− 2020 جىل «ۆولونتەر جىلى» دەپ اتالعان ساتتەن باستاپ جاسوتاندىقتاردىڭ كۇشى بەكەمدەنىپ, ورتاق ماقسات جولىندا ەڭبەك ەتۋگە كىرىستى. بۇعان دەيىن دە ايتۋلى ءىس-شارالار مەن قوعامدىق جۇمىستاردا بەلسەندىلىك تانىتساق, بۇل جولى ارنامىزدى كەڭەيتۋگە اتسالىسا باستادىق. پاندەميانىڭ اۋىر زارداپتارىنا قاراماستان, حالقىمىزدىڭ ىنتىماعى مەن اۋىزبىرشىلىگى ودان ءارى نىعايا ءتۇستى. وسى تۇستا ۆولونتەرلەردىڭ ەرەن ەڭبەگى كوپشىلىك الدىندا ەلەنگەننىڭ ۇستىنە ەلەنە بەردى. قالىڭ ەلدىڭ العىسىنان كەيىن, قالايشا تىنىش وتىرا الامىز؟! – دەيدى باقداۋلەت جاندىلداەۆ.
ەلوردالىق جاسوتاندىقتاردىڭ جەتەكشىسى ەڭ بەلسەندى جاستارمەن بىرگە «باقىتتى وتباسى», «ارداگەرلەردى ارداقتايىق» جانە تاعى باسقا پارتيالىق جوبالار اياسىندا از قامتىلعان جانە كوپبالالى وتباسىلارعا, سونداي-اق جالعىزباستى قارتتارعا قولۇشىن سوزدى.
− ەلدە ىندەتتىڭ بەلەڭ العان كەزىندە «Biz birgemiz» جالپىۇلتتىق اكتسياسىنىڭ شەڭبەرىندە قالالىق جاستار ساياساتى باسقارماسىنا قاراستى ۆولونتەرلەر شتابىمەن بىرگە 10 مىڭنان اسا ازىق-ت ۇلىك سەبەتى مەن گيگيەنالىق زاتتار, سونىڭ ىشىندە 500 مىڭ مەديتسينالىق بەتپەردە تاراتىلدى. سونىمەن بىرگە Nur Otan پارتياسىنىڭ قولداۋىمەن اكتسيانىڭ ەكىنشى تولقىنىندا قالاعا 2 ملن مەديتسينالىق بەتپەردە اكەلىنىپ, سونىڭ ۇشتەن ءبىرىن تابىستادىق, − دەيدى بەلسەندى.
بەيداۋا كەسەلدىڭ اپتىعىن باسۋعا دارىگەرلەرمەن بىرگە ۆولونتەرلەر دە سەپتەسىپ كەلەدى. وسى ورايدا جاسوتاندىقتار ەلورداداعى 2,5 مىڭداي مەديتسينا قىزمەتكەرىنە «العىس پاكەتتەرىن» تاپسىرعان ەدى. ءاربىر سەبەتتە دارىگەرلەرگە ارنالعان ۆيتاميندەر مەن پايدالى ونىمدەردىڭ وننان اسا ءتۇرى جيناقتالدى. بۇدان وزگە, ادام اعزاسىنا داۋا بولاتىن قىمىز ءونىمى دە جەتكىزىلدى. اكتسيا ەلىمىزدىڭ بارلىق وڭىرىندە جالعاسىن تاۋىپ, ايرىقشا قولداۋعا يە بولدى.
باقداۋلەت جاندىلداەۆتىڭ ايتۋىنشا, قاسيەتتى قۇربان ايت مەرەكەسىندە «نۇر-استانا» مەشىتىنىڭ, قالالىق ءدىن ىستەرى باسقارماسىنىڭ جانە قالالىق جاستار ساياساتى باسقارماسىنا قاراستى ەرىكتىلەر شتابىنىڭ مۇشەلەرىمەن بىرلەسە وتىرىپ, 31 شىلدە مەن 2 تامىز ارالىعىندا مەديتسينا قىزمەتكەرلەرىنە ىستىق تاماق جەتكىزىپ بەرگەن. سونداي-اق تەگىن تاماقپەن كۇن سايىن 2 700-دەن اسا قىزمەتكەر جۇمىس ىستەيتىن 12 ستاتسيونار قامتىلعانىن ايتىپ ءوتتى.
«تاعى ءبىر ايتا كەتەرلىگى, ەلوردادا بيىل شومىلۋ ماۋسىمىندا ادام ءولىمى ازايدى. ويتكەنى ءبىزدىڭ ۆولونتەرلەر توتەنشە جاعداي دەپارتامەنتىنىڭ قىزمەتكەرلەرىنە قولعابىس ەتىپ, ءبىرتالاي زارداپتىڭ الدىن الدى. كەشەندى شارالاردىڭ ارقاسىندا ەرەسەكتەر ءولىمى 28 پايىزعا, ال بالالار ءولىمى 100 پايىزعا تومەندەدى. يگى ءداستۇردى جاسوتاندىقتار جىل سايىن جالعاستىرىپ كەلەدى», دەيدى قالالىق Jas Otan جاستار قاناتىنىڭ توراعاسى.
