بۇدان بۇرىن جازعانىمىزداي, ەگىس القاپتارىنىڭ ءبىرازىنا جازعى اپتاپ ىستىقتا ۇزاق ۋاقىت تامشى تامبادى. سونىڭ كەسىرىنەن استىق شىعىمى تومەن. دەگەنمەن كەيبىر اۋداندارعا جاۋىن ارەدىكتە قۇيىپ كەتىپ وتىرعان. سونىڭ ناتيجەسىندە ولاردىڭ استىق شىعىمى جوعارى. وبلىس باسشىلارىنىڭ تالاپ ەتۋىمەن استىق القاپتارىنا 100 مىڭ تونناداي تىڭايتقىش تا سەبىلگەن ەدى. حيميالىق جولمەن ءارامشوپتى وتاۋ جۇمىستارى دا ءوز ۋاقىتىندا جۇرگىزىلدى. سول ارقىلى بيىلعى جاۋىنسىز جازدىڭ وزىندە گەكتەر شىعىمى ورتاشا العاندا 14,5 تسەنتنەردەن اينالۋدا.
قازىر وبلىستاعى ەگىس القاپتارىندا جۇيتكىگەن 75 مىڭ كومباين كۇندىز-ءتۇنى گۇرىلدەپ, التىن استىقتى جيناۋدا. ولارعا ۇكىمەتتىڭ كومەگىمەن ارزانداتىلعان جانار-جاعارماي تولىعىمەن جەتكىزىلگەن. اۋا رايى دا سوڭعى كۇندەرى اشىق بولىپ, ديقان قولىن بايلاعان جوق.
الدىڭعى ورىندا قىزىلجار اۋدانىنىڭ ديقاندارى كەلەدى. بۇل اۋداننىڭ جەر قۇنارلىلىعى جوعارى ءارى تاسىمال جۇمىستارىندا شىعىن از بولادى. ويتكەنى اۋدان وبلىس ورتالىعىنىڭ ىرگەسىندە بولعاندىقتان ينفراقۇرىلىمنىڭ, سونىڭ ىشىندە جولدىڭ ساپاسى جوعارى. بۇل ارتىقشىلىق باسقا اۋدانداردا بار دەپ ايتا المايسىڭ. جىلدا ايتىلعانىمەن جولدىڭ ساپاسىزدىعىنان استىقتىڭ 15-20 پايىزعا جۋىعى ءراسۋا بولادى.
كەشەگى كۇنگى مالىمەت بويىنشا 4 ملن تونناعا جۋىق استىق باستىرىلعىن. وسىنىڭ ءوزى قىزىلجارلىق ديقانداردىڭ بەلگىلەنگەن مەجەنى اسىرا ورىندايتىنىن كورسەتەدى.
بىلتىردان بەرى وبلىس مايلى داقىلدار ەگۋدەن رەسپۋبليكا وڭىرلەرى اراسىندا الدىڭعى ورىنعا شىقتى. قازىر مايلى داقىل ونىمدەرى 700 مىڭ گەكتارعا جۋىق جەردەن جيناپ الىندى. گەكتار بەرەكەسى ورتاشا ەسەپپەن 8 تسەنتنەردەن اينالۋدا.
ەلىمىزدىڭ اسا ءىرى استىقتى ايماقتارىنىڭ بىرىندەگى وراق ناۋقانىنىڭ بارىسى ازىرگە, وسىنداي.
سولتۇستىك قازاقستان وبلىسى
