ايماقتار • 17 قىركۇيەك، 2020

سولتۇستىك قازاقستان وبلىسىندا شال اقىن اۋدانىندا كارانتين جاريالاندى

204 رەت كورسەتىلدى

"جىعىلعانعا جۇدىرىق" دەمەكشى حالقىمىز جامان ىندەتتەن تولىق ادا بولماي جاتقاندا سولتۇستىك قازاقستاندا "قۇس تۇماۋى" شىقتى، دەپ حابارلايدى Egemen.kz.

وسىدان ءۇش كۇن بۇرىن "ەگەمەننىڭ" سايتىندا سولتۇستىك قازاقستان وبلىستىق اكىمدىگىنىڭ ۆەتەريناريا باسقارماسىنىڭ باسشىسى بەرىك ءالجانوۆتان الىنعان اقپاراتتان ءوڭىردىڭ وڭتۇستىك-باتىس تۇكپىرىندەگى كەيبىر اۋىلداردا قۇس قىرىلۋى فاكتىسى بولعاندىعى تۋرالى جازعانبىز. ب.ءالجانوۆ 700-دەي قۇستىڭ قىرىلعانىن جانە ءبارىنىڭ سيمپتومدارى ۇقساس ەكەنىن ايتقان بولاتىن. قىرىلعان قۇستىڭ ءبارى جينالىپ، ورتتەلىپ جىبەرىلگەنى دە ايتىلعان. الايدا ول زەرتحانالىق ساراپتىڭ قورىتىندىسى شىققانشا قىرىلۋدىڭ ناقتى سەبەبى نەدە ەكەنىن ايتا المايتىنىن جەتكىزگەن.

ەندى بۇگىن زەرتحانالىق ساراپتىڭ قورىتىندىسى شىعىپ، ول تۋرالى جۋرناليستەرگە اۋىلشارۋاشىلىعى مينيسترلىگى ۆەتەرينارلىق باقىلاۋ جانە
بايقاۋ كوميتەتىنىڭ سولتۇستىك قازاقستان اۋماقتىق ينسپەكتسياسىنىڭ جەتەكشىسى مارات ىبىراەۆ باياندادى.    

ونىڭ ايتۋىنا قاراعاندا وبلىس اۋماعىندا قۇس تۇماۋى شىققان. زەرتحانالىق ساراپتىڭ دالەلدەۋىنە قاراعاندا قۇستاردىڭ قىرىلۋىنىڭ سەبەبى سول. وسىعان بايلانىستى وبلىس اۋماعىنىڭ 7 اۋدانىنا قارايتىن 10 ەلدىمەكەندە كارانتين ەنگىزىلەدى جانە بۇل تۋرالى وبلىس اكىمدىگىنە ءتيىستى قۇجات جىبەرىلگەن.

كارانتيننىڭ شارتىنا سايكەس ادامدار مەن كولىكتەردىڭ قوزعالىسىنا بارىنشا شەكتەۋ قويىلادى. كارانتيندىك زوناعا ەنەتىن نەمەسە شىعاتىن اۆتوكولىكتەردىڭ دوڭگەلەكتەرى قاتاڭ دەزينفەكتسيادان وتكىزىلەدى. وسى تالاپتاردى ورىنداعان ومىرلىك قاجەتتىلىكتەردى اتقاراتىن قىزمەتتەر، قۇقىق قورعاۋ ورگاندارى، مەديتسينالىق جانە ۆەتەرينارلىق قىزمەتتەردىڭ كولىكتەرى زوناعا ەمىن-ەركىن كىرىپ شىعا الادى. الايدا كارانتين ايماعىنان ءتىرى قۇستار جانە سويىلعان قۇس ەتىن، ءتىپتى ونىڭ مامىقتارى مەن تاماقتارىن الىپ شىعۋعا تولىقتاي تيىم سالىنادى.

سونىمەن بىرگە كارانتين ايماعىندا تۇماۋدىڭ بەلگىسى بار قۇستار تولىعىمەن جويىلىپ، ەتتەرى ورتتەلەدى. بۇل پروتسەدۋرانى رەسپۋبليكالىق ەپيزووتيكاعا قارسى وتريادتىڭ ماماندارى اتقارادى. ولار جويۋ بارىسىندا قۇستاردىڭ سانى، جاسى، ءتۇرى كورسەتىلگەن حاتتامالار تولتىرادى. ارتىنان وسى قۇجاتتار جويىلعان قۇستاردىڭ قۇنىن بيۋدجەتتەن وندىرۋگە نەگىز بولادى. مۇندايلار ارناۋلى كوميسسياعا ۇسىنىلىپ، ولار قۇس باعاسىنىڭ رىنوكتىق ورتاشا باعاسى كولىمىندە وتەماقى بەلگىلەيدى. ال اۋىرماعان قۇستاردىڭ بارىنە ۆاكتسينا ەگىلىپ، ولار ۆەتەرينار مامانداردىڭ باقىلاۋىنا الىنادى.

