جۋىردا وبلىس اكىمى قۇمار اقساقالوۆ وبلىستىڭ استىقتى وڭىرلەرىنىڭ ءبىرى – عابيت مۇسىرەپوۆ اۋدانىنا بارىپ, استىقتىڭ ساپاسىن كوردى. بۇل اۋدانداعى استىق شىعىمدىلىعى وزگەلەرگە قاراعاندا بيىل دا جوعارى. بۇرىنعى كوكشەتاۋ وبلىسىنىڭ قىسقارعان ءۇش اۋدانىنىڭ نەگىزىندە قۇرالعان اۋداننىڭ استىق القاپتارىنىڭ كولەمى دە ۇلكەن. وبلىس ورتالىعىنان 300 شاقىرىمداي قاشىقتا جاتىر.
بيىل اۋدان ديقاندارى 712 مىڭ گەكتار جەرگە ءدان سىڭىرگەن. قازىر شىققان ءونىمنىڭ 70 پايىزىن جيناپ الدى. بىلتىر اۋدان باسشىلىعىنا بۇرىن ەكى اۋداندى تابىستى باسقارعان اعزام تاستەمىروۆ بارعان بولاتىن. تاجىريبەلى باسشى مۇندا دا جۇمىستى دوڭگەلەنتىپ جىبەردى. اۋدان ورتالىعىنداعى 45 كوشە جوندەلىپ, 50 شاقىرىمداي جول سالىندى. 8 اۋىلعا اۋىز سۋ تارتىلدى. 9 مەكتەپ جوندەۋدەن ءوتتى. اۋداندا تۇرعىن ءۇي سالۋ قارقىنى دا جوعارى. ماسەلەن, وبلىس اكىمى قۇمار اقساقالوۆتىڭ ساپارىندا 52 پاتەرلى ۇلكەن تۇرعىن ءۇي پايدالانۋعا بەرىلدى. وبلىس اكىمى قونىس توي يەلەرىنە پاتەر كىلتىن تاپسىردى, سونداي-اق كوپبالالى وتباسىنا كورىمدىك ەسەبىندە كىر جۋاتىن ماشينا سىيلادى. ال اتباسىن بۇرعان نەجينكا اۋىلىندا بيىل 10 ءۇي سالىنعان. مۇنداعى «استىق-پريۆولنوە» جشس 6,5 مىڭ گەكتار جەرگە استىق وسىرەدى. مال شارۋاشىلىعىن دا دامىتۋ ۇستىندە. قازىر جوباسى 1,5 ملرد تەڭگە تۇراتىن تاۋارلى ءسۇت فەرماسىن سالىپ جاتىر. فەرما قۇرىلىسى الداعى جىلدىڭ ءساۋىر ايىندا اياقتالادى.
وبلىس باسشىسى وسى اۋىلداعى ديقاندارمەن كەزدەسكەندە پرەزيدەنت ق.توقاەۆتىڭ جاڭا جولداۋىندا العا قويىپ وتىرعان مىندەتتەرى تۋرالى ايتتى. «الداعى بەس جىلدا ەڭبەك ونىمدىلىگىن 2,5 ەسە ارتتىرۋ العا قويىلىپ وتىر. ءبىز بۇل مىندەتتى تولىق ورىنداي الامىز. بۇل ءۇشىن جەردىڭ كۇتىمىن ارتتىرىپ, مينەرالدى تىڭايتقىشتار سەبۋدى ۇلعايتۋ كەرەك. ءبىز بيىل 130 مىڭ تونناداي مينەرالدى تىڭايتقىشتار سەپتىك. وسىنىڭ ءوزى رەسپۋبليكا بويىنشا الدىڭعى ورىندا تۇر. الايدا الداعى بەس جىلدا ونىڭ كولەمىن جىل ساين 200 مىڭ تونناعا جەتكىزۋىمىز كەرەك. سونىمەن قاتار بيدايدىڭ جوعارى ونىمدىلىگىن بەرەتىن سۇرىپتار الامىز. ونىمدىلىگى جوعارى جاڭا تەحنيكالار الۋدى ارتتىرامىز. بيىل 1,5 ملرد تەڭگەگە تەحنيكالار ساتىپ الىندى. الداعى جىلداردا بۇل ساندى كوبەيتە تۇسەتىن بولامىز. سونىمەن بىرگە استىق تاسىمالىنداعى شىعىنداردى ازايتۋ ءۇشىن جولدار دا جوندەلە تۇسەدى. مىنە, وسى جۇمىستاردى ساپالى ءارى جوعارى دەڭگەيدە جۇرگىزەتىن بولساق, پرەزيدەنت العا قويعان مەجەگە جەتەمىز. بۇل قولىمىزدان كەلەدى», دەدى ول.
جالپى ايتقاندا, بيىلعى استىق ورۋ ناۋقانى قالىپتى جاعدايدا ءوتىپ جاتىر. ديقان ەڭبەگى جەمىستى بولا تۇسسە, ەلدىڭ دە تابىستى بولارى ءسوزسىز.
سولتۇستىك قازاقستان وبلىسى
