باعىندىراتىن ءبىر بەلەس بار

وسى كۇندەرى بەيجىڭ وليمپياداسىنىڭ چەمپيونى باقىت سارسەكباەۆتىڭ بوكس فەدەراتسياسىندا جۇمىس ىستەيتىنىن جانكۇيەرلەر جاقسى بىلسە كەرەك. ونىڭ قازىرگى قىزمەتى – ۇلتتىق قۇرامانىڭ جۇمىسىن ۇيلەستىرۋ. بۇل جۇمىسقا باقىت­تى ونىڭ وليمپيادادان كەيىن ءبىراز ۋاقىت تىنىعىپ, جاراقاتىن ەمدەپ العان سوڭ فەدەراتسيا باسشىلىعى ءوز ىسىنە جاۋاپتى, بوكستىڭ بارلىق قىر-سىرىن بىلەتىن مامان­دار­دى تارتىپ, باپكەرلەرمەن, ءوزىنىڭ وكشەسىن باسىپ كەلە جات­قان بىلعارى قولعاپ شەبەرلەرىمەن جۇمىس ىستەۋ ماقساتىندا شاقىرعان بولاتىن. سودان بەرى, مىنە, ءبىراز ۋاقىت ءوتتى. ب.سارسەكباەۆتى تۋرنيرلەر مەن جارىستاردا ءجيى كەز­دەس­تى­رەمىز. جاقىندا ونىمەن بوكس فەدەراتسياسىندا ءجۇز­دەسۋدىڭ ءساتى ءتۇسىپ ەدى. وعان العاشقى ساۋالىمىز دا بوكسقا قايتىپ كەلۋگە نيەتى بار-جوعىن بىلۋگە قاتىستى قويىلدى. – بوكسقا قايتا ورالۋىم تۋرالى ماسەلە ءالى تولىق شەشىلگەن جوق. ونىڭ ءبارىن ۋاقىت كورسەتەدى. – ەگەر بوكسقا قايتا كەلىپ جاتساڭ, قاي سالماقتا قالاسىڭ؟ 69-دا ما؟ ­– 69-دا. – وسى سالماقتا بىزدە ءبىر-بىرىمەن باسەكەلەس جىگىتتەر بار عوي. سولاردىڭ ىشىندە كىمدى اتاپ ايتار ەدىڭ؟ – ەشكىمدى ءبولىپ-جارىپ اتا­ماي-اق قويايىن. 69-دا بىزدە تالانت­تى, دارىندى بوكسشىلار بار. مۇنى بيىلعى قازاقستان چەم­پيوناتى كورسەتىپ بەردى. كىمنىڭ مىقتى, كىمنىڭ وسال ەكەنى وسىنداي باسەكەلەردە كورىنەدى. قازىر ءبىز جاستارىمىزدىڭ وزدەرىن كورسەتۋ­لەرىنە مۇمكىندىك بەرىپ وتىرمىز. دەگەنمەن, ورىس حالقىندا “سۆوي نە سۆوي, ا نا دوروگە نە ستوي” دە­گەن بار. سول ءسوز دۇرىس ايتىلعان. – وليمپيادادان كەيىن بوكسپەن قوشتاسقاندا جۇرەگىڭنىڭ تۇكپىرىندە ءبارىبىر بوكسقا قايتا كەلەرمىن دەگەن ويعا ورىن بولدى ما؟ – ءيا, وليمپيادادان كەيىن قولىمنان جاراقات الىپ, بوكستى وسىمەن ءبىرجولاتا قويارمىن دەگەن ويىم بولدى, ارينە. ماعان ول كەزدە ءبىراز ۋاقىت دەمالىپ, جارا­قاتىمدى ەمدەۋ كەرەك ەدى. ەندى ەكىنشى رەت تالپىنىس جاساي­تىن ۋاقىت كەلگەن سياقتى دەپ ويلاي­مىن. مۇنى ءوزىمنىڭ, جاستار­دىڭ بابى قالاي ەكەن, سونى بايقاپ كورۋ ءۇشىن جاساپ وتىرمىن. – بوكس فەدەراتسياسىندا ىستەپ جۇرگەنىڭە ءبىراز ۋاقىت بولدى. قا­زىر­گى جۇمىسىڭ تۋرالى نە ايتاسىڭ؟ – قازىر ۇلتتىق قۇرامانىڭ جۇمىسىن ۇيلەستىرۋشى بولىپ ىستەيمىن. فەدەراتسيادا بۇدان باسقا ايەلدەر ۇلتتىق قۇراماسى جانە تورەشىلەر جۇمىسىن ۇيلەستىرۋشى بولىپ بەلگىلى بوكس مامانى بەرىك مىرجىقباەۆ, جاستار جانە ءجاسوس­پىرىمدەر كومانداسىنىڭ جۇمىسىن ۇيلەستىرۋشى, مەملەكەتتىك باپكەر بولات ءابدىراحمانوۆ, قازاقستان­نىڭ ىشكى جارىستارىن وتكىزۋ جانە WCB بۇكىلالەمدىك سەرياسىنا قاتىسۋدى ۇيىمداستىرۋ جۇمىسىن ۇيلەستىرۋشى بولات مانكەنوۆ, حالىقارالىق بايلانىس جونىندە ۇيلەستىرۋشى ءازيز قوجامبەتوۆ پەن عىلىمي جۇمىس جانە مەديتسينا­لىق قىزمەت كورسەتۋ جونىندە ۇيلەس­­تىرۋشى بولىپ سادات مولدا­كارىم جۇمىس ىستەيدى. مەنىڭ ءمىن­دەتىم – باس باپكەرمەن, اعا باپ­كەر­لەرمەن تىعىز بايلانىستا جۇمىس ىستەۋ. ءبىز قازىر كەلەشەگىنەن ءۇمىت كۇتتىرەتىن جاستارعا جول كورسەتىپ, ولاردى ۇيرەتىپ جاتىر­مىز. ول ءۇشىن شەتەلدەن دە ماماندار شاقىردىق. ولار ءوز تاجىريبەلەرىمەن بولىسۋدە. جالپى, قازىر ەلىمىز بويىنشا بوكستىڭ بەدەلىن كوتەرۋ ءۇشىن ۇلكەن جۇمىستار قولعا الىنىپ وتىر. قازاقستان بوكس فەدەراتسيا­سىنا پرەزيدەنت بولىپ تيمۋر ق ۇلى­­باەۆ كەلگەلى بەرى ەلىمىزدىڭ بارلىق وڭىرلەرىندە بوكستى دامى­تۋ­دىڭ جاڭا جوبا-جوس­پار­لارى جاسالا باستادى. مىسالى, بيىلعى جىلدىڭ قىركۇيەك ايىنا دەيىن بارلىق وبلىستاردا “بوكس سارايى” سالىناتىن بولادى. مۇنى كوپ جەردە جانكۇيەرلەر اۋزىنان تاستاماي ايتىپ ءجۇر. بۇل اۋەلى بالالار مەن جاستاردىڭ اراسىنان تالانتتى بوكسشىلاردى ىرىكتەپ الۋعا مۇمكىندىك بەرسە, ەكىنشى جاعىنان بوكستى بۇقارالىق سپورت دەڭگەيىنە كوتەرۋگە ىقپال ەتەتىن بولادى. فەدەراتسيانىڭ قولعا العان تاعى ءبىر جۇمىسى – ۇلتتىق قۇرا­مانى جاسارتۋ. ونى وزدەرىڭىز دە كورىپ جۇرسىزدەر. ياعني, تالانتتى جاستاردى نەگىزگى كومانداعا شاقىر­­تىپ, ولاردى ءىرى حالىقارا­لىق جارىستارعا قاتىستىرۋ باس­تالدى. بۇگىندە بوكس فەدەرا­تسياسى وسىنداي جارىستارعا ۇلكەن ءمان بەرىپ كەلەدى. ويتكەنى, بيىل قىتايدىڭ گۋانچجوۋ قالاسىندا جازعى ازيا ويىندارى وتەدى. سوندىقتان فەدەراتسيانىڭ باسشىسى تيمۋر اسقار ۇلى ۇلتتىق قۇراماعا دا, جاستار قۇراماسىنا دا ەرەكشە ءمان بەرىپ, ولاردىڭ دايىن­دىعى ءۇشىن بارلىق جاعدايدى جاساۋ­دا. وسىنداي حالىقارالىق دەڭ­گەيدەگى جانە رەسپۋبليكاىشىلىك شارالاردى ۇيلەستىرۋدە فەدەراتسيا­نىڭ اتقارۋشى ديرەكتورى دانيار ابىلعازين ۇلكەن جۇمىستار اتقا­رىپ كەلەدى. – مىسالى, قانداي؟ – مىسالى, ءبىرىنشى ءنومىرلى بوكسشىلار 2 500, ال ەكىنشى ءنومىر­لى بوكسشىلار 1 500 دوللار­دان جالاقى الىپ تۇرادى. مۇنىڭ ءوزى بوكسشىلار ءۇشىن ۇلكەن دەمەۋ, قولداۋ ەمەس پە. جالپى, بۇگىندە قازاقستان بوكسىن دامىتۋ ءۇشىن جاقسى جوبالار ىسكە قوسىلىپ وتىر. فەدەراتسيا باسشىسى ەلىمىز­دىڭ بارلىق وڭىرلەرىندە بالالار مەن جاستاردىڭ بوكسپەن اينالى­سۋىنا جاقسى جاعداي جاساۋ ءۇشىن ناقتىلى جۇمىستاردى باستادى. ونىڭ ىشىنە ارنايى بوكس مەكتەپ­تەرىن اشۋ, تورەشىلەر دايىنداۋ, جارىستاردى حالىقارا­لىق تالاپ­تارعا ساي وتكىزۋ, عىلى­مي-مەديتسي­نالىق جەتىستىكتەردى پايدالانۋ سياقتى جۇمىستار كىرەدى. – ەندى وزىڭە قايتا كەلسەك, قازىر جاتتىعۋ جاسايدى ەكەنسىڭ. باپ­كەرىڭمەن نەشە ساعات جاتتى­عاسىڭ؟ – مەن ەشقاشان بوكستى تاستادىم دەپ جاتتىعۋدان قول ۇزگەن ەمەسپىن. كۇن سايىن 2-2,5 ساعات جاتتىعامىن. باپكەرىم كارىم ماحمۇدوۆپەن كوپ نارسەنى اقىل­داسامىن. سول كىسىنىڭ كەڭەسىنە ءاردايىم جۇگىنىپ وتىرامىن. قازىر جاتتىعۋلاردى تەحنيكامدى جەتىل­دىرۋ ءۇشىن جاساپ ءجۇرمىن. مەن سىزدەرگە بىردەن شارشى الاڭعا شىعىپ, ءوزىمدى قايتا كورسەتەمىن دەپ ايتا المايمىن. ويتكەنى, وعان ۋاقىت كەرەك, سوسىن وعان كوپ ەڭ­بەك­تەنۋ كەرەك. اقىل توقتات­قاننان كەيىن بارىنە كاسىبي تۇرعىدان, جاڭاشا كوزقاراسپەن قارايدى ەكەنسىڭ. كەزىندە ءبارى دە تەز وتسە ەكەن, تەز بولسا ەكەن دەپ ويلاۋشى ەدىم. قازىر ولاي ەمەس, ءار نارسەنى تارازىعا سالىپ جاسايسىڭ. – ءالى باعىندىرماعان ءبىر بەلەسىڭ بار ەكەن. ول الەم چەم­پيونى بولۋ عوي... – ءيا, ونىڭ راس. الەم چەمپيونى اتانۋ اركىمنىڭ ارمانى. – قازىر الەم چەمپيوندىعىنا لايىق دەپ كىمدەردى اتاپ ايتار ەدىڭ؟ – بوكستا بولجاپ ايتۋ قيىن. بۇل – سپورت. ال سپورتتا بابى مەن باعى كەلىسكەن ساڭلاقتىڭ عانا جەڭىسكە جەتەتىنى بەلگىلى. سوسىن ءبارى بوكسشىنىڭ دايىندىعىنا, ۇرىمتال ءساتتى پايدالانا بىلۋىنە بايلانىستى. كوپ جاعدايدا ماسەلەنى ادامنىڭ اتاعى ەمەس, شارشى الاڭ شەشەدى. – ءبىزدىڭ باپكەرلەردىڭ جۇمىسى­نا قانداي باعا بەرەسىڭ؟ – مەن ەشكىمنىڭ جۇمىسىنا باعا بەرە المايمىن. اركىم ءوز جۇمىسىمەن اينالىسۋى كەرەك دەپ ويلايمىن. – ىرىمشىلسىڭ با؟ – ءبىر اللاعا عانا سەنەمىن. – اڭگىمەڭە راحمەت. اڭگىمەلەسكەن داستان كەنجالين.