مالايزيانىڭ باتۋ قالاسىندا تۇراتىن 20 جاستاعى ستۋدەنت زاكريدز رودزي (Zackrydz Rodzi) پاحات ەرەكشە جاعدايعا تاپ بولدى. ونىڭ ۇيىنەن سمارتفونى ۇرلانعان. سونشالىقتى ۇقىپتى ارەكەت ەتكەن باۋكەسپە ارتىنان ەشقانداي ءىز قالدىرماپتى.
"مەن ويانىپ, سمارتفوننىڭ ورنىندا جوق ەكەنىن بايقادىم. ءبىر قىزىعى, ونىڭ مۇقاباسىن شەشىپ, قالدىرىپ كەتىپتى. ءۇيدىڭ ەسىگى جابىق, كىلت تە, ق ۇلىپ تا ورنىندا. ەڭ تاڭقالارلىعى, تەلەفون قوسۋلى بولدى, بىراق مەنىڭ قوڭىراۋلارىما ەشكىم جاۋاپ بەرمەدى", دەيدى جابىرلەنۋشى ءوزىنىڭ Facebook پاراقشاسىندا.
سودان كەيىن بولاشاق پروگرامميست سمارتفوننىڭ ورنالاسقان جەرىن گەولوكاتسيا ارقىلى تانۋعا تىرىسقان. بىراق بۇل ناتيجە بەرمەپتى. تۇيسىگىنە سۇيەنگەن, جىگىت اكەسىمەن بىرگە ءۇيدىڭ جانىنداعى دجۋنگليگە اتتانادى. ءوز نومىرىنە قوڭىراۋ شالىپ, ول پالما اعاشىنىڭ استىنداعى تانىس اۋەندى ەسىتەدى. وسىلايشا, جوعالعان قۇرىلعىسىن تاۋىپتى.
iPhone دىمقىل ءارى لاس بولدى. بىراق ەش جەرىنە سىزات تۇسپەگەن جانە سىنباعان. قوسىمشالاردى تەكسەرە وتىرىپ, سمارتفوننىڭ يەسى تاڭ قالادى. تەلەفون گالەرەياسى مايمىل جاساعان فوتوسۋرەتتەر مەن بەينەلەر تولى بولىپتى. ءبىر قىزىعى, بارلىق فوتو جانە ۆيدەو تۇسىرىلىمدەردى مايمىل سەلفي ارقىلى جاساعان.
