ماقتا تەرىمىن العاشقىلاردىڭ ءبىرى بولىپ باستاعان جەتىساي اۋدانى تالاپتى اۋىلىنداعى «التىن» شارۋا قوجالىعى ءوز يەلىگىندەگى 15 گەكتار اۋماقتىڭ 5 گەكتارىنان ارنايى تەرىم ماشيناسىمەن 11 تونناداي ماقتا جينادى. قوجالىق توراعاسى قۋانىشبەك اۋاشوۆ ماقتا جيناۋدى ەرتەرەك باستاۋ ءونىمدى جەردە قالدىرماي, تولىق جيناپ الۋعا سەپتىگىن تيگىزەتىنىن ايتادى.
بىلتىر جەتىساي اۋدانى بويىنشا 46 655 مىڭ گەكتارعا ماقتا ەگىلىپ, ودان 122 مىڭ توننا ءونىم الىنعان بولاتىن. بيىل ماقتا القابى 48 943, 8 مىڭ گەكتار بولعان, ال ودان شامامەن 125 مىڭ توننا ءونىم جيناۋ بولجانىپ وتىر.
«ىنتىماق اۋىلدىق وكرۋگىنىڭ جالپى جەر كولەمى 6 683,5 گەكتاردى قۇرايدى. ونىڭ ىشىندە 4 664 گەكتارىنا ماقتا ەگىلگەن. بيىلعى مەجە – ءونىمدى جەردە قالدىرماي تولىق جيناپ الۋ. بۇيىرسا, مول ءونىم الامىز دەپ وتىرمىز. اۋدان اكىمى جامانتاي بەيسەنباەۆتىڭ تاپسىرماسىنا سايكەس وكرۋگتە 20 كومباين ماقتا تەرىمى ناۋقانىنا دايىن», دەيدى اۋىل اكىمى مارات جۇرقاباەۆ.
اۋىل شارۋاشىلىعى تاۋارىن وندىرۋشىلەرگە, سونىڭ ىشىندە ماقتا شارۋاشىلىعىن دامىتۋعا مەملەكەت تاراپىنان قوماقتى قولداۋ كورسەتىلىپ جاتقانىن ايتا كەتەلىك. مىسالى, كۇزگى دالا جۇمىستارىن جۇرگىزۋگە 39,2 مىڭ توننا جانار-جاعارماي ءبولىنىپ, اگروقۇرىلىمدارعا ءبىر ءليترى 161-163 تەڭگە كولەمىندە بوساتىلۋدا. سونىمەن قاتار اۋىل شارۋاشىلىعى باسقارماسىنىڭ مالىمەتىنشە, قولدا بار 457 ماقتا تەرەتىن كومبايننىڭ 92%-ى ناۋقانعا دايىن.
ال ماقتا جيناۋ ناۋقانىنا زاۋىتتاردىڭ دايىندىعى قالاي؟ ءمىرزاشول وڭىرىندەگى ەڭ ءىرى زاۋىتتاردىڭ ءبىرى سانالاتىن «مىرزاكەنت ماقتا زاۋىتى» ەلىمىزدى ماقتا تالشىعىمەن قامتاماسىز ەتىپ, ءوز ءونىمىن شەتەلگە دە ەكسپورتتاۋدا. ماقتاارال اۋدانىمەن قاتار كورشىلەس جەتىساي, شاردارا, كەلەس, سارىاعاش اۋداندارىنىڭ دا ماقتاسىن قابىلداپ, وڭدەيتىن زاۋىت جىل سايىن بىرنەشە مىڭداعان شارۋا قوجالىعىنا ەگىس ناۋقانى كەزىندە تەحنيكادان دا جاردەم بەرىپ كەلەدى. ەگەتىن ءشيتتى تۇقىمىنا دەيىن دايىندايدى. الىپ كاسىپورىننىڭ وندىرىستىك قۋاتتىلىعى جوعارى, زاماناۋي جاڭا قوندىرعىلارمەن جابدىقتالعان. قازىرگى تاڭدا كاسىپورىن جۇمىسشىلارى مەن قىزمەتكەرلەرى زاۋىتتىڭ ماقتاارال اۋدانىنداعى – 14, جەتىساي اۋدانىنداعى – 12 جانە شاردارا اۋدانىنداعى 6 ماقتا قابىلداۋ بەكەتتەرىندە ءونىم قابىلداۋعا دايىن وتىر. زاۋىت جانىنداعى ماقتا قابىلداۋ بەكەتىندەگى قىرمانعا ماقتا ۇيەتىن 10 ترانسپورتەر مەن ماقتا جينايتىن 11 قوندىرعى جوندەۋدەن وتكىزىلگەن. ال ماقتا قابىلدايتىن ايماق اكتەلىپ, سىرلانىپ تازارتىلعان. سونداي-اق ماقتا تاسيتىن «متز-80» ماركالى 29 تراكتور مەن وعان ارنالعان تىركەمەلەر جوندەلگەن.
كاسىپورىن باسشىلىعى بيىل 50 مىڭ توننا «اق التىن» قابىلداۋدى جوسپارلاپ وتىر. سونداي-اق كوكتەمدە شاردارا اۋدانىندا جوبالىق قۋاتى جىلىنا 50 مىڭ توننا بولاتىن, جالپى قۇنى 5 475 ملن تەڭگەنى قۇرايتىن «International Company of Cotton» جشس ماقتا وڭدەۋ زاۋىتى ىسكە قوسىلعان بولاتىن. كاسىپورىن ءبىر جىل ىشىندە ماقتا تالشىعىنا 144 مىڭ توننا ماقتا وڭدەي الادى. 47 مىڭ توننا ماقتا تالشىعى ونىمدەرىن قىتايعا, سينگاپۋرعا جانە وزبەكستانعا ەكسپورتتاماق.
تۇركىستان وبلىسى
