەر-مينيستر سەرىك احمەتوۆتىڭ توراعالىعىمەن بيىلعى جىلعى 11 قازاندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ بەرگەن تاپسىرمالارىن ورىنداۋ بارىسى تالقىلاندى. بۇل تۋرالى ۇكىمەتتىڭ ءباسپاسوز قىزمەتى حابارلادى.
پرەمەر-مينيستر «جۇمىستىڭ تومەن قارقىنىن جانە مينيسترلەر, اكىمدەر, جالپى ۇكىمەت تاراپىنان پرەزيدەنت تاپسىرمالارىن ورىنداۋعا ءجىتى كوڭىل بولىنبەيتىنىن» اتاپ ءوتىپ, «مەملەكەت باسشىسىنىڭ تاپسىرمالارىن جەدەل جانە ءتيىمدى ورىنداۋ» قاجەتتىگىن باسىپ ايتتى.
تاپسىرمالاردى ورىنداۋ جوسپارى تۋرالى ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ باياندادى. ونىڭ ايتۋىنشا, «ۇكىمەت بەكىتكەن ءىس-شارالار جوسپارى 70 ءىس-شارادان تۇرادى. 2013 جىلدىڭ اياعىنا دەيىن 46 ءىس-شارانى, ال 2014 جىلى – 22 ءىس-شارانى ىسكە اسىرۋ كوزدەلگەن». ءىس-شارالار جوسپارى ءتورت نورماتيۆتىك-قۇقىقتىق اكتى جوباسىن ازىرلەۋدى كوزدەيدى. قۇجاتتار بيۋدجەتتىك زاڭنامانى جەتىلدىرۋ, مەملەكەتتىك ورگانداردا ساتىپ الۋلاردى جۇرگىزۋ, بيۋدجەتتى اتقارۋ ەرەجەلەرى ماسەلەلەرىنە قاتىستى.
ە.دوساەۆ بۇدان ءارى 6 ءىس-شارا بويىنشا مەملەكەت باسشىسىنا باياندامالار ەنگىزىلەتىنىن ايتتى. بۇل 2010-2014 جىلدارعا ارنالعان ءۇيدمب جۇزەگە اسىرۋ, مەملەكەتتىك بيۋدجەت قاراجاتى ەسەبىنەن قارجىلاندىرىلاتىن جوبالاردى ورىنداۋ, 2013-2015 جىلدارعا ارنالعان كولەڭكەلى ەكونوميكاعا قارسى ءىس-قيمىلدىڭ كەشەندى جوسپارىنىڭ ورىندالۋى, سالىق بازاسىن وسىرۋگە مۇددەلىلىكتى قامتاماسىز ەتۋ, الكوگول ونىمدەرى اينالىمىنا باقىلاۋدى كۇشەيتۋ, اۋىل شارۋاشىلىق ونىمدەردى قايتا وڭدەۋ ماسەلەلەرىنە قاتىستى بولماق.
مينيستر سونداي-اق, مەملەكەتتىك ورگاندارعا, ناقتى ايتقاندا ەكونوميكا جانە بيۋدجەتتىك جوسپارلاۋ, وڭىرلىك دامۋ, قارجى, يندۋستريا جانە جاڭا تەحنولوگيالار مينيسترلىكتەرىنە جوسپاردىڭ 42 ءىس-شاراسى تاپسىرىلاتىنىن ايتىپ, ولاردىڭ ورىندالۋ مەرزىمدەرىن مالىمدەدى.
وتىرىستا بۇدان باسقا, مەملەكەت باسشىسى تاپسىرمالارىنىڭ ورىندالۋ ببارىسى جونىندە قارجى ءمينيسترى ب.جامىشەۆ, ءبىلىم جانە عىلىم ءمينيسترى ا.ءسارىنجىپوۆ, يندۋستريا جانە جاڭا تەحنولوگيالار ءمينيسترى ءا.يسەكەشەۆ, اۋىل شارۋاشىلىعى ءمينيسترى ا.مامىتبەكوۆ, وڭىرلىك دامۋ ۆيتسە-ءمينيسترى ق.وسكەنباەۆ بايانداما جاسادى. ولاردا مەملەكەتتىك ساتىپ الۋ, الكوگول ونىمدەرى اينالىمى, بيۋدجەت قاراجاتىن يگەرۋ, كولەڭكەلى ەكونوميكاعا قارسى ءىس-قيمىل, ەكونوميكانى يندۋستريالاندىرۋ, اۋىل شارۋاشىلىق قايتا وڭدەۋ, اەا قىزمەتىنىڭ تيىمدىلىگى, «بيزنەستىڭ جول كارتاسى-2020» جۇزەگە اسىرۋ, تكش جەتىلدىرۋ باعدارلاماسى, جوبالىق-سمەتالىق قۇجاتتامانى ازىرلەۋ جانە ساراپتاۋ سفەراسىنداعى جۇمىستى جەتىلدىرۋ جونىندە وي قوزعالدى.
مەملەكەتتىك ورگانداردىڭ جۇمىسىنداعى ولقىلىقتارعا بايلانىستى ۇكىمەت باسشىسى يندۋستريا جانە جاڭا تەحنولوگيالاردىڭ ءبىرىنشى ۆيتسە-ءمينيسترى ا.راۋعا, وڭىرلىك دامۋ ۆيتسە-ءمينيسترى س.نوكينگە, قارجى ۆيتسە-ءمينيسترى ا.تەڭگەباەۆقا, دەنساۋلىق ساقتاۋ ۆيتسە-ءمينيسترى ب.توكەجانوۆقا, اۋىل شارۋاشىلىق ۆيتسە-ءمينيسترى م.تولىباەۆقا, مادەنيەت جانە اقپارات ۆيتسە-ءمينيسترى ا.قىرىقباەۆقا سوگىس بەردى. سونداي-اق, بىرقاتار كوميتەت توراعالارى جانە باسقا دا لاۋازىمدى تۇلعالار جازالاندى.
پاۆلودار جانە جامبىل وبلىستارىنىڭ اكىمدەرىنە قارجى ماسەلەلەرىنە جەتەكشىلىك ەتەتىن ورىنباسارلارىنا سوگىس جاريالاۋ تاپسىرىلدى.
ءوزىنىڭ سوزىندە س.احمەتوۆ: «ەگەر جىلدىڭ سوڭىنا قاراي جاعداي وزگەرمەسە, مەملەكەت باسشىسىنىڭ اتىنا ءبىرىنشى باسشىلاردى, ونىڭ ىشىندە اكىمدەردى جازالاۋ تۋرالى ۇسىنىستار ەنگىزۋگە قۇقىلى بولامىن», - دەگەندى ايتتى. ول سونداي-اق «مەملەكەت باسشىسىنىڭ تاپسىرمالارىن جانە بارلىق باعدارلامالىق قۇجاتتاردى ساپالى جانە ۋاقىتىلى ورىنداۋ قاجەتتىنە بارلىق مەملەكەتتىك ورگاندار, حولدينگتەر ءبىرىنشى باسشىلارىنىڭ جانە ءوڭىر اكىمدەرىنىڭ» نازارىن اۋداردى.
«اتقارۋشى بيلىك – بۇل, ەڭ الدىمەن, پرەزيدەنت ساياساتىن جۇزەگە اسىرۋ قۇرالى. بۇل تۋرالى بارلىعى, جەكەلەپ العاندا ۇكىمەت مۇشەسى, اكىم ەستە ساقتاۋى ءتيىس», - دەدى پرەمەر-مينيستر.
س.احمەتوۆ ايتىپ وتكەندەي, «ۇكىمەتتىڭ بارلىق ارەكەتتەرى اشىق جانە باق ارقىلى حالىققا جەتكىزىلۋى ءتيىس. بۇل جۇمىس جۇيەلى, تۇراقتى جانە بارىنشا اشىق بولۋى كەرەك». وسىعان بايلانىستى ول مادەنيەت جانە اقپارات مينيسترلىگىن «بارىنشا بەلسەندى بولۋعا, قىزمەتتىڭ اقپاراتتىق باعىتىن كۇشەيتۋگە» شاقىردى.
ۇكىمەت باسىشى وتىرىستى قورىتىندىلاي كەلىپ, «بارلىق مينيسترلەر جانە ءوڭىر اكىمدەرى وزدەرى قولداناتىن شارالاردىڭ تيىمدىلىگى مەن ناتيجەلىلىگىن انىقتاۋدى ءوز جۇمىستارى ارقىلى كورسەتۋلەرى ءتيىس» ەكەنىن اتاپ ءوتتى. «مەملەكەت باسشىسى تاپسىرمالارىنىڭ ورىندالۋىن ەندى ءبىز اپتا سايىن تىڭدايتىن بولامىز», - دەپ تۇيىندەدى س.احمەتوۆ.
سەرىك ق ۇلىمباي.
