قوستاناي جۇلدىزدارى تاعى دا جارقىرادى

سوڭعى ەكى-ءۇش اپتانىڭ ءىشىن­دە قوستانايدىڭ ونەر جۇل­دىزدارى تاعى دا جارقىراپ كورىندى. حالىقارالىق باي­قاۋلارعا قاتىسقان ءتورت ءانشى جۇلدەلى ورىنداردى يەلەنىپ قايتتى. يتاليانىڭ لۋنيگو قالا­سىندا وتكەن ء“ححى عاسىر­دىڭ ونەرى” اتتى بايقاۋدا ە.ءومىر­زاقوۆ اتىنداعى وبلىس­تىق في­لار­مونيانىڭ ءانشىسى گۇلميرا ۇمبەتوۆا گران-ءپريدى جەڭىپ الدى. جاس ءانشى سوڭعى ءۇش-ءتورت جىلدىڭ ىشىندە بىرقاتار حالىق­ارالىق بايقاۋلارعا قاتىستى. “رومانسيادا–2007” حالىقارا­لىق بايقاۋىنان 1-ورىن­دى, ب.تولەگەنوۆا اتىن­داعى باي­قاۋدا 3-ورىندى يەلەنگەن ەدى. 2008 جىلى يسپانيادا مون­تسەررات كابالە اتىنداعى باي­قاۋدا دا ءوزىنىڭ انشىلىك قارى­مىن الەمگە ايگىلى جۇلدىزدار اراسىندا سىناپ قايتقان بولاتىن. – مەن ون بەس ادامنان قۇرالعان قازىلار القاسىنىڭ الدىندا بىرنەشە تىلدە اندەر جانە وپەرالاردان اريالار ايتتىم. سونىڭ ىشىندە قازاق تىلىندە ورىنداعان “قازاق ءۆالسىن” تىڭداعاندا زالدىڭ دا, قازىلار القاسىنىڭ دا ەرەكشە اسەرلەنگەنىن, قوشەمەتتىڭ ەرەكشە بولعانىن بايقادىم,–دەيدى گۇلميرا. چەليابى قالاسىندا وتكەن اكتەرلىك اندەر حالىقارالىق بايقاۋىنا قاتىسقان قوستاناي­داعى ورىس دراما جانە قۋىر­شاق تەاترىنىڭ اكتريساسى يۋليا كۋدرياشوۆا ءبىرىنشى ورىندى يەلەندى. ول ۇلى وتان سوعىسى جىلدارىنىڭ كورىنىسىن بەرەتىن “دۇعا” شىعارماسىن ورىنداعاندا زالداعى كورەر­مەندەر جىلاپ وتىردى. ۇلى جەڭىستىڭ 65 جىلدىعىنا وراي بۇل ءاندى دۇرىس تاڭداعانىنا دا كوڭىلى تولاتىنىن ايتتى تالانتتى اكتريسا. رەسەيدىڭ سۆەردلوۆ وبلىسى­نىڭ نيجني تاگيل قالاسىندا جاس ورىنداۋشىلاردىڭ بۇكىل­رەسەيلىك بايقاۋىنا قاتىسقان باتىرحان مالىكوۆ تە باس جۇلدەنى قانجىعاسىنا بايلادى. جاس ءانشى باتىرحاننىڭ بۇل ءبىرىنشى جۇلدەسى ەمەس. ول بىرنەشە حالىقارالىق بايقاۋ­لاردىڭ جۇلدەگەرى بولىپ ۇلگەر­دى. ول وتكەن جىلى “بەرلين جاقۇتتارى” بايقاۋىنان 3-ورىن العان بولاتىن. نيجني تاگيلدەگى بايقاۋدا جاس تالانت­تارعا جوعارى وقۋ ورىندارى ءۇشىن بەرىلگەن ەكى گرانتتىڭ بىرەۋىن باتىرحان يەمدەندى. بيىل 11-سىنىپتى بىتىرەتىن جاس تالانت ءۇشىن بۇل زور جەتىستىك. ال سانكت-پەتەربۋرگ قالا­سىندا وتكەن حالىقارالىق ۆوكال بايقاۋىنان وبلىستىق فيلارمونيانىڭ ءانشىسى نيكي­تا يۆلەۆ تە ولجالى ورال­دى. ول بايقاۋدىڭ “ەسترادا” نومينا­تسياسىنان ءبىرىنشى ورىن الدى. ونىڭ “اكادە­ميا” نومي­نا­تسياسى بويىنشا ورىنداعان قازاق تىلىندەگى “تولعاۋ” انىنە كورەرمەندەر سۇيسىنە قول سوق­تى. قوستاناي­لىق جۇلدىز­دار­دىڭ سىرت جەرلەردەگى وسىنداي بەدەلدى بايقاۋلاردا باعىن سىناۋىن قولداعان وبلىس باس­شى­لىعى ولارعا قارجىلاي كومەكتەستى. جاس تالانتتار ءوز مۇمكىنشىلىگىن سىناۋمەن بىرگە ەلدىڭ, جەردىڭ اتىن شىعارىپ كەلدى. ءنازيرا جارىمبەتوۆا, قوستاناي.