كارانتين ايماعى ءۇش قاباتتى زونامەن قورشالىپ، ولاردا دا ەپيزووتيكاعا قارسى شارالار جۇرگىزىلەتىن بولادى. كارانتين ۋاقىتى سوڭعى اۋرۋ قۇس تابىلعاننان كەيىن 21 كۇن وتكەننەن كەيىن عانا اياقتالادى.

قۇس تۇماۋى – دەگەننىڭ ءوز،ءى مامانداردىڭ ايتۋىنا قاراعاندا، ا ءتيپتى تۇماۋ ۆيرۋسى شتاممدارىنىڭ بىرىمەن بايلانىستى قۇستار مەن ادامنىڭ ۆيرۋستى ينفەكتسياسى. بۇل ينفەكتسيانى قۇستاردىڭ كوپتەگەن تۇرلەرى قابىلداعىش. كوبىنەسە ونى ۇشىپ كەلگەن تاراتۋشىدان ءۇي قۇستارى - تاۋىقتار، كۇركە تاۋىقتار، قازدار جانە ۇيرەكتەر تەز جۇقتىرىپ الادى. ادام قۇس تۇماۋى ۆيرۋسىن جۇقتىرۋدا سوڭعى بۋىن بولىپ تابىلادى، وسى كۇنگە دەيىن وسى ۆيرۋستىڭ ادامنان ادامعا جۇعۋى تىركەلمەگەن. الايدا قۇس ەتى مەن ودان جاسالعان ونىمدەر ابدەن قايناتىلۋى نەمەسە قۋىرىلۋى كەرەك. قۇس ەتىن قالىپتى تەمپەراتۋرادا ءپىسىرۋ كەزىندە  ۆيرۋس ولەدى. تۇتىنۋشىلار قۇس ەتىنەن جاسالعان تاعامنىڭ تولىق دايىن ەكەندىگىنە كوز جەتكىزۋى كەرەك، ياعني "قىزعىلت" بولىكتەرءى بولماۋى كەرەك. جۇمىرتقالاردى دا سۇيىق سارىسىن قالدىرماي پىسىرگەن دۇرىس.

ينفەكتسيا جۇقتىرعان ادام بولسا ونىڭ العاشقى بەلگىلەرى ءۇش كۇننەن اسپاي پايدا بولادى. بەلگىلەرى - كادىمگى تۇماۋ بەلگىلەرىنە ۇقساس: دەنە قىزۋىنىڭ كوتەرىلۋى، قالتىراۋ، بۇلشىق ەتتىڭ اۋىرسىنۋى، جوتەل جانە تاماقتىڭ اۋىرۋى تۇرىندە بولىپ كەلەدى. ءتىپتى وكپەنىڭ ءىسىنۋى، گەمورراگيالىق وكپە قابىنۋىنىڭ تۋىنداۋى مۇمكىن. سونىمەن قاتار تامىرلار جۇمىسىنىڭ بۇزىلۋى، كوپ رەتتىك سۇيىق سۋ تارىزدەس ءىشتىڭ ءوتۋى، كوپ رەتتى قۇسۋ، ميدىڭ ءىسىنۋى مۇمكىن. قۇس تۇماۋى كەزىندە ادامداردى ەمدەۋ - ادام تۇماۋىنىڭ ەمىندەي بولادى.

قۇس تۇماۋىنىڭ الدىن الۋ ءۇشىن ءۇي قۇستارىنىڭجابايى قۇستارمەن قاتىناسۋىن بولدىرماي، بولەك قاماۋدا ۇستاۋ ۇسىنىلادى. قۇس وسىرەتىن شارۋاشىلىقتارعا قۇس تۇماۋى جوق ايماقتاردىڭ عانا قۇستارىمەن تولىقتىرۋ ۇسىنىلادى. ءۇي قۇستارىن ۇستايتىن قورالاردا مىندەتتى سانيتاريالىق جاعدايلاردى – ءاردايىم تازالاۋدى، زارارسىزداندىرۋ شارالارىن قامتاماسىز ەتۋ قاجەت. قۇستاردى باعۋعا ارنايى  كيىم مەن اياق كيىمدەردى قولدانىپ، ولاردى تازالاپ، جۋىپ وتىرۋ كەرەك.


سولتۇستىك قازاقستان وبلىسى

 

سوڭعى جاڭالىقتار

ۇقساس جاڭالىقتار