جاس ۇرپاقتى, ءتىپتى ءتانى مەن جانى ساۋ بارشا حالىقتى ەپتىلىككە باۋليتىن ارقاندى ساياباق اشۋ يدەياسىن توتەنشەلىكتەر كوتەرگەنىمەن, بۇل باستامانى جەرگىلىكتى اكىمدىك بىردەن قولداپ اكەتكەن. شاعان وزەنىنىڭ جايىققا قوسىلار تۇسىنداعى اسەم مۇيىستە ورنالاسقان بۇل ساياباق قالا تۇرعىندارى مەن قوناقتاردىڭ دەمالىس ءساتىن اسەرلى دە پايدالى وتكىزۋىنە مۇمكىندىك بەرەدى. ءارى سپورت, ءارى ويىن تۇرىندە بەلسەندى دەمالىس اسىرەسە بالالارعا قاتتى ۇناپ جاتىر.
ارقاندى ساياباقتىڭ اشىلۋىنا ورال قالاسى اكىمىنىڭ ورىنباسارى اسحات قۇلباەۆ قاتىسىپ, قالا كۇنىنىڭ قارساڭىندا تۇساۋىن كەسىپ وتىرعان ساياباقتىڭ اشىلۋ سالتاناتىمەن قۇتتىقتادى.
"قازاقستاندا تۇرعان جەرى, تابيعاتى ءدال ورال سياقتى تاماشا شاھار كوپ ەمەس. جاسىل جەلەكتىڭ اراسىندا, اعىن سۋدىڭ جاعاسىندا ورنالاسقان بۇل ساياباقتا دەمالۋ – جانعا دا, تانگە دە شيپا بەرەدى. جانە وسى كەرەمەتتى جاساۋعا بيۋدجەت قارجىسى جۇمسالعان جوق. وسى يگىلىك قاراپايىم حالىق ءۇشىن جاسالىپ وتىر", - دەدى قالا باسشىسىنىڭ ورىنباسارى.
شىنىندا دا ارقاندى ساياباقتىڭ بارلىق جابدىعىن باتىس قازاقستان وبلىستىق توتەنشە جاعدايلار دەپارتامەنتىنىڭ ء"ورت ءسوندىرۋ جانە اۆاريالىق قۇتقارۋ جۇمىستارى قىزمەتى" ءوز كۇشىمەن جاساپ شىققان ەكەن. سونداي-اق ساياباققا كەلىپ دەمالۋ, اسپالى اتراكتسيونداردى پايدالانۋ دا اقىسىز بولماق.
