باسەكەلەستىككە شىداس بەرەتىن ونىمدەردى سىرتقى نارىققا جونەلتۋ مۇمكىندىگىن تۋعىزدى
باسەكەلەستىككە شىداس بەرەتىن ونىمدەردى سىرتقى نارىققا جونەلتۋ مۇمكىندىگىن تۋعىزدى
«مۇنايماش» اق-تىڭ تاريحى ارىدە جاتىر. فاشيستىك گەرمانيا ەلىمىزدىڭ تورىنە ەنتەلەي ۇمتىلعاندا پەتروپاۆل قالاسىنا كوشىرىپ اكەلىنگەن تاگانروگتىق «كراسنىي گيدروپرەسس» كاسىپورنى نەگىزىندە اتقارۋشى مەحانيزمدەر زاۋىتى قۇرىلدى. وسى كەزەڭدە اسكەريلەر ءۇشىن ارنايى قۇرال-جابدىقتار شىعارىلسا, بەيبىت ءومىر ورنىققاننان كەيىن اۋىل شارۋاشىلىعى سالاسىنا بەيىمدەلدى. ءسويتىپ, 1992 جىلعا دەيىن كسرو كەمەقۇرىلىسى مينيسترلىگى قۇرامىندا مۇناي-حيميا, راديو, ەلەكترونيكالىق جانە مەحانيكالىق اسپاپتار قۇراستىرۋمەن اينالىستى. تاۋەلسىزدىكتىڭ ەلەڭ-الاڭ شاعىندا ونىمدىلىك كەمىپ, قيىندىققا كەزىككەنىمەن, مەملەكەتتىڭ قولداۋى ارقاسىندا قايتادان كوش ساپىنا قوسىلدى. قىسقا مەرزىم ىشىندە مۇناي-گاز سالاسى ءۇشىن ارنايى قۇرال-جابدىقتار ءوندىرۋدى مەڭگەردى. ولاردىڭ اراسىندا ۇڭعىما شتانگالىق سورعىلار, مۇناي-گاز جابدىقتارىنىڭ قوسالقى بولشەكتەرى ۇلكەن سۇرانىسقا يە. 1998 جىلدان «بارلاۋ وندىرۋقازمۇنايگاز» اق-پەن تىعىز ارىپتەستىك قارىم-قاتىناس ورناتىپ, باتىس وڭىرلەرىندەگى كەن ورىندارىنا مۇناي سورعىلارىن جۇيەلى جونەلتە باستادى. 2012 جىلى «قازاقستان ينجينيرينگ» ۇلتتىق كومپانياسىمەن, «برك-ليزينگ» اق-پەن بىرلەسە وتىرىپ, «ونىمدىلىك-2020» مەملەكەتتىك باعدارلاماسى شەڭبەرىندە «مەحانيكالىق وڭدەۋ ءوندىرىسىن جاڭعىرتۋ» جوباسىن يگەرۋگە 1,5 ميلليارد تەڭگە ينۆەستيتسيا تارتىلدى. جاپونيادان, اقش-تان جانە برازيليادان جوعارى ۇلگىدەگى «Nakamura Tome», «Hardinqe», «Romi G 50M» توكارلىق ستانوك قوندىرعىلارى ورناتىلىپ, وندىرىستىك ۇدەرىستەردى جوبالاۋ مەن باسقارۋ تۇگەلدەي اۆتوماتتاندىرىلدى. كاسىپورىننىڭ وندىرىستىك قۋاتى 1,5 ەسەگە ۇلعايىپ, جىلىنا 5 مىڭ داناعا دەيىن مۇناي سورعىلارىن جونەلتۋ مۇمكىندىگىنە يە بولدى. وندىرىستىك تسيكل 80 پايىزعا, مەحانيكالىق وڭدەۋ جىلدامدىعى 5 ەسەگە قىسقاردى.
– Cوڭعى 5 جىلداعى تەحنيكالىق-ەكونوميكالىق كورسەتكىشتەرىمىزدى تالدايتىن بولساق, ىرعاقتى دامۋىمەن سيپاتتالادى. اتاپ ايتاتىن بولساق, ءونىم ءوندىرۋ كولەمى 471 ميلليون تەڭگەدەن 2737 ميلليون تەڭگەگە, ءبىر ەڭبەككەرگە شاققانداعى ەڭبەك ونىمدىلىگى 4811 تەڭگەدەن 22259 تەڭگەگە دەيىن ءوستى. ورتاشا ايلىق جالاقى 124691 تەڭگەنى قۇرايدى. ەلباسىنىڭ يندۋستريالىق-يننوۆاتسيالىق ساياساتى ءوندىرىسكە زور سەرپىن بەرىپ, ەكونوميكانى ۇدەمەلى جاڭعىرتۋ باستى باعدارىمىزعا اينالعان. الدا ونىمدەردىڭ قازاقستاندىق ۇلەسىن 60 پايىزعا جەتكىزۋ, ءونىمنىڭ وزىندىك قۇنىن 15-20 پايىزعا كەمىتۋ مىندەتتەرى تۇر, – دەيدى, كاسىپورىننىڭ تەحنيكالىق ديرەكتورى سەرگەي ليتۆينوۆ.
وسىلايشا, وندىرىستىك جاڭعىرتۋلار ءوز جەمىسىن بەرىپ كەلەدى. 9 ايدىڭ قورىتىندىلارى ايتارلىقتاي. جىل اياعىنا دەيىن 3 ميلليارد تەڭگەنىڭ ونىمدەرىن تۇتىنۋشىلارعا جەتكىزۋ ويلاستىرىلعان. سوندا بىلتىرعىعا قاراعاندا, ءونىم ءوندىرۋ قۋاتى 30 پايىزعا ۇلعاياتىن بولادى. «قازمۇنايگاز» ۇلتتىق كومپانياسىمەن ۇزاق جىلعا كەلىسىمشارت جاسالىپ, تاپسىرىستار قابىلداۋ كولەمى 1,5 ەسەگە ءوستى. باسەكەلەستىككە قابىلەتتىلىك ءبىرىنشى كەزەكتە ساپامەن ايقىندالادى دەسەك, تەحنيكالىق سيپاتتامالارى بويىنشا ۇزدىك الەمدىك ۇلگىلەرمەن تەڭەسەتىن مۇناي-گاز ونىمدەرىن سىرتقى نارىققا شىعارۋدىڭ العاشقى قادامدارى جاسالدى. جوعارى تەحنولوگيالىق جاڭعىرتۋدان وتكەن كاسىپورىننىڭ العاشقى ساتىپ الۋشىلارى رەسەيدىڭ مۇناي وڭدەۋشىلەرى بولىپ وتىر.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى
