بلوگەردىڭ ءوز اۋديتورياسى مەن قوعام الدىنداعى جاۋاپكەرشىلىگى ءاردايىم ماڭىزدى. جاسىراتىنى جوق, بلوگەرلەردى «بالەقورعا» تەڭەۋشىلەر دە, قورقىتىپ بوپسالايتىن الاياق دەۋشىلەر دە جوق ەمەس. جۋرناليستيكاعا ۇقساستىعى دا, اقپاراتتى جەتكىزۋدە وزگەشەلىگى دە بار بلوگەر اتىنا ايتىلاتىن سىنعا شامدانىپ قالاتىنىمىز دا راس. ء«يتىڭ ۇرى» دەسە نامىستاناتىن قازاقپىز. قاراپايىم حالىق بلوگەر مەن ءجۋرناليستى ءبىر سانايدى. جۋرناليستەردى ءتۇرلى ارەكەتىمەن, كەيدە ساۋاتسىزدىعىمەن ۇياتقا قالدىرىپ جۇرگەندەرى دە جەتەرلىك, مىنا وقيعا دا بىزگە اۋىر ءتيىپ وتىر. دەگەنمەن مۇنداي قىلمىسقا بارىپ وتىرعاندار بلوگەر ەمەس, بلوگەردىڭ اتىن جامىلعان الاياقتار ەكەنى انىق. وقيعاعا ورالايىق.
تۇركىستان وبلىسى پوليتسيا دەپارتامەنتى باستىعىنىڭ ورىنباسارى پوليتسيا پودپولكوۆنيگى قۇرمانبەك ساحوۆ حابارلاعانداي, جەرگىلىكتى 4 تۇرعىننان تۇراتىن ۇيىمداسقان قىلمىستىق توپ 6 اي بويى جەتىساي جانە ماقتاارال اۋداندارىنىڭ اۋماعىندا زاڭسىز جۇمىس ىستەگەن. ياعني جابىرلەنۋشىلەرگە وزدەرىن بلوگەر, جۋرناليست جانە زاڭگەر رەتىندە تانىستىرىپ وتىرعان ولار بوپسالاۋ مەن الاياقتىق ارقىلى جەكە كاسىپكەرلەر مەن قاراپايىم ازاماتتاردىڭ اقشالارىن يەمدەنگەن. جالپى العاندا, قىلمىسكەرلەر جابىرلەنۋشىلەرگە 2 000 000 تەڭگەدەن استام شىعىن كەلتىرگەن. ءتىپتى ولار ءوز قىزمەتىنە زاڭدىلىق بەرۋ ءۇشىن تۇتىنۋشىلاردىڭ قۇقىقتارىن قورعاۋ جانە سىبايلاس جەمقورلىققا قارسى كۇرەس تۇرىندە جالعان قوعامدىق ۇيىم اشقان. سونىمەن قاتار جالعان كۋالىكتەر مەن ەسىمحاتتار جاساعان.
