ول 56 جاستاعى قىزىلجار اۋدانىنىڭ ءبىر تۇرعىنى بولىپ شىقتى. قايدان ەكەنى بەلگىسىز, ايتەۋىر ول قولىنا دۇكەندە ساتىلا قويمايتىن ەسىكتىڭ دابىلىنداعى كودتى وقي الاتىن قۇرالدى ءتۇسىرىپ, مەكتەپ نەمەسە بالاباقشا ماڭىنا توقتاپ, بالالارىن اسىعىس ىشكە اكەتكەن اتا-انالاردىڭ ماشينالارىن اشىپ, ىشىندەگى زاتتارىن قولدى قىلۋدى كاسىپ ەتەدى. سونىڭ ىشىندە قالانىڭ گوركي كوشەسىندە ورنالاسقان №10 مەكتەپتىڭ الدىنا قويىلعان Mitsubishi كولىگىن اشىپ, ىشىنەن بانك كارتالارى مەن اقشاسى بولعان ءاميانىن ۇرلاعان. كەلتىرىلگەن شىعىن سوماسى 150 مىڭ تەڭگە. وسىندايدا از ۋاقىتقا كەتسە دە, ءاميانىن ىشكە اشىق قالدىراتىندارعا ساق بولۋ كەرەكتىگىن ەسكەرتكىمىز كەلەدى. ارينە ادام ەسىگى ق ۇلىپتالعان ماشينادان از ۋاقىتتا ەشكىم ەشتەڭە ۇرلاي قويماس دەپ سەنەدى. بىراق قازىرگى ۇرىلار نەشە ءتۇرلى جوعارى تەحنولوگياعا قول جەتكىزىپ جاتقانىن ۇمىتپاۋ كەرەك.
شاقىرىلعان كريميناليستەر بۇزىپ كىرۋ بەلگىلەرىن تاپپاي, ەسىكتىڭ كودپەن اشىلعانىن انىقتاعان. كەلەسى وقيعا التىنسارين كوشەسىندەگى بالاباقشانىڭ قاسىندا بولعان. ۇرى Nissan اlmera اۆتوكولىگىنەن قۇجاتتار مەن 22 مىڭ تەڭگە اقشاسى بولعان ءامياندى قولدى قىلعان.
پوليتسەيلەر جاڭا تەحنولوگيالىق قۇرالمەن جاراقتالعان كولىك توناۋشىنىڭ ىزىنە ءتۇسۋ ءۇشىن بالالارىن مەكتەپكە نەمەسە بالاباقشاعا اپاراتىن انالاردىڭ كولىگىن تورۋىلداعان. كەشەندى جەدەل-ىزدەستىرۋ ءىس-شارالارىنىڭ ناتيجەسىندە كۇدىكتى ۇستالدى. ول بۇرىن ءتۇرلى قىلمىستار جاساعانى ءۇشىن بىرنەشە رەت سوتتالعان 56 جاستاعى قىزىلجار اۋدانىنىڭ تۇرعىنى بولىپ شىقتى. پوليتسەيلەر تىنتكەندە ونىڭ قالتاسىنان ەسىك اشۋ دابىلىنىڭ كودىن وقيتىن ەلەكتروندى قۇرىلعىنى الىندى. قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالدى. ونىڭ باسقا دا وسى تارىزدەس قىلمىستارعا قاتىستىلىعى دا تەكسەرىلۋدە. فاكتىلەر بويىنشا ونىڭ ۇستىنەن قىلمىستىق كودەكستىڭ "ۇرلىق" بابى بويىنشا ءىس قوزعالدى. ۇرلانعان زاتتاردىڭ ءبىر بولىگى الىنىپ, يەلەرىنە قايتارىلدى.
"زاماناۋي تەحنولوگيا قىلمىستىق ورتاعا ەنىپ, قىلمىس جاساۋدىڭ جاڭا تاسىلدەرىن تۋدىرۋدا. وسىنداي قاۋىپتى جاڭاشىلدىقتان قورعانۋ قيىنعا سوعادى. دەگەنمەن, ساقتاق شارالارى تۋرالى ايتىلعان كەڭەستەر ادامدارعا ءوز مۇلكىن ساقتاۋعا سەپتىگىن تيگىزەدى. "ساقتىقتا قورلىق جوق" ەكەنىن اركىم ەسىنە ۇستاۋى كەرەك. قىلمىسكەرلەردىڭ قىزىعۋشىلىعىن تۋدىراتىن اقشا, قۇجاتتار مەن قۇندى زاتتاردى كولىكتە قالدىرۋعا بولمايدى. كەيبىرەۋلەر ءتىپتى ونى اشىق قالدىرا سالادى. ءتىپتى تىعىپ قالدىرعاننىڭ وزىندە اڭدىپ جۇرگەن ۇرى ادامنىڭ, سونىڭ ىشىندە اسىرەسە ايەل جۇرگىزۋشىلەردىڭ ماشينادان سومكەسىز شىققانىن كورىپ, ءاميننىڭ سالوندا ەكەنىن بىردەن بىلەدى. سونىمەن قاتار كولىكتى بەينەكامەرالاردىڭ شولۋ ايماعىنا قالدىرعان ابزال. ال بەينەباقىلاۋ جۇيەسى ۇرىنى ۇستاۋدا ماڭىزدى ءرول اتقاراتىنىن ايتا كەتۋ قاجەت", دەيدى سقو پد باستىعىنىڭ ورىنباسارى پوليتسيا پولكوۆنيگى رۋسلان نازاروۆ.
ەلەكتروندى قۇرىلعىمەن جاسالعان ۇرلىقتىڭ وسىعان ۇقساس جاعدايى پەتروپاۆلدا بۇرىن دا تىركەلگەن بولاتىن. بالكي ونى جاساعان دا وسى ۇرى بولۋى مۇمكىن. قازىر ول ءجىتى تەرگەلۋدە.
