سىيلىقتى تاعايىنداۋشىلاردىڭ پىكىرىنشە, ەتۆۋد شىعارمالارى كوركەمدىك قۋاتىنان بولەك الەۋمەتتىك قۇندىلىققا دا يە. بۇل ادەبيەتتىڭ الەم تاعدىرىنا ءسوزسىز ىقپال ەتەتىندىگىن دالەلدەپ قانا قويماي, ءتۇرلى ەلدەردىڭ ادامدارى اراسىندا ورتاق ادىلدىك پەن ءوزارا تۇسىنىستىكتىڭ ورناۋىنا اسەر ەتەدى.
قازىلار القاسىنىڭ ءتورايىمى شەرون رابتىڭ اتاپ وتكەنىندەي, ەتۆۋدتىڭ الەم ادەبيەتىنە قوسقان ۇلەسى ولشەۋسىز: ء«وز روماندارى ارقىلى مارگارەت ەتۆۋد مۇمكىن ەمەس ەشتەڭە جوقتىعىن ءبىزدىڭ ەسىمىزگە ۇنەمى سالىپ وتىرادى. وزگەرىستەر, بالكي, ولار جاعىمدى بولماۋى دا مۇمكىن, ومىرىمىزدە اياق استىنان ورىن الۋى ىقتيمال. دەموكراتيا زاڭدارىنا كۇمان كەلتىرىلە باستاعان بۇگىنگى كۇندەرى اۆتور كىتاپتارىنىڭ ماڭىزدىلىعى ارتا تۇسەدى».
شىعارمالارىنداعى جاعىمسىز بولجامدارعا قاراماستان, ەتۆۋد ءوزىن پەسسيميستەر قاتارىنا قوسۋعا اسىقپايدى ەكەن. ونىڭ ويىنشا, قازىرگى زاماندا وپتيميزمگە تولى رەاليست بولىپ قالۋ قاجەت – ءبىز سوندا عانا كەز كەلگەن قيىندىقتى وڭاي ەڭسەرىپ قويماي, اۋقىمدى وزگەرىستەرگە ىقپال ەتە الامىز.
ايتا كەتەيىك, مارگارەت ەتۆۋد – زاماناۋي ادەبيەتتىڭ ەڭ كورنەكتى اۆتورلارىنىڭ ءبىرى. ول ارقايسىسى وقىرمان جۇرەگىنە جول تاپقان ون جەتى رومان جازعان, ال اقش-تىڭ سۇمدىققا تولى توتاليتارلىق بولاشاعىن سيپاتتايتىن «قىزمەتشى ايەلدىڭ اڭگىمەسىنىڭ» جالعاسى بولىپ تابىلاتىن «وسيەتتەر» كىتابى جىلدىڭ ەڭ كوپ ساتىلعان كىتابىنا اينالدى.
