ايماقتار • 18 قىركۇيەك، 2020

ءۇش ءتىلدىڭ ۇزدىكتەرى انىقتالدى

18 رەت كورسەتىلدى

مادەنيەت جانە سپورت مينيسترلىگىنىڭ ءتىل ساياساتى كوميتەتى ش.شاياحمەتوۆ اتىنداعى ء"تىل-قازىنا" ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن قازاقستان حالقى تىلدەرى اياسىندا وتكەن ء"تىل شەبەرى" رەسپۋبليكالىق ونلاين بايقاۋى ءوز مارەسىنە جەتتى، دەپ حابارلايدى Egemen.kz

ءتىل ساياساتى كوميتەتىنىڭ توراعاسى ادىلبەك قابا قاتىسۋشىلاردى قۇتتىقتاپ، مەملەكەتتىك ءتىلدىڭ مارتەبەسىنە ايرىقشا توقتالدى: "شەت ەلدەرمەن حالىقارالىق بايلانىس ارتقان سايىن، كوپ ءتىل بىلەتىن جاس ۇرپاق تاربيەلەۋ قاجەتتىلىگى دە كۇن تارتىبىنە شىقتى. بۇل بايقاۋدىڭ باستى ماقساتى جاھاندىق وركەنيەت پەن ەلىمىزدىڭ  دامۋ باعىتىنا ساي  ءۇش ءتىلدى – قازاق، ورىس جانە اعىلشىن تىلدەرىن جەتىك مەڭگەرگەن، جان-جاقتى ءبىلىمدى جاستاردى انىقتاپ، قولداۋ كورسەتۋ. بىراق، ءبىر نارسەنى باسا ايتقىم كەلەدى، انا ءتىلىڭ ارقاشان بيىكتە تۇرۋى كەرەك. ويتكەنى، ۇلت ۇستازى احمەت بايتۇرسىنوۆ ايتقانداي، ء"تىلى جوعالعان ۇلتتىڭ ءوزى دە جوعالادى». عالىمداردىڭ ەسەپتەۋىنشە، ءاربىر ون ءتورت كۇن سايىن ءبىر ءتىل جوعالىپ وتىرادى ەكەن. سىرتتان ەشكىم كەلىپ، تىيىم سالىپ جاتقان جوق. قولدانىس اياسى كەمىگەندىكتەن ءورىسى تارىلادى. سول سەكىلدى كۇندەلىكتى تۇرمىستا قازاق ءتىلىن ەكىنشى كەزەككە ىسىرا بەرسەك، قولدانىستان ەرىكسىز شىعاتىن ءسوز قاتارى كوبەيە بەرەدى. سوندىقتان، انا ءتىلىمىزدىڭ ابىرويىن اسقاق ۇستاڭىزدار"، دەدى ول.

ءتىل بايگەسىنە ەلىمىزدىڭ تۇكپىر-تۇكپىرىنەن 16 ۇمىتكەر قاتىسسا، بايقاۋدىڭ ءار كەزەڭىنە كاسىبي ساراپتاما جاساپ، باعا بەرگەن قازىلار القاسى تالانتتى جاستار قاتارى ءوسىپ كەلە جاتقانىنا توقتالدى. ولاردىڭ پىكىرىنشە، جارىسقا قاتىسۋشىلار اعىلشىن ءتىلىن جاقسى مەڭگەرگەن، ال انا تىلىندە ەسسە جازۋ بارىسىندا شۇرايلى ويىن شىرايلى ەتىپ بەينەلەي العانى قۋانتارلىق ەكەن.

شارا مودەراتورى ش.شاياحمەتوۆ اتىنداعى ء"تىل-قازىنا" ۇلتتىق عىلىمي-پراكتيكالىق ورتالىق ديرەكتورىنىڭ ورىنباسارى ايدوس ابدىحالىق جاستارمەن ەكسپرەسس-سۇقبات ۇيىمداستىرىپ، ولاردىڭ ەلىمىزدەگى تىلدىك احۋال بويىنشا ءوزارا پىكىر الماسۋىنا مۇمكىندىك تۋدىردى. ارا-اراسىندا ونەرگە كەزەك بەرىپ وتىردى. مۇنىڭ ءبارى سايىستىڭ تارتىمدى، ءوزارا تىعىز بايلانىستا وتۋىنە يگى اسەر ەتتى.

قازىلار القاسىنىڭ شەشىمى بويىنشا جۇلدە قورى 300 مىڭ تەڭگەلىك باس جۇلدەنى قوستانايلىق سۇلەيمەن بەرىكباي ۇلىنىڭ قانجىعاسىنا بايلانسا،  ءبىرىنشى ورىندى الماتىلىق ازامات ابزالبەك ءادىلحان يەلەنىپ،  250 مىڭ تەڭگە سىيلىق الدى. ەكىنشى ورىن مەن 150 مىڭ تەڭگە سىيلىق الماتى وبلىسىنىڭ جاس تۇرعىنى قانات جاقسىباەۆقا بۇيىردى. ءۇشىنشى ورىندى شىمكەنت قالاسىنان كەلگەن اقەركە بەكبولاتوۆا مەن قاراعاندى وبلىسىنىڭ ۇمىتكەرى ءامىرحان ورالبەكوۆ ءبولىسىپ، ارقايسىسى 100 مىڭ تەڭگە ولجاعا يە بولدى. بۇلاردىڭ سىرتىندا بەلسەندىلىك تانىتقان اقتوبەلىك نارقوزى ەسەنكەلدى ۇلى، كەرەكۋلىك ماقپال ەركىنقىزى، جامبىلدىق الديار باۋىرجان ۇلى 50 مىڭ تەڭگە سىيلىق جانە العىس حاتپەن ماراپاتتالدى.

 

سوڭعى جاڭالىقتار

ۇقساس جاڭالىقتار