شاراعا قاتىسقان ۋنيۆەرسيتەت رەكتورى عالىمقايىر مۇتانوۆ, قازاقستاننىڭ ۇلىبريتانياداعى توتەنشە جانە وكىلەتتى ەلشىسى, عالىمنىڭ ۇلى ەرلان ىدىرىسوۆ پەن قىزى قۇرالاي ابىلفايىزقىزى, جۋرناليستيكا فاكۋلتەتىنىڭ دەكانى ساعاتبەك مەدەۋبەك جانە زيالى قاۋىم وكىلدەرى ءا.ىدىرىسوۆ اتىنداعى وقۋ-وندىرىستىك ءدارىسحانانىڭ اشىلۋ راسىمىنە قاتىسىپ, قايراتكەر شىعارماشىلىعىنا قاتىستى قۇندى قۇجاتتارمەن تانىستى.
كونفەرەنتسيانىڭ اشىلۋ سالتاناتىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆ كىرىسپە ءسوز سويلەپ, ءابىلفايىز ىدىرىسوۆتاي تۇلعانىڭ قازاق جۋرناليستيكاسىنىڭ دامۋىنا قوسقان سۇبەلى ەڭبەكتەرىنە توقتالىپ ءوتتى.
قازاقستاننىڭ ەڭبەك سىڭىرگەن قايراتكەرى ءابىلفايىز ىدىرىسوۆ «قازاقستان پيونەرى» گازەتى رەداكتسياسىندا ادەبي قىزمەتكەر, ءبولىم مەڭگەرۋشىسى, رەداكتورى «لەنينشىل جاس» گازەتىندە جاۋاپتى حاتشى, ءال-فارابي اتىنداعى قازاق ۇلتتىق ۋنيۆەرسيتەتىندە اعا وقىتۋشى, دوتسەنت, پروفەسسور بولىپ ەڭبەك ەتتى. وسى جىلدار ىشىندە ونىڭ قالامىنان شىققان سەگىز جۇزدەن استام پۋبليتسيستيكالىق ماقالا, وچەركتەرىن, گازەت بەزەندىرۋ, پوليگرافيا ىسىنە ارناسا, ماقالالاردى وڭدەۋ جانە رەداكتسيالاۋ شەبەرلىگىنە بايلانىستى «قازاق جۋرناليستيكاسىنىڭ تاريحى», «وچەرك جۋرناليستيكا جانرى رەتىندە», «باسپا ونىمدەرىن اسەمدەۋ», تاعى باسقا دا ادىستەمەلىك قۇرالدارى مەن وقۋلىقتارى بۇگىندە قازاق جۋرناليستيكاسىنىڭ شەبەرحاناسىندا جوعارى سۇرانىسقا يە ەڭبەكتەر قاتارىندا اتالادى. ال م.اۋەزوۆ تۋرالى «اۋەزوۆكە ىڭكارلىك» دەگەن عىلىمي-ەسسە كىتابى, «احاڭ مەن «قازاق» گازەتى جايلى اقيقات», «ادامزات مادەنيەتىنىڭ وركەنى», «قاراقايلىنى بيلەگەن قازاقتار», «قازاقتىڭ اتتارى بەيمالىم پاتشالارى, باسپاگەرلەرى», «Skun كاساك-كوسەم قازاق», «تەرەڭ تاريحتىڭ وشپەس ءىزى» زەرتتەۋلەرى دە عىلىمي ورتاعا كەڭىنەن ءمالىم. پروفەسسوردىڭ شىعارماشىلىعىنداعى «بەرىك», «ايجاننىڭ عاشىعى», «اڭساعان مەنىڭ ءانىمسىڭ», «اقسۇيەك», «كەر بۇزاۋدىڭ ءولىمى» پوۆەستەرىن, «تاڭشولپان» رومانى ادەبيەتىمىزگە قوسىلعان سۇبەلى ەڭبەكتەرى قاتارىندا اتالادى.
« ۇلى مۇحتار اۋەزوۆتىڭ كوزىن كورگەن, تاۋمان اماندوسوۆتىڭ ءوزى «التاي» دەپ ەركەلەتكەن, تەمىربەك قوجاكەەۆتىڭ ۇزەڭگىلەسى بولعان دارا تۇلعا» دەگەن تىركەستەرمەن ەسىمى ورىلەتىن عالىمنىڭ شاكىرتتەرى وسى كونفەرەنتسيا اياسىندا ءسوز الىپ, عالىمنىڭ ۇستازدىق جىلدارىمەن بايلانىستى ەستەلىكتەرىمەن ءبولىستى. ولاردىڭ قاتارىندا اقىن, قازاقستان جازۋشىلار وداعى توراعاسىنىڭ ورىنباسارى, ف.ع.د., پروفەسسور باۋىرجان جاقىپ, جازۋشى, باسپاگەر, جۋرناليست ىرىم كەنەنباەۆ, «قازاقستان رترك» اق باسقارما توراعاسىنىڭ كەڭەسشىسى نۇرتىلەۋ يمانعالي ۇلى ت.ب. بار.
باسقوسۋ قازۇۋ تەلەراديوكەشەنى دايىنداعان ءابىلفايىز ىدىرىسوۆ تۋرالى دەرەكتى فيلممەن جالعاسىن تاپتى. حالىقارالىق كونفەرەنتسيا ءارى قاراي ءا. ىدىرىسوۆتىڭ ومىرىمەن, شىعارماشىلىعىمەن بايلانىستى شارالارعا ۇلاسىپ, عالىم تۋرالى كىتاپتاردىڭ تۇساۋكەسەرى ءوتتى. كونفەرەنتسيا سوڭىنا قاراي عالىمنىڭ ۇلى ەرلان ىدىرىسوۆ فاكۋلتەتتىڭ ۇزدىك ستۋدەنتتەرىنە ارنايى شاكىرتاقى تابىس ەتتى.
