قوعام • 18 قىركۇيەك، 2020

يتبالىقتىڭ ولىمىنە تۇرعىندار كىنالى ەمەس

22 رەت كورسەتىلدى

وتكەن اپتادا ماڭعىستاۋ وبلىسىندا تاعى ءبىر يتبالىقتىڭ ولەكسەسى تابىلدى. سوڭعى كەزدەرى وڭىردە يتبالىققا قاتىستى ماسەلە جيىلەپ كەتتى. بىرىندە يتبالىق ادامداردى تىستەسە، ەكىنشىسىندە تۇرعىندار ولارعا كۇش كورسەتەدى. بىرنەشە جىل بۇرىن يتبالىقتاردىڭ جاپپاي قىرىلۋى ورىن الىپ، الەۋمەتتىك جەلىنى شۋلاتقانى ەستە.

ەل اراسىنداعى تەنتەكتەردىڭ وسپادار ارەكەتى بۇگىندە ماڭعىستاۋدا يتبا­لىقتاردى سىلەيتە ساباپ، تەڭكيتە ءولتىرىپ جاتقانداي كوزقاراس قالىپتاستىرعانى وكىنىشتى. الايدا كاسپي تەڭىزىنىڭ جاعالاۋىنداعى تۇرعىندار ۇنەمى يتبا­لىقتارمەن تەكەتىرەسكە ءتۇسىپ، جوق جەر­دەن «جاۋ» تاۋىپ الىپ، ايقاسىپ ءجۇر دەگەن وي تۋماۋى كەرەك. تەلى-تەن­تەك قايدا دا بار، يتبالىقتار مەن ادام­دار اراسىندا ورىن العان جاعداي – بۇكىل ماڭعى­ستاۋ تۇرعىندارىنىڭ كەل­­بەتى بولا ال­­مايدى جانە بارلىق ادام يتبالىق سا­باۋعا ىنتالى ەمەس. يتبالىقتىڭ وقىس ءولىمى تىركەلسە، قىس ايلا­رىندا تەڭىزگە كەلەتىن اققۋلاردى قۋانا قارسى الىپ، جاعالاۋعا بارىپ جەم شاشىپ، ولارمەن سۋرەتكە ءتۇسىپ ءماز-مەيرام بولاتىن، دالادا قال­­عان سىڭار اققۋلاردى ىزدەپ تا­ۋىپ ارنايى كولىكپەن اقتاۋعا الدى­رىپ قامقورلىق تانىتاتىن، ارىستاندى دا قولعا ۇيرەتىپ الماتى زووباعىنا سىي­لاعان تۇرعىنداردى «جانۋارلارعا جانى اشىمايتىن  قاتىگەز» سىندى كۇستانالاۋدىڭ قاجەتى جوق.

«وزەكتى جانعا – ءبىر ءولىم» دەمەكشى، يتبالىقتىڭ ولىمىنە مۇمكىن، كارىلىك، مۇمكىن تەڭىزدەگى الدەبىر جايسىزدىق، دەنساۋلىعىنىڭ اقاۋى سەبەپ بولۋى مۇمكىن عوي...

يتبالىق ساباۋعا قاتىستى اڭگىمە سوڭى سايابىرسي بەرگەندە تەڭىز جاعالا­ۋىنان ءولى يتبالىقتىڭ تابىلۋى تاعى ءبىر اڭگىمەنىڭ شەتىن كوتەرىپ الا جو­نەلدى. «Kazakh Tourizm» ۇك» اق باسقارما توراعاسى ەرجان ەركىنباەۆ كاسپي تەڭىزىنىڭ جاعالاۋىن ارالاۋ بارىسىندا «مەنىڭ الدىمدا جاتقان دەنەدە ەكى جاراقات بار، ونىڭ ولتىرىلگەنىن كورۋگە بولادى. نە ءۇشىن؟ بۇل جانۋار مۇگەدەك سياقتى قوزعالادى، نەگە وعان قول تيگىزەدى؟ كوبىسى اقىماقتار، ودان دا نايزامەن قابانعا، قاسقىرعا بارىڭىز... اقىماقسىزدار، سىزدەر!» دەگەن اشۋلى جازبانى الەۋمەتتىك جەلىگە جاريالادى.

ماسەلەگە وراي سۇراۋ سالعانىمىزدا «ماڭعىستاۋ وبلىسى قاراقيا اۋدانى­نىڭ تەڭىز جاعالاۋىندا ولگەن يتبالىق تۋرالى اقپارات الەۋمەتتىك جەلىلەردە كەڭىنەن تاراپ، كەيبىر بۇقارالىق اق­پارات قۇرالدارى بۇل اقپاراتتى كو­شىرىپ جارىسا جازعان. بەلگىلى بول­عان­­داي، ەلوردالىق ەرجان ەركىنباەۆ ماڭ­عىستاۋعا كەلىپ ولگەن يتبالىق تۋ­­­رالى فەيسبۋك الەۋمەتتىك جەلىسىندە پوست جاريالاعان. اتالعان دەرەك بو­يىن­شا ماڭعىستاۋ وبلىستىق ورمان شا­رۋا­شىلىعى جانە جانۋارلار دۇنيەسى اۋماق­تىق ينسپەكتسياسىنىڭ ماماندارى وقيعا ورنىنا بارىپ، يتبالىقتىڭ ادەيى ولتىرىلمەگەنىن انىقتاعان. ولگەن يت­بالىقتى قۇستار شوقىپ تاستاعان. ال­دىن الا بولجام بويىنشا، سۋ جانۋارىن تول­قىنمەن تەڭىز جاعاعا لاقتىرعان. يتبالىقتىڭ ناقتى نەدەن ولگەنىن ءبىلۋ ماق­ساتىندا تەرىسىن الۋعا ارەكەت جا­سا­عانىمەن ناتيجە بولمادى. سەبەبى تەرى ابدەن ءىرىپ كەتكەن» دەپ حابارلادى ينس­پەكتسيا ماماندارى. 

كاسپي تەڭىزىندەگى يتبالىقتاردىڭ ءولىمى بولماي تۇرمايتىن قۇبىلىس – جاپپاي قىرىلۋ ورىن العان ساتتەر دە بولعان. سانى جىلدان-جىلعا ازايىپ بارا جاتقان جانۋاردىڭ توپتىق ەمەس، جەكەلەگەن ءولىمىنىڭ ءوزى جان اۋىرتادى، ايتسە دە تۇرعىنداردى تىلدەۋدىڭ رەتى شامالى. تەڭىز جاعالاۋىنداعى جۇرت يتبالىقپەن وشتەسسە، تۇقىمىن تۇزداي قۇرتقان بولار ەدى. بۇگىنگە دەيىن از دا بولسا تۇقىمىنىڭ جەتىپ جۇرگەنى – كاسپي تەڭىزىنە اكەلىپ كەفال بالىعىن جەرسىندىرگەن جەرگىلىكتى جۇرتتىڭ جانا­شىر­لىعىنىڭ ارقاسى.

 

ماڭعىستاۋ وبلىسى

 

سوڭعى جاڭالىقتار

ەلەنگەن ەرلىك

ايماقتار • بۇگىن، 13:22

قاراشادا كۇن سۋىتادى

اۋا رايى • بۇگىن، 11:59

پنەۆمونيادان تاعى 5 ادام كوز جۇمدى

كوروناۆيرۋس • بۇگىن، 09:35

ۇقساس جاڭالىقتار