كەڭەسكە ورتالىق مەملەكەتتىك ورگانداردىڭ وكىلدەرى, وبلىس اكىمدەرىنىڭ ورىنباسارلارى, كاسىپوداق ۇيىمدارى مەن جۇمىس بەرۋشىلەر بىرلەستىكتەرىنىڭ وكىلدەرى قاتىستى. وتىرىستى اشقان ە.توعجانوۆ قازىرگى جاعدايدا جۇمىس ورىندارىنىڭ ساقتالۋىن, جالاقىنىڭ ۋاقتىلى تولەنۋىن قامتاماسىز ەتۋ, ەڭبەك جانجالدارىنىڭ الدىن الۋ سياقتى ماسەلەلەر بۇرىنعىدان دا وزەكتى ەكەنىن اتاپ ءوتتى. ۆيتسە-پرەمەر جۇمىس بەرۋشىلەر مەن جۇمىسشىلاردىڭ مۇددەلەرىن قورعايتىن كاسىپوداقتاردىڭ وسى باعىتتاعى باعا جەتپەس ۇلەسىن ەرەكشە اتاپ ءوتتى.
ەڭبەك قاتىناستارىن رەتتەۋ ءۇشىن الەۋمەتتىك ارىپتەستىكتىڭ ماڭىزى زور. ەڭبەك جانە حالىقتى الەۋمەتتىك قورعاۋ ءمينيسترى ب.نۇرىمبەتوۆ, سونداي-اق وبلىس اكىمدەرىنىڭ ورىنباسارلارى الەۋمەتتىك شيەلەنىستەردىڭ الدىن الۋ جانە الەۋمەتتىك-ەڭبەك جانجالدارىن شەشۋ جونىندەگى كەشەندى جوسپاردىڭ ىسكە اسىرىلۋى, سونداي-اق وندىرىستىك جاراقاتتاردىڭ سانىن ازايتۋ شارالارى تۋرالى باياندادى. سونىمەن قاتار رەسپۋبليكالىق ۇشجاقتى كوميسسيانىڭ قاراۋىنا ۇكىمەت پەن كاسىپوداق ۇيىمدارىنىڭ جانە جۇمىس بەرۋشىلەر بىرلەستىكتەرىنىڭ اراسىنداعى 2021-2023 جىلدارعا ارنالعان باس كەلىسىمنىڭ جوباسى ۇسىنىلدى. جاڭا كەلىسىم حالىقارالىق ەڭبەك ۇيىمى ۇسىنىلاتىن تاسىلدەر مەن ينديكاتورلارىنا سايكەس ازىرلەنۋدە. وسى ماسەلە بويىنشا قازاقستان كاسىپوداقتار فەدەراتسياسىنىڭ توراعاسى ساتىبالدى داۋلەتالين ءوز ۇسىنىستارىن ورتاعا سالدى.
القالى جيىن سوڭىندا ە. توعجانوۆ ورتالىق مەملەكەتتىك جانە جەرگىلىكتى اتقارۋشى ورگاندارعا بىرقاتار تاپسىرما بەردى. وندا وندىرىستىك پروتسەستەردى تۇراقتاندىرۋ جانە ازاماتتاردىڭ ەڭبەك قۇقىقتارىن قامتاماسىز ەتۋ ماسەلەلەرى بويىنشا مەموراندۋمدار جاساۋ جونىندەگى جۇمىستى جانداندىرۋ, جۇمىسپەن قامتۋعا جاردەمدەسۋ بويىنشا جەدەل شارالار قابىلداي وتىرىپ, قىزمەتكەرلەردىڭ بوساتىلۋىنا مونيتورينگتى كۇشەيتۋ, جالاقى جانە الەۋمەتتىك تولەمدەر بويىنشا بەرەشەكتى ازايتۋ جونىندە پارمەندى شارالار قابىلداۋ جانە باسقالارى قامتىلدى.
