رۋحانيات • 11 قىركۇيەك، 2020

حاكىم ابايدىڭ 175 جىلدىعىنا وراي جالپىحالىقتىق ديكتانت جازىلدى

882 رەت كورسەتىلدى

ءتىل ساياساتى كوميتەتى شايسۇلتان شاياحمەتوۆ اتىنداعى ء"تىل-قازىنا" ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن 8-11 قىركۇيەك ارالىعىندا حاكىم ابايدىڭ 175 جىلدىعىنا وراي العاش رەت ەلىمىزدىڭ بارلىق وڭىرىندە " ۇلى اباي – حالىق جۇرەگىندە" اتتى تاقىرىپتا جالپىحالىقتىق ديكتانت جازۋ شاراسى ءوتتى، دەپ حابارلايدى Egemen.kz

ءىس-شارانىڭ ماقساتى – اباي قۇنانباي ۇلىنىڭ  مۇرالارىن كەڭىنەن ناسيحاتتاۋ جانە جازۋ مادەنيەتىن قالىپتاستىرۋعا ىقپال ەتۋ.

"قازاقتىڭ ۇلى اقىنى ابايدىڭ 175 جىلدىعى اتالىپ ءوتىپ جاتىر. وسىعان بايلانىستى ەلىمىزدە ءارتۇرلى شارالار ۇيىمداستىرىلۋدا. سولاردىڭ ءبىرى – بۇگىنگى جالپىحالىقتىق ديكتانت. ديكتانتقا ءبىر ادامداي قاتىسىپ وتىرعاندارىڭىز ءۇشىن العىس ايتامىن. بۇل ديكتانتتىڭ قانداي ماقساتى بار؟ وتان ورتاق بولعاننان كەيىن، ءتىل مەن جەر ورتاق. ياعني ەلىمىزدەگى قانداي دا بولسىن ۇلى تۇلعالار دا ورتاق"، دەدى ءتىل ساياساتى كوميتەتىنىڭ توراعاسى ادىلبەك قابا.

وسى ورايدا ول مەملەكەتتىك ءتىل مەن ۇلى تۇلعالار ۇلتتى بىرىكتىرەتىنىن، ءبارىمىزدى تۇتاس ەل ەتەتىنىن اتاپ ءوتتى.

"سوندىقتان بۇگىن بارشىڭىزدىڭ قاتىسۋلارىڭىزبەن مەملەكەتتىك تىلدە ۇلى ابايدىڭ 175 جىلدىعىنا ارنالعان " ۇلى اباي – حالىق جۇرەگىندە" تاقىرىبىندا رەسپۋبليكالىق ديكتانت جازۋدى قولعا الىپ وتىرمىز. ابايدىڭ شىعارماشىلىعى بارىمىزگە جاقسى تانىس. ول ۇلى ادامنىڭ ەڭبەكتەرى ەشقاشان دا ۇلتقا بولىنبەيدى. ۇلى شىعارماشىلىق بارلىق ادامزاتقا ءتان، ياعني اباي تەك قازاقتىڭ عانا ەمەس، ادامزاتقا ورتاق ۇلى تۇلعا"، دەپ تىلگە تيەك ەتتى كوميتەت توراعاسى.

بۇل شاراعا ءتىل باسقارمالارى قىزمەتكەرلەرى، وبلىستىق جانە اۋداندىق تىلدەردى وقىتۋ ورتالىقتارىنىڭ وقىتۋشىلارى، ادىسكەرلەر، ءتىل ماماندارى جانە مەملەكەتتىك قىزمەتشىلەر قاتىستى. ديكتانت رەسپۋبليكامىزدىڭ ءار وڭىرىندە بەلگىلەنگەن كۇندەرگە سايكەس وتكىزىلدى. ديكتانت 145 سوزدەن تۇرادى. ال ءماتىنى ابايدىڭ قارا سوزدەرىنەن قۇراستىرىلعان.

سوڭعى جاڭالىقتار

ۇقساس جاڭالىقتار