قالا اكىمى بولات جۇمابەكوۆ جۋىردا عانا قىسقا دايىندالۋ مۇمكىندىگى تومەن ۇيلەردى ارالاپ, تۇرعىندارمەن كەزدەستى.
«قىسقا دايىندىقتا پاتەر يەلەرى كووپەراتيۆتەرىنىڭ باسشىلارىنا عانا قاراپ وتىرا بەرۋگە بولمايدى. ءاربىر تۇرعىن بۇل ىسكە بەلسەندى ارالاسۋى كەرەك. مىنا ۇيدە پيك تە قۇرىلماعان. ىستىق سۋدىڭ قىسىمىن تەكسەرۋگە دە ءۇي دايىن ەمەس. سوندىقتان ءبارىڭىز بىرلەسىپ, قىسىمدى تەكسەرۋگە دەرەۋ اقشا جيناۋلارىڭىز كەرەك», دەدى ول ماياكوۆسكي كوشەسىندەگى №93 ءۇيدىڭ اۋلاسىندا تۇرعىندارمەن كەزدەسكەندە.
ال ءۇيدىڭ پيك-ءسىز, قوعامدىق نەگىزدە سايلانعان باسشىسى گ.دارىباەۆا تۇرعىنداردىڭ قىسىمدى تەكسەرتۋگە قاجەتتى 35 مىڭ تەڭگەنى جيناپ بەرە الماي وتىرعانىن ايتتى. اكىممەن كەزدەسۋگە كەلگەندەر مۇنداي جايباسارلىقتى قويىپ, وزگە ەمەس وزدەرى ءۇشىن دەرەۋ اقشا جيناۋعا ۋادەلەرىن بەرىپ تارقادى. بارلىعى 140 پاتەردەي بولاتىن ءۇيدىڭ اينالاسى 35 مىڭ تەڭگەنى جيناپ بەرە الماي وتىرعانى اقىلعا سىيمايتىن ءىس. گ.دارىباەۆا تۇرعىنداردىڭ ءالى دە ماسىلدىق پيعىلدا ەكەنىن ايتتى.
«بىزگە اكىمدىك ىستەپ بەرۋلەرى كەرەك», دەيدى تۇرعىندار. «سەنىڭ پاتەرىڭ جەكەمەنشىك, نەگە ساعان اكىمدىك جاساپ بەرۋگە ءتيىس», دەپ ولارمەن ۇنەمى تالاسىپ جاتامىن», دەيدى ول.
جالپى, پەتروپاۆل قالاسىندا 1 090 كوپقاباتتى ءۇي بار. سونىڭ 1022-سىندە بۇگىنگە دەيىن سۋ قىسىمىنا دايىندىق تەكسەرىلدى. قالعان ۇيلەر اكىمدىكتىڭ قاداعالاۋىنا الىنىپ, ونداعى جۇمىستىڭ تەزىرەك اتقارىلۋى تەكسەرىلۋدە. تەك قانا دايىندىق پاسپورتى قولدارىندا تۇرعان ۇيلەرگە عانا جىلۋ بەرىلەدى دەپ جىلۋ ورتالىعى دا قۇلاقتاندىرۋلارىن ىلۋدەن تانار ەمەس.
قالا اكىمدىگى 2019-2020 جىلدارداعى قىسقى ماۋسىمدا جىلۋ بويىنشا تۇسكەن ارىز-شاعىمداردى تەكسەرىپ, وندا كورسەتىلگەن ولقىلىقتار بويىنشا شارا بەلگىلەۋدە. بارلىق 179 شاعىمدى كوتەرگەندە بيىل دا سول ۇيلەردىڭ 74-ىندە بىلتىرعى جاعداي جالعاسىپ كەلە جاتقانى انىقتالدى. بۇل ۇيلەر سۋ قىسىمىن تەكسەرۋگە اسىعار ەمەس, ءالى كۇنگە دايىندىق پاسپورتتارىن الماعان. مىنە, وسى ۇيلەر اكىمدىكتىڭ قاتاڭ قاداعالاۋىنا الىنعانىنىڭ ناتيجەسىندە 42 ۇيدە قىسىمدى تەكسەرۋ جۇرگىزىلدى.
