ءساماتالى مەن ءساناتالى تولتاەۆتار 1999 جىلى 11 قاراشادا دۇنيەگە كەلگەن. الماتى قالاسىندا سپورت الەمىنە قادام باسىپ, قازىردە ەل ىشىندەگى جارىستاردا ماڭعىستاۋ وبلىسىنىڭ, حالىقارالىق دودادا ەل نامىسىن ابىرويمەن قورعاپ جۇرگەن بىلعارى قولعاپ شەبەرلەرى.
قوس بوكسشى جاسوسپرىمدەر مەن جاستار اراسىندا باق سىناعان بارلىق ءدۇبىرلى دودادا توپ جارىپ, ەرەسەكتەر اراسىندا دا ءۇمىتتى اقتاپ ءجۇر. قازاقستان چەمپيوناتى مەن قازاقستان سپارتاكياداسىندا دا جەڭىس تۇعىرىنا كوتەرىلىپ ۇلگەرگەن قوس باۋىر بۇگىندە قازاقستاننىڭ حالىقارالىق دارەجەدەگى سپورت شەبەرى اتاعىن العان. ءبىزدىڭ بۇگىنگى كەيىپكەرلەرىمىزدىڭ جان-دۇنيەسى سپورتقا جات بولماعان. ءتىپتى ەگىز ۇلدى اكەسىنىڭ ءوزى سپورتقا جەتەكتەپ الىپ كەلگەن.
ء«بىز اۋلەتىمىزدىڭ, اتا جولىن جالعاستىرۋشىلارمىز. سەبەبى اتامىز دا, اكەمىز دە, اعالارىمىز دا كەزىندە بوكسپەن شۇعىلدانعان بىلعارى قولعاپ شەبەرلەرى. سپورتقا كەلۋىمىزگە دە اكەمىز سەبەپشى بولدى. كىشكەنتاي كەزىمىزدەن تىنىمسىز, بۇزىق, كوپ توبەلەسەتىن بولعاندىقتان اكەمىز كۇشتەرىڭدى بالالارعا ەمەس, زالدا شىعارىڭدار دەپ, بوكس زالىنا اكەلدى. ءسويتىپ 9 جاسىمىزدا بوكس مەكتەبىنىڭ ەسىگىن اشتىق», دەپ ەسىنە الدى ءساماتالى.
«وتباسىمىز سپورتپەن ەتەنە تانىس بولعاندىقتان, كىشكەنتاي كەزىمىزدەن ءبىزدى جاقىندارىمىز قولداپ وتىردى. وتباسىمىزدىڭ ءاربىر مۇشەسى شىن جانكۇيەرىمىز اتانىپ, تىلەۋىمىزدى تىلەپ جۇرەدى. سوندىقتان ءبىر ۇيدەن ەكى بالانىڭ بىردەي ءبىر سپورتپەن شۇعىلدانىپ جۇرگەنى ەشقانداي ماسەلە تۋىنداتپادى. كەرىسىنشە, اتا جولىن جالعاستىرۋشى بولعاندىقتان بىزگە جىلى شىراي تانىتتى. ءبىر ۇيدەن باۋىرلاردىڭ, ەگىزدەردىڭ ءبىر سپورت تۇرىمەن شۇعىلدانعانىنىڭ كەمشىلىگى جوق سياقتى. ەكەۋمىز دە ءبىر سپورتقا قىزىققاندىقتان بىرگە تالقىلاپ, جاتتىعۋدى بىرگە جاسايمىز. ءبىر-بىرىمىزبەن تاجىريبە الماسىپ وتىرامىز», دەيدى ءساناتالى.
وسىدان ءۇش جىل بۇرىن, ياعني 2017 جىلى تايلاند استاناسى بانگكوك قالاسىندا وتكەن بوكستان جاستار اراسىنداعى ازيا چەمپيوناتىندا اعايىندى تولتاەۆتار سارى قۇرلىقتىڭ مىقتىسى اتاندى. ءبىر قىزىعى, بۇل قازاق بوكسىنىڭ تاريحىندا اعايىندى بوكسشىلاردىڭ ءبىر چەمپيوناتتا تۇڭعىش رەت توپ جارۋى ەدى. سول جىلى عالىم كەنجەبەكوۆ باپتاعان قازاقستان جاستار ۇلتتىق قۇراماسى ازيا بىرىنشىلىگىنە تولىق قۇرامدا قاتىسىپ, جالپى سانى جەتى مەدال ولجالادى. 60 كيلوداعى ءساماتالى فينالدا جەرگىلىكتى تاي بوكسشىسى ساكدا رۋامتامدى ۇتسا, ءساناتالى (64 كگ) وزبەكستاندىق بىلعارى قولعاپ شەبەرى بيلولبەك ءميرزاراҳيموۆتى جەڭدى.
ەڭ العاشقى جارىسىنا 10 جاستارىندا قاتىسقان ەگىزدەردىڭ ءا دەگەندە جولدارى بولا قويماپتى. قالا ىشىلىك جارىستا باق سىنعان اعايىندىلاردىڭ ەكەۋى دە جۇلدەگە قول سوزىم جەردە ءسۇرىنىپ, ءتۋرنيردى ەكىنشى ورىنمەن اياقتاعان. «جارىستا جەڭىلىس تاپقانىمىزعا قاراماستان ەڭسەمىزدى تۇسىرمەي, ەكىنشى ورىندى قاناعات تۇتتىق. كەرىسىنشە, ءبىزدىڭ التىنعا قول سوزىم جەردەن توقتاعانىمىز كەلەسى جارىستا جەڭىمپاز اتانۋعا تۇرتكى بولدى. ناتيجەسىندە, قاتەمەن جۇمىس ىستەپ, ولقىلىقتىڭ ورنىن تولتىردىق. ۇتىلىپ قالعان جارىسىمىزدان كەيىن بىردەن كەلەسى دودادا جەڭىمپاز اتانىپ, توپ جارىپ شىقتىق», دەيدى ءساناتالى. «جارىس بارىسىندا ءبىر-بىرلەرىڭدى الماستىرىپ, رينگكە شىققان كەزدەرىڭ بولدى ما؟», دەگەن سۇراعىمىزعا «كىشكەنتاي كەزىمىزدە دە, ەس جيىپ ەرەسەك بولعالى دا ونداي الاياقتىق جاساپ كورمەپپىز», دەپ جاۋاپ بەردى.
اعالى-ءىنىلى تولتاەۆتار سپورتتاعى جولىن اعايىندى-بوكسشى كليچكولار سىندى ءساتتى جالعاستىرعاندى قالايدى. شارشى الاڭدا ەكەۋى بىردەي قارسىلاس شاق كەلتىرمەي, ۇزدىكتەر كوشىن باستاعىلارى كەلەدى. بولاشاقتا ەل ماقتانىشى گەننادي گولوۆكينگە ۇقساعىسى كەلەتىنىدەرىن دە جاسىرمايدى.
