ايماقتار • 15 قىركۇيەك، 2020

الماتىلىقتار ەمحانا اۋىستىرا الادى

12 رەت كورسەتىلدى

15 قىركۇيەكتەن باستاپ قازاقستاندا العاشقى مەديتسينا-سانيتارلىق كومەك كورسەتۋ ۇيىمىن ەركىن تاڭداۋ بويىنشا تىركەۋ ناۋقانى باستالدى. وعان ەكى ايدىڭ ىشىندە 15 قاراشاعا دەيىن تىركەلۋگە بولادى. بۇل تۋرالى "الەۋمەتتىك مەديتسينالىق ساقتاندىرۋ قورى" كەاق الماتى قالالىق فيليالى حابارلادى.

فيليال وكىلدەرىنىڭ ايتۋىنشا، بۇگىندە الماتى قالاسى بويىنشا امسك 74 ۇيىمى قورمەن كەلىسىمشارتى بار جانە مەديتسينالىق ساقتاندىرۋ پاكەتى جانە كەپىلدەندىرىلگەن تەگىن مەديتسينالىق كومەك اياسىندا مەديتسينالىق قىزمەت كورسەتەدى.

«ازاماتتار ءۇشىن ءتيىمدىسى، تىركەۋ ناۋقانى كەزىندە پاتسيەنتتەر قورمەن كەلىسىمشارتى بار مەملەكەتتىك ءارى جەكەمەنشىك مەديتسينالىق ۇيىمدارعا تىركەلە الادى. بۇل پاتسيەنت تۇراقتى نەگىزدە قارالىپ تۇرعىسى كەلەتىن مەديتسينالىق ۇيىمدى تاڭداۋدىڭ تاماشا مۇمكىندىگى»، — دەدى فيليال ديرەكتورى تىلەۋحان ابىلداەۆ.

اتاپ وتەتىن جايت، ناۋقان كەزىندە امسك ۇيىمىنا تىركەلۋ ارقىلى ازاماتتار مەديتسينالىق كومەكتى تىركەلگەن جەرىنەن 2021 جىلدىڭ 1 قاڭتارىنان باستاپ الا باستايدى.

ەمحاناعا تىركەلۋ بىرنەشە ادىستەرمەن جۇزەگە اسىرىلادى. ءبىرىنشىسى — ەمحانانىڭ تىركەۋ بولىمىنە بارىپ، جەكە باسىن كۋالاندىراتىن قۇجاتتاردى كورسەتىپ، ءوز قولىمەن ءوتىنىش جازۋ كەرەك. بۇل ءتاسىل مىنا ساناتتاعى ادامدار ءۇشىن قولجەتىمدى:
- زەينەتكەرلەر مەن مۇگەدەكتەرگە;
- ستۋدەنتتەرگە;
- بالالاردىڭ زاڭدى وكىلدەرى مەن بالالىق شاقتان مۇگەدەك تۇرعىنداردىڭ  قامقورشىلارى;
- شەتەلدە تۋعان بالالار;
- تۇرمەدە جازاسىن وتەپ جاتقاندار (سول جەردەگى ەمدەۋ مەكەمەسىنە);
- اسكەري بورىشىن وتەپ جاتقاندار;
- بوبەكتەر، بالالار مەن قارتتار ۇيلەرىنىڭ تۇرعىندارى;
- رەسمي سەنىمحات ارقىلى تىركەلەتىندەر.

ەكىنشىدەن — eGov.kz. پورتالىنىڭ جەكە كابينەتى ارقىلى ءوتىنىش بەرۋ. بۇل ءادىس بارلىق ازاماتتار ءۇشىن قولجەتىمدى. ول ءۇشىن ەلەكتروندى تسيفرلىق قولتاڭبا مەن كابينەتكە كىرۋ ءۇشىن ءبىر رەتتىك قۇپياسوز كەرەك.

تىركەۋ ناۋقانى دەنساۋلىق ساقتاۋ سۋبەكتىلەرىنىڭ دەرەكتەر بازاسىنا تىركەلگەن جانە ءمامس جانە تمككك ۇسىنا الاتىن مەديتسينالىق ۇيىمدار اراسىندا عانا جۇرگىزىلەتىنىن اتاپ وتكىمىز كەلەدى.

تىركەلۋگە بولاتىن ەمحانالار تىزىمىمەن  fms.kz سايتىندا «ەمحانانى تاڭداۋ» بولىمىندە تانىسىپ، تىركەۋ تۋرالى تولىق اقپاراتتى 1406 نومىرىندەگى بايلانىس-ورتىلىعىنان بىلۋگە بولادى.

سوڭعى جاڭالىقتار

ۇقساس جاڭالىقتار