ءدال قازىرگى ۋاقىت ءوڭىر ديقاندارى ءۇشىن «بەينەتىنىڭ زەينەتىن كورەتىن» كەزەڭ. جاز مەزگىلىنىڭ سوڭعى ايى ءتامامدالا بەرە, جامبىل وبلىسىندا دا ەگىن وراعى اياقتالدى. قارا جەردىڭ قويناۋىنان ورگەن سارى التىن بيىل دا ەلدىڭ ىرزىق-نەسىبەسىنە وراي بىتىك شىقتى.
وبلىستىق اۋىل شارۋاشىلىعى باسقارماسى باسشىسىنىڭ ورىنباسارى ەرلان قۇلكەەۆتىڭ ايتۋىنشا, قازىرگى ۋاقىتتا وڭىردەگى 359,2 مىڭ گەكتار القاپتان 816,6 مىڭ توننا استىق باستىرىلىپ, وتكەن جىلمەن سالىستىرعاندا 53,5 مىڭ توننا ارتىق ءونىم الىنىپ وتىر ەكەن. ءاربىر گەكتاردان الىنعان ورتاشا ءونىم كولەمى 22,7 تسەنتنەردى قۇرايدى. وبلىس بويىنشا ءار گەكتاردان 24,4 تسەنتنەر ءونىم الىپ, مەركى اۋدانى كوش باستادى. سونداي-اق, قورداي اۋدانىندا گەكتارىنان 24, ت.رىسقۇلوۆ اۋدانىندا 23 جانە شۋ اۋدانىندا 22,9 تسەنتنەردەن ءونىم الىنىپ, وبلىستىق دەڭگەيدەن جوعارى كورسەتكىش كورسەتكەن. قالعان اۋدانداردا دا جاقسى ءونىم الىنعان.
بۇگىندە جامبىل وبلىسىندا اۋىل شارۋاشىلىعى ماقساتىنداعى جالپى جەر كولەمى 4 612 841 گەكتاردى قۇرايدى. ونىڭ ىشىندە 772 664 گەكتار – ەگىستىك, 177 484 گەكتار – سۋارمالى جەر, 3 862 گەكتار – كوپجىلدىق ەكپەلەر, 116 594 گەكتار – شابىندىق جانە 3 583 760 گەكتار – جايىلىمدىق, سونداي-اق, 135 961 گەكتار باسقا جەرلەر دە بار. ال, بار نارسەنى ۇقساتىپ, پايدالانىپ, ەل يگىلىگىنە جاراتۋ ديقانداردىڭ ەڭبەگىنە بايلانىستى.
بيىل دا جىلداعىداي ۇكىمەت قولداۋىنىڭ ناتيجەسىندە وڭىردەگى بىرقاتار شارۋالار مول ءونىم الىپ, تابىسقا كەنەلۋدە. ماسەلەن, ت.رىسقۇلوۆ اۋدانىنداعى «قاينار اگرو» جشس 7 مىڭ گەكتار جەرگە كۇزدىك بيداي مەن ارپا ەككەن. اتالعان سەرىكتەستىك باسشىسى سەرىكجان شوقاتاەۆتىڭ ايتۋىنشا, مەملەكەت قولداۋىنىڭ ناتيجەسىندە تەحنيكالار الىپ, جۇمىسىن جۇرگىزىپ وتىر. بۇل سەرىكتەستىكتە بۇگىندە 40 ادام جۇمىس ىستەيدى. سول سياقتى, وڭىردەگى ءىرى سەرىكتەستىك بولىپ سانالاتىن «شالقار» شارۋا قوجالىعىنىڭ توراعاسى شالقار توكەەۆ تە تەحنيكا الۋ ءۇشىن مەملەكەت تاراپىنان سۋبسيديا الىپ وتىرعان كاسىپكەردىڭ ءبىرى. ول جىل سايىن 7 341 گەكتار القاپقا بيداي, ارپا ەگەدى. اتالعان قوجالىقتا بۇگىندە 50-گە تارتا ادام جۇمىس ىستەيدى.
«ەڭبەگىمىزگە قاراي جاقسى ءونىم الدىق. ۇكىمەت قولداۋىنىڭ ناتيجەسىندە قاجەتتى تەحنيكالارعا دا قول جەتكىزدىك. العان ونىمىمىزدەن تۇقىمعا كەرەگىن الىپ قالامىز. ودان كەيىن جۇمىسشىلاردىڭ ەڭبەكاقىسىن بەرەمىز», دەيدى ش. توكەەۆ.
جامبىل وبلىسىنىڭ اكىمدىگى, اۋىل شارۋاشىلىعى مينيسترلىگى, «قازاگرو» ۇلتتىق باسقارۋشى حولدينگى» اق جانە «ۇلتتىق اگرارلىق عىلىمي-ءبىلىم بەرۋ ورتالىعى» بىرلەسىپ, اۋىل شارۋاشىلىعى داقىلدارىنىڭ 2017-2021 جىلدار ارالىعىنداعى ەگىس القاپتارىنىڭ قۇرىلىمىن ءارتاراپتاندىرۋ تۋرالى مەموراندۋم قابىلداعان بولاتىن. قۇجاتقا سايكەس, وبلىستىق اۋىل شارۋاشىلىعى باسقارماسىنىڭ مالىمەتىنشە, وبلىس بويىنشا ەگىس القاپتارىنىڭ كولەمىن 2020 جىلى 680,3 مىڭ گەكتارعا جەتكىزۋ مەجەلەنگەن. بۇل وتكەن جىلمەن سالىستىرعاندا 11,9 پايىزعا ارتادى دەپ جوسپارلانۋدا. بۇگىندە وبلىس بويىنشا اۋىل شارۋاشىلىعى داقىلدارىنىڭ ەگىس كولەمى 717,6 مىڭ گەكتاردى قۇراپ وتىر. سونداي-اق ەگىس القاپتارىن ارزانداتىلعان مينەرالدى تىڭايتقىشتارمەن قامتاماسىز ەتۋ ماقساتىندا بيۋدجەتتەن 1,25 ملرد تەڭگە ءبولىنىپ, جوسپار بويىنشا 25,5 مىڭ توننا مينەرالدى تىڭايتقىشتاردى اۋىل شارۋاشىلىعى القاپتارىنا تاراتۋ مەجەلەنگەن.
جالپى, بيىل وڭىردە 149,7 مىڭ گەكتارعا ارپا, ال 209,5 مىڭ گەكتارعا بيداي ەگىلىپ, ەگىن ورۋ ناۋقانىنا بارلىعى 816 كومباين قاتىستى. جامبىل وبلىسى بيىل جىلداعىدان مول ءونىم الىپ وتىر.
جامبىل وبلىسى
