سوڭعى تاۋلىكتە وڭتۇستىك كورەيادا 153 ادام جاڭادان ۆيرۋس جۇقتىرىپ, ونىڭ 145-ءى ەل ىشىندە, ال قالعانى سىرتتان, شەتەلدەن جۇقتىرعان سىرقات ەكەنى انىقتالعان.
* * *
كانادانىڭ دەنساۋلىق ساقتاۋ مينيسترلىگى سوڭعى 24 ساعاتتا اۋرۋ جۇقتىرعاندار سانى 944 ادامعا كوبەيگەنى تۋرالى حابارلادى.
كانادا پروۆينتسيالارى اراسىندا كۆەبەك تۇرعىندارى كوبىرەك زارداپ شەگىپ جاتىر. 65 857 كۆەبەكتىك كۆي كەسەلىنىڭ نە ەكەنىن ايقىن ءتۇسىنىپ, اۋرۋمەن كۇرەسسە, 45 383 ونتاريولىق, 16 128 البەرتالىق تۇرعىن COVID-19-دىڭ ىلمەگىنە ءىلىنىپتى.
جالپى, ەل كولەمىندە وسى كۇنگە دەيىن 139 مىڭ ادام اۋىرىپ, 9193 كانادالىق كوز جۇمعان كورىنەدى.
* * *
يرلانديانىڭ استاناسى دۋبليندە COVID-19 ىندەتىنە بايلانىستى جاڭادان شەكتەۋ شارالارى قابىلداندى.
ەل ۇكىمەتىنىڭ مۇنداي شاراعا بارۋىنا يرلاندىقتار اراسىندا كۆي-ءدىڭ كەڭىنەن تارالۋى سەبەپ بولدى. ەندى دۋبلين تۇرعىندارىنا ءبىر جەردە 6 ادامنان ارتىق جينالۋعا رۇقسات جوق. پابتار مەن بارلار قىركۇيەكتىڭ 21-نە دەيىن جابىلىپ, استانالىقتاردىڭ قالا اۋماعىنان شىعۋى شەكتەلدى. بۇعان قوسا جوعارى وقۋ ورىندارىندا سانيتارلىق نورمالار قاتال قاداعالانىپ, الەۋمەتتىك قاشىقتىقتى ۇستاۋعا كەڭەس بەرىلگەن.
يرلانديادا بۇعان دەيىن مينيسترلەردىڭ ءبىرى كۆي جۇقتىردى دەگەن كۇدىكپەن ۇكىمەتتى دە كارانتينگە جاپقان ەدى. بىراق مينيستر تاپسىرعان تەستتە اۋرۋ انىقتالماي, شەكتەۋ الىنىپ تاستالعان. ەندى كارانتين شارالارى تۇتاس ءدۋبليندى قامتىدى.
* * *
2021 جىلدى قورتىندىلاعاندا الەمدىك ەكونوميكاداعى ءىجو 7 ترلن دوللار جوعالتۋى مۇمكىن. بۇل تۋرالى Les Echos گازەتى جازدى.
ەكونوميكالىق ىنتىماقتاستىق جانە دامۋ ۇيىمىنىڭ بولجامى بويىنشا COVID-19 ادامزاتتى وسىنداي وراسان قاراجاتتان ايىرۋى مۇمكىن كورىنەدى. ۇيىمنىڭ باس ەكونوميسى لورانس بۋن مۇنىڭ الەمدىك ەكونوميكا ءۇشىن اۋىر سالماق ەكەنىن ايتا كەلە, الداعى جىلى ەكونوميكانىڭ جىلدامىراق قالپىنا ءتۇسۋى جايىنداعى جورامالداردىڭ تۋرا بولا بەرمەيتىنىن جانە دۇنيە ءجۇزىنىڭ ءالى دە كوروناۆيرۋسپەن ءبىراز الىساتىنىنا قىنجىلدى.
ەكونوميكالىق ىنتىماقتاستىق جانە دامۋ ۇيىمىنىڭ بۇرىنعى ەسەپتەرىندەگى بولجاۋدا 2020 جىلعى ءىجو-ءنىڭ تومەندەۋى 4,5 پايىز شاماسىندا بولادى دەگەن-ءدى. ال جاڭا جورامال ونىڭ 6 پايىزدى قۇرايتىنىن كورسەتىپ وتىر.
* * *
برازيليا باسىنداعى بۇلتتىڭ جاقىن ارادا ىدىرار ءتۇرى كورىنبەيدى. ەلدىڭ دەنساۋلىق ساقتاۋ مينيسترلىگى 4 ملن 419 مىڭنان استام ادامنىڭ دەرتتى بولعانىن حابارلادى.
ءبىر تاۋلىك ىشىندە 36 820 برازيليالىق COVID-19 جۇقتىرىپ, 987 پاتسيەنت اجال قۇشقان. برازيليا مەملەكەتى ءوزىنىڭ 134 106 ازاماتىنان ايرىلىپ, جەر شارى بويىنشا پاندەميا بيلىك جۇرگىزگەن العاشقى ۇشتىكتەگى ورنىن وزگەگە بەرەر ەمەس.
«جىعىلعان ۇستىنە جۇدىرىق» دەگەندەي ەلدەگى وزگەشە ەكوجۇيەسىمەن, بيوالۋاندىعىمەن ەرەكشەلەنەتىن پانتانالۋ قورىعىنداعى ورمانعا دا قاۋىپ ءتونىپ وتىر. بوي بەرمەستەن الاۋلاپ جانعان ءورت پانتانالۋ جەلەگىن جوياتىن بولسا, برازيليا مەن لاتىن امەريكاسىنىڭ عانا ەمەس, الەمدىك كليماتتىڭ وزگەرۋى مۇمكىن دەيدى ماماندار.
* * *
روبەرت كوح اتىنداعى ينستيتۋتتىڭ مالىمەتىنە قاراعاندا گەرمانيادا ءبىر كۇندە تاعى 2 مىڭنان استام ادامنان ۆيرۋس تابىلعان.
دالىرەك ايتار بولساق, 2194 ازاماتتان COVID-19 انىقتالىپ, جالپى العاندا 265 857 ادام ۆيرۋس جۇقتىرعان. 17 قىركۇيەكتەگى ينستيتۋت حابارلاماسىندا 24 ساعاتتىڭ ىشىندە 3 پاتسيەنتتىڭ تىنىسى توقتاپ, ەل كولەمىندە پاندەميا باستالعالى 9371 ادامنىڭ قۇربان بولعانى جاريا ەتىلگەن.
فەدەرالدى جەرلەردەن قۇرالعان مەملەكەتتە ىندەت باستالعالى اۋرۋ تىركەلۋى جونىنەن باۆاريا (63 632), سولتۇستىك رەين – ۆەستفاليا (63 565) جانە بادەن-ۆيۋرتەمبەرگ سىندى ايماقتار (46 041) الدىڭعى ورىنداردا كەلەدى. ۇكىمەت ساقتىق شارالارىن كۇشەيتىپ, حالىق كوپ جينالاتىن ءداستۇرلى مەرەكە, كارناۆالدارعا تىيىم سالعاننىڭ وزىندە گەرمانيا حالقى ۆيرۋس سالماعىن ءالى دە سەزىنىپ وتىر.