جوعارىدا ايتقانىمىزداي, ورتالىقتان جىلىتىلاتىن 1022 ءۇي جىلۋ قابىلداۋعا دايىن بولىپ, پاسپورتتارىن الدى. بۇل بارلىق ءۇيدىڭ 93,3 پايىزى دەگەن ءسوز. بىلتىرعى سايكەس مەرزىممەن سالىستىرعاندا, بۇل – وزىق كورسەتكىش. بىلتىر ءدال وسى ۋاقىتتا 723 كوپ قاباتتى ءۇي عانا دايىندىق ساپىنا قويىلعان ەدى. دەمەك, بيىلعى دايىندىق بىلتىردان 27,4 پايىزعا جوعارى بولىپ وتىر. دايىندىق جۇمىستارى 20 قىركۇيەكتە اياقتالادى دەپ بەلگىلەنگەن. كەيىنگى ءۇش جىلدا ول 23 قىركۇيەككە دەيىن سوزىلىپ, جىلۋ بەرۋ ماۋسىمى ءۇش كۇنگە كەشىكتىرىلۋدە. قىركۇيەكتىڭ قارا سۋىعى جەدەل ءتۇسىپ كەتسە, بۇل كۇندەرى جاس بالاسى جانە قارت ادامدارى بار ۇيلەر بۇرسەڭ قاعادى.
قالاعا جىلۋ بەرەتىن «پەتروپاۆل جىلۋ جۇيەلەرى» جشس جىلۋ بەرۋ ماۋسىمىنا نەگىزىنەن دايىن. وزدەرىنىڭ باعدارلاماسىنا سايكەس ولار جىلۋ بەرۋدى الدىمەن بالاباقشالار, ەمدەۋ جانە وقۋ ورىندارىنان باستايدى. سودان كەيىن قالانىڭ شاعىن اۋداندارىنان باستاپ جىلۋ بەرەدى. بيىلدىڭ جىلۋ باعاسىن مونوپولياعا قارسى كوميتەت گ/كاللورياسىنا 2 740 تەڭگە كولەمىندە بەكىتكەن.
«پەتروپاۆل جىلۋ جۇيەلەرى» جشس بيىل 14 شاقىرىم جىلۋ بەرۋ جۇيەلەرىن جاڭارتۋدى جوسپارلاعان. قازىر سونىڭ نەگىزگى بولىگى اياقتالدى. بىراق وزدەرى الداعى ۋاقىتتا جاڭارتۋ جۇمىستارىن ارتتىرۋ قاجەتتىگىن ايتادى. ءبىر ايتارلىعى, سەرىكتەستىك وكىلدەرى بەكىتىلگەن ءتاريفتىڭ تىم تومەن ەكەندىگىن العا تارتادى. ماسەلەن, كاسىپورىننىڭ باس ديرەكتورى اندرەي كالينيچەۆ جىلۋ جۇيەلەرىندەگى بارلىق جابدىقتاردىڭ 70 پايىزعا, ماگيسترالدىق جۇيەلەردىڭ 76 پايىزعا توزعاندىعىن ايتادى.
ء«بىز جىل سايىن كەم دەگەندە 18,4 شاقىرىمنىڭ قۇبىرلارىن اۋىستىرۋىمىز كەرەك. وكىنىشكە قاراي, ءبىز بۇگىنگى تاريفپەن بۇل جۇمىستاردى اتقارا المايمىز», دەيدى ول.
قالاي دەسەك تە ەلىمىزدىڭ سولتۇستىك قاقپاسى قىس ماۋسىمىن قارسى الۋعا نەگىزىنەن دايىن دەپ ايتا الامىز.
سولتۇستىك قازاقستان وبلىسى