«قىلمىسكەرلەر بارلىق ارەكەتتەردى بەينەتاسپاعا ءتۇسىرىپ, الەۋمەتتىك جەلىلەردە بەينەجازبالاردى جاريالايمىز دەپ قورقىتىپ, ولاردان اقشا تالاپ ەتكەن. مىسالى, 2019 جىلى ماقتاارال اۋدانىندا كۇدىكتىلەر قۇرىلىس الاڭدارىنىڭ بىرىنە بارعان. سودان قۇرىلىس جۇمىستارى ساپاسىز, بۇزۋشىلىقتارمەن جۇرگىزىلىپ جاتىر دەگەن سىلتاۋمەن قۇرىلىس فيرماسىنىڭ باسشىسىنان 500 مىڭ تەڭگە تالاپ ەتكەن. باسقا جاعدايدا, ياعني وتكەن جىلدىڭ كۇزىندە ەكولوگيانى قورعاۋ جەلەۋىمەن جەرگىلىكتى فيرمالاردىڭ ءبىرىنىڭ كەڭسەسىنە كەلىپ, ديرەكتوردان اي سايىن 100 مىڭ تەڭگە كولەمىندە تولەم تالاپ ەتكەن. جابىرلەنۋشى ءوز كەزەگىندە جەتىساي اپب-نە ارىزدانعان. «جاسالعان قىلمىستاردىڭ اۋىرلىعى مەن بىرەگەيلىگىن ەسكەرە وتىرىپ, قىلمىستى اشۋعا جانە تەرگەۋگە وبلىستىق كريمينالدىق پوليتسيا قىزمەتكەرلەرى مەن تەرگەۋشىلەرى اۋداندىق پوليتسيا قىزمەتكەرلەرىنە كومەككە جىبەرىلدى. ياعني, ءبىز اۋداندىق جانە وبلىستىق پوليتسيانىڭ ۇزدىك قىزمەتكەرلەرىنەن ارنايى جەدەل-تەرگەۋ توبىن قۇردىق. سوتقا دەيىنگى تەرگەۋ اياسىندا بارلىق قاجەتتى جەدەل جانە تەرگەۋ شارالارى جۇرگىزىلدى, جەتكىلىكتى دالەلدەر جيناقتالدى جانە قىلمىسكەرلەر اقشا الۋ كەزىندە ۇستالدى. وسى قىلمىستىق توپتىڭ ءار قاتىسۋشىسىنىڭ 10 اي ىشىندەگى كىناسى تولىعىمەن دالەلدەندى. سونىمەن قاتار بۇل توپ ۇيىمداسقان سيپاتتا بوپسالاۋ مەن الاياقتىقتىڭ 17 جايتىنا قاتىستى بولىپ شىقتى», دەيدى پوليتسيا پودپولكوۆنيگى قۇرمانبەك ساحوۆ.
پوليتسيا دەپارتامەنتىنىڭ حابارلاۋىنشا, قىلمىستىق توپتىڭ ۇيىمداستىرۋشىسى مەن مۇشەلەرى قر قك-ءنىڭ 262-بابىنىڭ 1-بولىگىندە «ۇيىمداسقان توپ, قىلمىستىق ۇيىم قۇرۋ جانە وعان باسشىلىق ەتۋ, سول سياقتى ولارعا قاتىسۋ», 194-بابىندا «قورقىتىپ الۋشىلىق» جانە 190-بابىندا «الاياقتىق» كوزدەلگەن قىلمىستاردى جاساعانى ءۇشىن 10 جانە 8 جىلعا باس بوستاندىعىنان ايىرىلدى.
ءبىر ۋاقىتتا بىرەۋدىڭ ءحوببيى, ەرىككەندەگى ەرمەگى بولعان بلوگ جازۋىڭىز بۇگىندە كاسىپكە اينالعان. راس, بلوگەردىڭ جازعانى مەن جۇمىسىن ۇستىنەن قارايتىن باستىعى, بەكىتىلگەن جۇمىس رەجىمى جوق. دەگەنمەن بۇگىندە ەلگە تانىلىپ ۇلگەرگەن, اقپارات تاراتۋدا وزىندىك ەرەكشەلىكتەرى بار بلوگەرلەر ءوز ىسىنە, ءار سوزىنە جاۋاپكەرشىلىكپەن قاراپ, تارتىپكە, زاڭعا باعىنۋ سىندى تالاپتاردى جادىنان شىعارمايتىنى انىق. ياعني «بلوگەرمىن» دەيتىندەرمەن سويلەسپەس بۇرىن جان-جاقتى تەكسەرىپ, انىقتاپ العان, قۇقىقتىق ساۋاتتى ارتتىرعان ءجون. وسى ورايدا تۇركىستان وبلىسىنىڭ پوليتسەيلەرى ازاماتتاردى قىراعى بولۋعا جانە ءتۇرلى الاياقتارعا سەنبەۋگە شاقىرۋدا.
تۇركىستان وبلىسى
