قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسمي ساپارمەن ۇلىبريتانيادا بولدى. لوندونداعى كورولدىك قۇرمەتتى قاراۋىلدىڭ قاتىسۋىمەن وتكەن كەزدەسۋدىڭ رەسمي راسىمىنەن كەيىن قازاقستان مەن ۇلىبريتانيا قورعانىس ۆەدومستۆولارىنىڭ باسشىلارى ادىلبەك جاقسىبەكوۆ پەن فيليپپ حامموند ەكىجاقتى كەلىسسوزدەر جۇرگىزدى.
قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسمي ساپارمەن ۇلىبريتانيادا بولدى. لوندونداعى كورولدىك قۇرمەتتى قاراۋىلدىڭ قاتىسۋىمەن وتكەن كەزدەسۋدىڭ رەسمي راسىمىنەن كەيىن قازاقستان مەن ۇلىبريتانيا قورعانىس ۆەدومستۆولارىنىڭ باسشىلارى ادىلبەك جاقسىبەكوۆ پەن فيليپپ حامموند ەكىجاقتى كەلىسسوزدەر جۇرگىزدى.
كەزدەسۋ كەزىندە تاراپتار قازاقستان-بريتانيا اسكەري جانە اسكەري-تەحنيكالىق ىنتىماقتاستىعىنىڭ قازىرگى جاعدايى مەن بولاشاقتا ونى ودان ءارى دامىتۋ ماسەلەلەرىن تالقىلادى.
– ۇلىبريتانيا قازاقستاننىڭ ستراتەگيالىق سەرىكتەسى بولىپ تابىلادى, وسىعان بايلانىستى ءبىز جان-جاقتى قارىم-قاتىناسقا ايرىقشا ءمان بەرەمىز. ءبىزدىڭ پرەزيدەنتىمىز نۇرسۇلتان نازارباەۆتىڭ ۇلىبريتانيا پرەمەر-مينيسترىمەن اراداعى دوستىق قارىم-قاتىناسى ءداستۇرلى سيپات الدى, ەكىجاقتى بايلانىستاردىڭ قولايلى دامۋىنا مۇمكىندىك جاسادى. بيىل جازدا پرەمەر-مينيستر دەۆيد كەمەروننىڭ قازاقستانعا ساپارى اتالعان ءداستۇردىڭ دالەلى. سول ساپار كەلەشەكتە ءوزارا قولايلى ىنتىماقتاستىقتىڭ ستراتەگيالىق دەڭگەيىنە كوشۋىمىزدى انىقتاپ بەردى, – دەپ اتاپ ءوتتى قازاقستان قورعانىس ءمينيسترى.
قازاقستان مەن ۇلىبريتانيا بىتىمگەرلىك پەن اسكەري ءبىلىم سالاسىندا بەلسەندى ىنتىماقتاستىقتا. ءا.جاقسىبەكوۆ پەن ف.حامموند ەكى ەلدىڭ بىتىمگەرلىك بولىمشەلەرىنىڭ بىرلەسكەن كوماندالىق-شتابتىق جاتتىعۋلارى ماسەلەلەرىن, سونداي-اق, اسكەري عىلىم سالاسى بويىنشا ءوزارا قارىم-قاتىناستار جايىن تالقىلادى.
قازاقستان ارمياسى بۇگىندە كاسىبي نەگىزگە كوشۋ كەزەڭىندە تۇر, بۇل ىستە بريتانيانىڭ باي تاجىريبەسى بار. قازاقستان قارۋلى كۇشتەر قاتارىنا قىزمەتكەرلەر قابىلداۋدىڭ ادىستەرىن, كادر ساياساتىن جۇرگىزۋدى, جاۋىنگەرلىك دايارلىقتى ۇيىمداستىرۋدى, بيۋدجەتتىك جوسپارلاۋ مەن الەۋمەتتىك قامتاماسىز ەتۋ نەگىزدەرىن ۇيرەنۋگە مۇددەلى.
وسى كۇنى قورعانىس مينيسترلىگىندە ءا.جاقسىبەكوۆ بىرىككەن كورولدىكتىڭ قارۋلى كۇشتەرى قورعانىس شتابىنىڭ باستىعى, گەنەرال نيكولاس حاۋگتونمەن جانە ۇلىبريتانيا قارۋلى كۇشتەرى باس شتابىنىڭ باستىعى, گەنەرال پيتەر ۋولمەن كەزدەسۋلەر وتكىزدى. بريتاندىق گەنەراليتەتپەن كەلىسسوزدىڭ نەگىزگى تاقىرىبى ۇلىبريتانيا قارۋلى كۇشتەرىنىڭ كاسىبيلەندىرىلۋى بولدى.
لوندوندا قازاقستاندىق اسكەري دەلەگاتسيا ۇلىبريتانيانىڭ ساۋدا-ينۆەستيتسيالىق پالاتاسى (UKTI DCO) مەن جەرسەرىكتىك بايلانىس قۇرالدارىن ءوندىرۋ بويىنشا الەمدەگى ەڭ ءىرى كومپانيالاردىڭ ءبىرى بولىپ تابىلاتىن InMarSat كومپانياسىندا بولدى. عالامدىق جەرسەرىكتىك بايلانىس جۇيەسىن ازىرلەۋشى جانە جاساۋشى بولىپ تابىلاتىن «ينمارسات» كومپانياسى قازىرگى ۋاقىتتا ءتورتىنشى بۋىننىڭ گەوستاتسيونارلىق جەرسەرىكتەرىن پايدالانادى.
«ەگەمەن-اقپارات».
